1 ‘Ua fetalai mai fo‘i le ALI‘I ‘iā Mose, o lo‘o fa‘apea mai,
2 “‘Ia e fai atu i le fānauga a Isaraelu, ‘ia latou liliu ane ma tolauapi e feagai ma Peairota i le vā o Mekatala ma le sami e feagai ma Paalasefona, tou te tolauapi i ona luma e lata ane i le sami.
3 ‘Ae fai ane Farao i le fānauga a Isaraelu, ‘‘Ua femēmēa‘i i latou i le nu‘u, ‘ua punitia i latou i le vao.’
4 ‘Ou te fa‘ama‘a‘a le loto o Farao, na te tuliloa mai ai ‘iā i latou, e fai ai so‘u vi‘iga ‘iā Farao ‘atoa ma lana itū ta‘ua uma lava; ‘ona iloa ai lea e Aikupito, o a‘u nei lava o le ALI‘I.” ‘Ua fa‘apea lava ‘ona latou faia.
5 ‘Ona ta‘uina atu lea i le tupu o Aikupito, ‘ua sōsōla le nu‘u; ‘ona toe liliuina lea o le loto o Farao, ma ana ‘au‘auna i le nu‘u; ‘ua latou fai ane fo‘i, “Se a le mea ‘ua tatou fai ai lenei mea, ‘ina ‘ua tatou tu‘uina atu o Isaraelu e ō, ‘ia lē ‘au‘auna mai ‘iā i tatou?”
6 ‘Ona sauni lea o lona kariota, ‘ua latou ō ma lona nu‘u.
7 ‘Ua ia ‘ave fo‘i kariota ‘ua sili ‘ona lelei, e ono selau, ma kariota uma lava o Aikupito, e ta‘itasi ma ona tagata totoa.
8 ‘Ua fa‘ama‘a‘a e le ALI‘I le loto o Farao le tupu o Aikupito, ‘ua ia tuliloa mai le fānauga a Isaraelu; ‘ua ō atu fo‘i le fānauga a Isaraelu ma le lima malosi.
9 A ‘ua tuliloa mai Aikupito ‘iā i latou, ‘ua latou maua mai fo‘i i latou, o lo‘o tolauapi e lata ane i le sami, (o solofanua uma ma kariota o Farao, ma ana ‘au e ti‘eti‘e i solofanua, ma lana itūtau‘a,) e lata ane i Peairota, e feagai ma Paalasefona.
10 ‘Ua fa‘alatalata i ai Farao, ‘ona tepa a‘e lea o le fānauga a Isaraelu, fa‘auta, o Aikupito o lo‘o mulimuli mai ‘iā i latou; ‘ona latou matua matata‘u ai lea, ‘ua ‘alalaga fo‘i le fānauga a Isaraelu i le ALI‘I.
11 ‘Ua latou fai mai fo‘i ‘iā Mose, “‘Ona ‘ua leai ‘ea ni tu‘ugamau i Aikupito, na e ‘aumaia ai i matou ‘ina ‘ia matou oti i le vao? Se a le mea na e fai ai lenei mea ‘iā i matou, ‘ina ‘ua e ‘aumaia i matou nai Aikupito?
12 E lē o le mea ‘ea lenei na matou fai atu ai ‘iā te oe i Aikupito, o lo‘o fa‘apea atu, ‘‘Ia e tu‘u pea ‘iā i matou, ‘ina ‘ia matou ‘au‘auna ‘iā Aikupito; auā e lelei ‘ona matou ‘au‘auna ‘iā Aikupito, ‘ae leaga ‘ona matou oti i le vao.’”
13 ‘Ona tali atu lea o Mose i le nu‘u, “‘Aua tou te fefefe, a ‘ia ‘outou laulau tutū ma va‘ai atu i le olataga mai le ALI‘I, o le a faia e ia mo ‘outou i le aso nei; auā o Aikupito ‘ia tou te va‘ai atu i ai i le aso nei, tou te lē toe iloa lava i latou e fa‘avavau.
14 O le a tau le ALI‘I mo ‘outou, ‘ae fa‘alologo ‘outou.”
15 ‘Ona fetalai mai lea o le ALI‘I ‘iā Mose, “Se a le mea ‘ua e ‘alaga mai ai ‘iā te a‘u. Fai atu i le fānauga a Isaraelu, ‘ia latou ō atu pea ia;
16 a o oe, ‘ia e si‘i i luga lou to‘oto‘o, ma fa‘aloaloa lou lima i luga o le sami, ma e vaeluaina ai; ō atu ai le fānauga a Isaraelu i totonu o le sami, i le ‘iliti tai matūtū.
17 O a‘u fo‘i, fa‘auta, ‘ou te fa‘ama‘a‘aina loto o Aikupito, latou te mulimuli atu fo‘i ‘iā te i latou, e vi‘ia fo‘i a‘u ‘ona o Farao, ma lana itūtau‘a uma lava, ma ona kariota, ‘atoa ma ana ‘au e ti‘eti‘e i solofanua.
18 ‘Ona iloa lea o Aikupito, o a‘u lava o le ALI‘I, pe a vi‘ia a‘u ‘ona o Farao, ma ona kariota, ‘atoa ma ana ‘au e ti‘eti‘e i solofanua.”
19 ‘Ona alu ane lea o le agelu a le Atua, o lē na muamua atu i ‘au a Isaraelu, ‘ua alu ane, ‘ua mulimuli atu ‘ia te i latou; o le ao fa‘aniutū fo‘i ‘ua alu ane nai o latou luma, ‘ua tu i o latou tua.
20 ‘Ua ia ui ane fo‘i i le vā o ‘au a Aikupito ma ‘au a Isaraelu, ‘ua fai ma ao ma le pouliuli i tua, a o le malamalama i le po i luma; o le mea lea na lē fa‘alatalata ai le tasi i le tasi i lea po ‘atoa.
21 ‘Ona fa‘aloaloa lea e Mose o lona lima i luga o le sami, ‘ona fa‘atafe‘eseina lea e le ALI‘I o le sami i le matagi tele mai sasa‘e i lea po ‘atoa; ‘ua ia faia fo‘i le sami ma ‘ele‘ele matūtū, ‘ua vaeluaina lava le sami.
22 ‘Ona ui atu lea o le fānauga a Isaraelu i totonu o le sami i le ‘iliti tai matūtū; ‘ua fai fo‘i le sami ma ‘aupā ‘iā te i latou i lo latou itū taumatau, ma lo latou itū tauagavale.
23 ‘Ona tuliloa mai lea o Aikupito, ‘ua mulimuli mai ‘iā te i latou i totonu o le sami o solofanua uma lava a Farao, ma ona kariota, ma ana ‘au e ti‘eti‘e i solofanua.
24 ‘Ona o‘o lea i le leoleoga o le taeao, ‘ua silasila ifo le ALI‘I i ‘au a Aikupito nai le afi ma le ao fa‘aniutū, ‘ua ia fa‘aatuatuvaleina ‘au a Aikupito.
25 ‘Ua ia tu‘u ‘ese fo‘i o mea e ta‘avalevale a‘i o latou kariota, ‘ona toso gatā ai lea; ‘ona fai ane lea o Aikupito, “‘Inā tatou sōsōla ‘ese ia ‘iā Isaraelu; auā o le ALI‘I o lo‘o tau ma Aikupito mo i latou.”
26 ‘Ona fetalai mai lea o le ALI‘I ‘iā Mose, “‘Inā fa‘aloaloa ia lou lima i luga o le sami, e fo‘i atu ai lona suāsami i luga o Aikupito, i luga o ona kariota, ma ana ‘au e ti‘eti‘e i solofanua.”
27 ‘Ona fa‘aloaloa lea e Mose o lona lima i luga o le sami, ‘ona fo‘i atu lea o le sami i le vave ao i lona tūga tuai; ‘ua sola ‘ese ai Aikupito i lona fetaia‘iga; a ‘ua lafoina e le ALI‘I o Aikupito i totonu o le sami.
28 ‘Ua fo‘i le suāsami, ‘ua ufitia ai kariota, ma ‘au na ti‘eti‘e i solofanua, o le itū tau‘a ‘atoa uma a Farao, o ē na mulimuli atu ‘iā te i latou i le sami; e leai se tasi na toe o i latou.
29 A o le fānauga a Isaraelu, na latou sāvavali i le ‘iliti tai matūtū i totonu o le sami; ‘ua fai fo‘i le suāsami ma ‘aupā ‘iā te i latou i lo latou itū taumatau ma lo latou itū tauagavale.
30 Sa fa‘aola e le ALI‘I i lea aso ‘iā Isaraelu nai lima o Aikupito ‘ua iloa fo‘i e Isaraelu tagata Aikupito i le matāfaga, ‘ua oti.
31 ‘Ua iloa fo‘i e Isaraelu le vāvega na faia e le ALI‘I ‘iā Aikupito, ‘ona matata‘u lea o le nu‘u i le ALI‘I; ‘ua latou fa‘atuatua fo‘i i le ALI‘I, ‘atoa ma lana ‘au‘auna o Mose.