1 ‘Ona fetalai mai lea o le ALI‘I ‘iā Mose, ‘ua fa‘apea mai,
2 Fa‘auta, ‘ua ‘ou vala‘auina i lona lava igoa, o Pesaleli le atali‘i o Auri, o le atali‘i lea o Huro, o le itū‘āiga o Iuta.
3 ‘Ua ‘ou fa‘atumuina fo‘i o ia i le Agaga o le Atua, i le poto, ma le fa‘autauta, ma le iloa lelei e fai ai galuega uma lava;
4 ‘ina ‘ia mafaufau o ia i galuega faigatā; ‘ina ‘ia galue o ia i le auro, ma le ario, ‘atoa ma le ‘apamemea;
5 e togitogi fo‘i i ma‘a, e fa‘amau ai, e togitogi fo‘i i la‘au, e fai ai galuega uma lava.
6 Fa‘auta fo‘i, ‘ua ‘ou tu‘uina atu ‘iā te ia, o Aliavu le atali‘i o Aisamako, o le itū‘āiga o Tanu; ‘ua ‘ou tu‘u fo‘i le poto i loto o ē popoto uma lava, ‘ina ‘ia latou faia o mea ‘atoa uma ‘ua ‘ou fai atu ai ‘iā te oe.
7 O le fale fetāfa‘i o le fa‘apotopotoga, ma le ‘atola‘au o le tulafono, ma le nofoa o le alofa e i ona luga, ma mea uma o le fale fetāfa‘i;
8 o le la‘o‘ai ma ana mea uma, o le tu‘ugālamepa auro lelei ma ana mea uma, ma le fata e mū ai mea manogi;
9 o le fata e fai ai taulaga mū ma ana mea uma lava, o le tā‘elega ma lona tulaga;
10 ma ‘ie o mea e fai a‘i tapua‘iga, ma ‘ofu sa o le ositaulaga o Arona, o ‘ofu fo‘i o ona atali‘i e fai ai le faiva o ositaulaga;
11 o le u‘u fo‘i e fa‘au‘u ai, ma le mea manogi lelei e mū mo le mea pa‘ia; fa‘apei o mea uma ‘ua ‘ou fai atu ai ‘iā te oe, ‘ia latou faia lava.
12 ‘Ua fetalai mai fo‘i le ALI‘I ‘iā Mose, ‘ua fa‘apea mai,
13 ‘Ia e fai atu i le fānauga a Isaraelu, ‘ia fa‘apea atu i ai, “Tou te tausi lava i o‘u sapati, auā o le fa‘ailoga lea ‘iā te a‘u ma ‘outou, e o‘o ‘iā ‘outou tupulaga amulī, ‘ina ‘ia iloa ai, o a‘u nei o le ALI‘I, o lē fa‘apa‘iaina ‘outou.
14 ‘Ia ‘outou tausi i le sapati, auā e pa‘ia lava ia ‘iā te ‘outou; o lē na te solia, ‘ia fasiotia lava o ia; auā ai se tasi e fai ai se galuega, ‘ia vavae‘eseina lea i lona nu‘u.
15 E ono aso e fai ai galuega a o le aso fitu o le sapati lea e mālōlō ai, e pa‘ia i le ALI‘I; ai se tasi e fai ai sana galuega i le aso sapati e fasiotia lava o ia.
16 ‘Ia tausi e le fānauga a Isaraelu i le sapati, e fai ma sapati ‘iā ‘outou tupulaga amulī, o le feagaiga e fa‘avavau,
17 O le fa‘ailoga lea e fa‘avavau ‘iā te a‘u ‘atoa ma le fānauga a Isaraelu auā o aso e ono na fai ai e le ALI‘I le lagi ‘atoa ma le lalolagi; a o le aso fitu na ia mālōlō ai ma mapu ai.”
18 ‘Ua uma atu ana fetalaiga ‘iā Mose i le mauga o Sinai, ‘ona avatu ai lea e ia ‘iā te ia o papa e lua o le tulafono, o papa ma‘a lava na tusia e le ‘a‘ao o le Atua.