1 ‘Ona fetalai lea o le ALI‘I ‘iā Mose, o lo‘o fa‘apea mai:
2 ‘Ia fa‘asāina mo a‘u o ulumatua uma lava, e ta‘itasi uma lava e mua‘i fānau mai i le fānauga a Isaraelu, o tagata ‘atoa ma manu, e fai lava ia mo a‘u.
3 ‘Ua fai atu fo‘i Mose i le nu‘u, “‘Ia manatua lenei aso, na ‘outou ō mai ai nai Aikupito o le mea sa nofo pologa ai; auā o le ‘a‘ao malosi ‘ua ‘aumai ai ‘outou e le ALI‘I; ‘aua ne‘i ‘aina ai se mea e fa‘afefeteina.
4 O le aso nei ‘ua ‘outou ō mai ai i le masina o Apipa.
5 A uma ‘ona fa‘a‘o‘otia oe e le ALI‘I i le nu‘u o sa Kanana, ma sa Hetī, ma sa Amorī, ma sa Hivī, ma sa Iepusē, na ia tautō ai i ou tamā, e avatu ‘iā te oe, o le nu‘u o lo‘o tafe ai le suāsusu ma le meli, ‘ia e ‘au‘auna mai lava i lenei sauniga i lenei lava masina.
6 O aso e fitu ‘e te ‘ai ai areto e lē fa‘afefeteina; o lona aso e fitu fo‘i ‘e te fai ai le tausamiga i le ALI‘I.
7 ‘Ia ‘aina le areto e lē fa‘afefeteina i aso e fitu; ‘ae ‘aua ne‘i iloa ‘iā te oe se mea e fa‘afefeteina, ‘aua fo‘i ne‘i iloa ‘iā te oe sina mea e fa‘afefete a‘i i lou nu‘u uma lava.
8 ‘E te fa‘aali atu fo‘i i lou atali‘i i lea aso, e fa‘apea atu, ‘E fai lenei mea ‘ona o le mea na faia e le ALI‘I ‘iā te a‘u, ‘ina ‘ua ia ‘aumaia a‘u nai Aikupito.’
9 E fai fo‘i ma fa‘ailoga ‘iā te oe i lou lima, ma fa‘amanatuga i le vā o ou mata ‘ina ‘ia i ai i lou gutu le tulafono a le ALI‘I; auā o le ‘a‘ao malosi na ta‘ita‘iina mai ai oe e le ALI‘I nai Aikupito.
10 ‘Ia e tausiusi fo‘i i lenei sauniga i ona aso ‘ua tofia i lea tausaga ma lea tausaga.
11 “A uma ‘ona fa‘a‘o‘otia oe e le ALI‘I i le nu‘u o sa Kananā, e tusa ma le mea na ‘ia tautō ai ‘iā te oe ma ou tamā, e avatua ‘iā te oe;
12 ‘ona e tu‘uina atu lea i le ALI‘I o i latou uma o ē mua‘i fānau mai, ‘atoa uma ma le mua‘i fānau mai i au manu, o tane lava e tu‘uina atu i le ALI‘I.
13 A o le ulua‘i fānauga a asini uma, ‘ia e sui a‘i i se tama‘i mamoe; ‘āfai fo‘i ‘e te lē suia, ‘ia e vavae lona ua; o ulumatua uma lava a tagata i lau fānau, ‘ia e avatu ai sona sui.
14 A fesili mai lou atali‘i ‘iā te oe i se aso, e fa‘apea mai, ‘Se a ‘ea lenei?’ ‘Ona e tali atu lea ‘iā te ia, ‘O le ‘a‘ao malosi na ta‘ita‘iina mai ai i matou e le ALI‘I nai Aikupito, o le mea sa nofo pologa ai.
15 Auā na lē mafai e Farao ‘ona tu‘uina mai i matou e ō; ‘ona fasiotia lea e le ALI‘I o ulumatua uma lava i le nu‘u o Aikupito, o le ulumatua a tagata ‘atoa ma ulumatua a manu; o le mea lea ‘ou te fai ai le taulaga i le ALI‘I i manu po‘a uma lava e mua‘i fānau mai, a o ulumatua uma lava a la‘u fānau ‘ou te avatu ai se sui.’
16 E fai fo‘i ma fa‘ailoga i lou lima, ma pale i le vā o ou mata; auā o le ‘a‘ao malosi na ta‘ita‘iina ai tatou e le ALI‘I nai Aikupito.”
17 Na tu‘uina mai e Farao le nu‘u e ō, ‘ona lē ta‘ita‘iina lea o i latou e le Atua i le ala o le nu‘u o Filisitia, e ui lava ‘ina latalata lea; auā na fetalai ane le Atua, “Ne‘i salamō le nu‘u pe a latou iloa le tau‘a, ‘ona latou toe fo‘i atu lea i Aikupito.”
18 A ‘ua fa‘ata‘amiloina le nu‘u e le Atua i le ala e ui ai i le vao i le sami Ulaula; na ō a‘e fo‘i le fānauga a Isaraelu nai le nu‘u o Aikupito fa‘aau o tau‘a.
19 ‘Ua ‘ave fo‘i e Mose o ivi o Iosefa, auā na matuā tautō le fānauga a Isaraelu, ‘ina ‘ua fai atu ai o ia, o lo‘o fa‘apea mai, “E asiasi mai lava le Atua ‘iā te ‘outou, tou te ‘ava‘e fo‘i o‘u ivi a‘i le mea nei.”
20 ‘Ona latou ō lea i la latou malaga nai Sukota, ‘ua tolauapi i Etama i le pito vao.
21 ‘Ua afio le ALI‘I i o latou luma i le ao fa‘aniutū i le ao, e ta‘ita‘iina ai i latou i le ala, a o le afi fa‘aniutū i le po e fa‘amalamalama a‘i i latou, ‘ina ‘ia sāvavali i le ao ‘atoa ma le po.
22 E le‘i ‘ave‘esea e ia le ao fa‘aniutū i le ao, ma le afi fa‘aniutū i le po i luma o le nu‘u.