1 ‘Ua fetalai mai le ALI‘I ‘iā Mose, “‘Inā ulufale atu ia ‘iā Farao, auā ‘ua ‘ou fa‘ama‘a‘a i lona loto ma loto o ana ‘au‘auna, ‘ina ‘ia ‘ou tu‘uina atu a‘u nei fa‘ailoga i ona luma;
2 ‘ina ‘ia e ta‘u atu i taliga o lau fānau ‘atoa ma le fānau a lau fānau, o mea na ‘ou faia i Aikupito, ma a‘u fa‘ailoga na ‘ou tu‘uina atu ai ‘iā te i latou, ‘ina ‘ia ‘outou iloa ai, o a‘u lava o le ALI‘I.”
3 ‘Ona ulufale atu lea o Mose ma Arona ‘iā Farao, ‘ua la fai atu ‘iā te ia, “O lo‘o fa‘apea ‘ona fetalai mai o le ALI‘I le Atua o sa Eperū; ‘‘E te lē mafai ‘ea se‘ia afea ‘ona e fa‘amaulalo i o‘u luma? Tu‘u mai ia lo‘u nu‘u e ō, ‘ina ‘ia latou ‘au‘auna mai ‘iā te a‘u.
4 Auā pe ‘āfai ‘e te lē mafai ‘ona tu‘u mai o lo‘u nu‘u e ō, fa‘auta, a taeao ‘ou te ‘auina mai ai o sē akerise i lou nu‘u;
5 e lilo ai le fogā‘ele‘ele, e lē mafai ai ‘ona iloa le ‘ele‘ele, e ‘aina ai fo‘i toe mea na sao ma totoe ma ‘outou i le uato‘a; e uma fo‘i ona ‘aina o la‘au uma o lo‘o tutupu mo ‘outou i le fanua.
6 E tūtūmu ai fo‘i ou fale, ma fale o au ‘au‘auna uma lava, ‘atoa ma fale o Aikupito uma lava; na lē iloa se mea fa‘apea e o‘u mātua, po o mātua o o‘u mātua, talu le aso na latou nonofo ai i le nu‘u e o‘o i le aso nei.’” ‘Ona liliu ai lea o ia ‘ua ulufafo atu nai ‘iā Farao.
7 ‘Ona fai ane lea o ‘au‘auna a Farao ‘iā te ia, “E fai ma mailei lenei tagata ‘iā te i tatou se‘ia afea? ‘ia e tu‘u atu ia tagata e ō, ‘ina ‘ia latou ‘au‘auna i le ALI‘I lo latou Atua; ‘e te lē ‘au silafia ‘ea ‘ua fa‘aumatia Aikupito?”
8 ‘Ona toe fa‘afoisia lea o Mose ma Arona ‘iā Farao, ‘ona fai mai lea o ia ‘iā te i lā‘ua, “‘Inā ō ia ‘outou, ‘au‘auna atu i le ALI‘I lo ‘outou Atua; a o ai ‘ea ma ai tou te ō?”
9 ‘Ua tali atu Mose, “Matou te ō ma o matou taulele‘a, ma o matou toeaina, ma o matou atali‘i, ma o matou afafine, matou te ō atu fo‘i ma a matou lafu mamoe, ‘atoa ma a matou lafu povi; auā o le a fai la matou tausamiga i le ALI‘I.”
10 ‘Ona fai mai lea o ia ‘iā te i lā‘ua, “‘Ia fa‘apea ‘ona i ai o le ALI‘I ‘iā te ‘outou, pe ‘āfai ‘ou te tu‘uina atu ‘outou e ō ma a ‘outou fānau auā o lo‘o lumana‘i le leaga ‘iā te ‘outou.
11 E lē fa‘apea lava; ō atu ia ‘outou tane, ma ‘au‘auna i le ALI‘I, auā o le mea lea na ‘outou manana‘o i ai.” ‘Ona tulia lea o i lā‘ua nai luma o Farao.
12 ‘Ona fetalai mai lea o le ALI‘I ‘iā Mose, “Fa‘aloaloa ia lou lima i luga o le lau‘ele‘ele o Aikupito i le sē akerise, ‘ia ō a‘e i luga o le lau‘ele‘ele o Aikupito; e ‘aina ai fo‘i o la‘au afu uma o le fanua, o mea uma lava ‘ua totoe i le uato‘a.”
13 ‘Ona fa‘aloaloa lea e Mose o lona to‘oto‘o i luga o le lau‘ele‘ele o Aikupito, ‘ona fa‘aagi mai lea e le ALI‘I o le matagi mai sasa‘e i le lau‘ele‘ele i lea lava ao uma ma lea lava po uma; ‘ua o‘o i le taeao, ‘ona ‘aumai ai lea o sē akerise o le matagi mai sasa‘e;
14 ‘ua ō a‘e fo‘i o sē akerise i luga o le lau‘ele‘ele uma lava o Aikupito, ‘ua nonofo fo‘i i nu‘u uma lava o Aikupito, ‘ua tele lava; sa leai lava anamua ni sē akerise e tusa ma ia sē akerise, e lē toe fa‘apea lava.
15 ‘Ua ufitia ai le fogā‘ele‘ele uma lava, ‘ua fa‘apouliuligia ai fo‘i le nu‘u; ‘ua ‘aina ai fo‘i o la‘au afu uma o le nu‘u, ‘atoa ma fua uma lava o la‘au na totoe i le uato‘a, e le‘i toe lava sina lau i se la‘au po o se la‘au afu i le fanua i le nu‘u ‘atoa uma o Aikupito.
16 ‘Ona fa‘ata‘alise lea o Farao ‘ona ‘a‘ami ‘iā Mose ma Arona; ‘ua ia fai mai fo‘i i ai, “‘Ua ‘ou agasala i le ALI‘I lo ‘outou Atua, ‘atoa fo‘i ma ‘oulua;
17 a o lenei, ‘ia ‘ave‘eseina la‘u agasala, na o lenei lava, ma ‘ia ‘oulua fa‘atoga atu i le ALI‘I lo ‘outou Atua, ‘ina ‘ia ‘ave‘eseina e ia ‘iā te a‘u, na o lenei lava mala.”
18 ‘Ona alu ‘ese lea o ia ‘iā Farao, ma fa‘atoga atu ai i le ALI‘I.
19 ‘Ona fa‘aliliuina lea e le ALI‘I o le matagi mai sisifo e malosi lava, ‘ua si‘itia ai o sē akerise, ma lafoia i le sami Ulaula; ‘ona lē toe i ai lea o se sē akerise e tasi i le nu‘u uma lava o Aikupito.
20 A ‘ua fa‘ama‘a‘aina e le ALI‘I le loto o Farao, e lē tu‘uina mai lava le fānauga a Isaraelu e ō.
21 ‘Ona fetalai mai lea o le ALI‘I ‘iā Mose, “‘Ia fa‘aloaloa ia lou lima i le lagi, ‘ina ‘ia pouliuli le nu‘u o Aikupito, o le pouliuli e mafai ‘ona tagofia.”
22 ‘Ona fa‘aloaloa lea e Mose o lona lima i le lagi, ‘ona pouliuli tele lava lea o le nu‘u ‘atoa uma o Aikupito, e tolu aso.
23 ‘Ua lē feiloa‘i i latou, e le‘i tula‘i se tagata i le mea sa nofo ai, e tolu aso; a o le fānauga uma lava a Isaraelu, ‘ua malamalama mea uma sa latou nonofo ai.
24 ‘Ona vala‘au mai lea o Farao ‘iā Mose, ma ia fai mai, “‘Inā ō ia ‘outou, tou te ‘au‘auna i le ALI‘I; na o ‘outou lafu mamoe ma o ‘outou lafu povi tu‘u pea ia, ‘ae tou ō ma a ‘outou fānau.”
25 A ‘ua tali atu Mose, “‘Ia e tu‘u mai fo‘i ‘iā i matou o taulaga ma taulaga mū, ‘ina ‘ia matou osi taulaga ai i le ALI‘I lo matou Atua;
26 e ‘ave lava a matou manu, e lē tu‘una se atigivae e tasi; auā o mea ia e ‘ave matou te ‘au‘auna ai i le ALI‘I lo matou Atua, matou te lē iloa fo‘i mea matou te ‘au‘auna ai i le ALI‘I se‘ia matou o‘o atu ai.”
27 A ‘ua fa‘ama‘a‘a e le ALI‘I le loto o Farao, e lē mafai fo‘i o ia ‘ona tu‘uina mai o i latou e ō.
28 ‘Ona fai mai lea o Farao ‘iā te ia, “Alu ‘ese ia oe ‘iā te a‘u, ia oe lava, ne‘i tā toe feiloa‘i ma oe; auā o le aso tā te feiloa‘i ai ma oe, ‘e te oti ai lava.”
29 ‘Ona tali atu lea o Mose, “E moni lava lau fetalaiga, tā te lē toe feiloa‘i ma oe.”