1 Sa leoleo Mose i le lafu mamoe o le tamā o lana avā, o Ietero le ositaulaga i Mitiana; ‘ua ia ta‘ita‘iina ane le lafu mamoe i ona tala atu o le vao, ‘ua o‘o lava i le mauga o le Atua, o Horepa.
2 ‘Ua fa‘aali mai ai ‘iā te ia le agelu a le ALI‘I i le afi mumū i totonu o le la‘au talatala; ‘ona va‘ai atu lea o ia, fa‘auta, o lo‘o mū lava le la‘au talatala i le afi, ‘ae le‘i fa‘aumatia le la‘au talatala.
3 ‘Ona fa‘apea lea o Mose, “‘Ou te afe atu, ma a‘u maimoa i lenei mea ‘ou te va‘ai ‘ua ‘ese lava, pe fa‘apefea ‘ona lē susunuina o le la‘au talatala.”
4 ‘Ua silafia e le ALI‘I ‘ua afe ane ia e maimoa, ‘ona vala‘au mai lea o le Atua ‘iā te ia nai totonu o le la‘au talatala, ‘ua fetalai mai, “Mose, Mose e,”‘Ona fai atu lea o ia, “O a‘u lenei.”
5 ‘Ona fetalai mai lea, “‘Aua ‘e te fa‘alatalata mai ‘i‘inei; ‘inā tō ‘ese ia ou se‘evae i ou vae, auā ‘ua sa lava le ‘ele‘ele o lo‘o e tu ai nei.”
6 ‘Ua ia fa‘apea mai fo‘i, “O a‘u o le Atua o lou tamā o le Atua o Aperaamo, o le Atua o Isaako, o le Atua fo‘i o Iakopo.” ‘Ona ufitia lea e Mose o ona mata, auā ‘ua fefe i va‘ai atu i le Atua.
7 ‘Ona fetalai mai lea o le ALI‘I, “‘Ua ‘ou matuā va‘ai atu i le puapuagā o lo‘u nu‘u o lo‘o i Aikupito, ‘ua ‘ou fa‘alogo fo‘i i lo latou ‘alaga ‘ona o ē pule fa‘asauā ‘iā i latou, ‘ua ‘ou iloa fo‘i lo latou tigā.
8 O lenei, ‘ua ‘ou alu ifo, ‘ou te lavea‘i mai ‘iā te i latou a‘i lima o Aikupito, ma ‘ou ‘aveina a‘e i latou a‘i lea nu‘u i le nu‘u lelei ma le lautele, o le nu‘u e tafe ai le suāsusu ma le meli, o le mea e i ai sa Kananā, ma sa Hetī, ma sa Amorī, ma sa Perisē, ma sa Hivī, ‘atoa ma sa Iepusē.
9 O lenei, fa‘auta, ‘ua o‘o mai ‘iā te a‘u le ‘alaga o le fānauga a Isaraelu, ‘ua ‘ou va‘ai atu lava i le sauāga o lo‘o fa‘asauā ai Aikupito ‘iā te i latou.
10 O lenei, ‘inā sau ia, ‘ou te ‘auina atu oe ‘iā Farao, ‘ina ‘ia e ‘aumai lo‘u nu‘u o le fānauga a Isaraelu mai Aikupito.”
11 ‘Ona fai atu lea o Mose i le Atua, “O ai ‘ea a‘u nei, ‘ou te alu atu ai ‘iā Farao ma a‘u ‘aumaia le fānauga a Isaraelu mai Aikupito?”
12 ‘Ona fetalai mai lea o ia, “‘Ou te ‘iā te oe lava; o lenei fo‘i le fa‘ailoga ‘iā te oe ‘ua ‘ou ‘auina atu oe, pe a e ‘aumai le nu‘u mai Aikupito, tou te ‘au‘auna ai i le Atua i lenei mauga.”
13 ‘Ua fai atu Mose i le Atua, “Fa‘auta, pe a a‘u alu i le fānauga a Isaraelu, ma a‘u fai atu ‘iā i latou, ‘‘Ua ‘auina mai a‘u ‘iā te ‘outou e le Atua o ‘outou tamā;’ ‘ona latou fai mai lea ‘iā te a‘u, ‘O ai ‘ea lona suafa?’ Se a ‘ea sa‘u e fai atu ai ‘iā te i latou?”
14 ‘Ona fetalai mai lea o le Atua ‘iā Mose, “O A‘U O LĒ OLA, O LO‘O OLA LAVA;” ‘ua ia fetalai mai fo‘i, “‘E te fai atu i le fānauga a Isaraelu, ‘ia fa‘apea ‘O A‘U O LĒ OLA, o ia na ‘auina mai a‘u ‘iā te ‘outou.’”
15 ‘Ua toe fetalai mai fo‘i le Atua ‘iā Mose, “‘Ia fa‘apea ‘ona e fai atu i le fānauga a Isaraelu, ‘‘Ua ‘auina mai a‘u ‘iā te ‘outou e le ALI‘I le Atua o ‘outou tamā, o le Atua o Aperaamo, o le Atua o Isaako, o le Atua fo‘i o Iakopo’:O lo‘u igoa lenā e fa‘avavau,o la‘u fa‘amanatuga lenā i lea tupulaga ma lea tupulaga.
16 Alu ia ma e fa‘apotopoto i toeaina o Isaraelu, ma fai atu ‘iā te i latou, ‘‘Ua fa‘aali mai ‘iā te a‘u le ALI‘I, le Atua o ‘outou tamā, o le Atua o Aperaamo, ma Isaako, ma Iakopo, o lo‘o fa‘apea mai, ‘Ua ‘ou matuā asiasi atu lava ‘iā te ‘outou ‘atoa ma le mea ‘ua faia ‘iā ‘outou i Aikupito.
17 ‘Ua ‘ou fa‘apea, ‘Ou te ‘aveina a‘e ‘outou ai le puapuagā o i Aikupito e ō atu i le nu‘u o sa Kananā, ma sa Hetī, ma sa Amorī, ma sa Perisē, ma sa Hivī, ma sa Iepusē, o le nu‘u o lo‘o tafe ai le suāsusu ma le meli.’
18 E fa‘alogo lava i latou i lau ‘upu; tou te ō fo‘i, o oe ma toeaina o Isaraelu i le tupu o Aikupito, tou te fai atu fo‘i ‘iā te ia, ‘‘Ua fetaia‘i ma i matou o le ALI‘I, o le Atua o sa Eperū o lenei, se‘i e tu‘u mai matou te ō malaga e tolu ona aso i le vao, matou te fai ai taulaga i le ALI‘I lo matou Atua.’
19 A ‘ua ‘ou iloa lava e lē tu‘uina mai ‘outou e le tupu o Aikupito ‘ina ‘ia ō, se‘i ‘iloga o le lima malosi;
20 a ‘ou te fa‘ao‘o atu lo‘u lima ma ‘ou taia Aikupito i ‘ou vāvega uma lava ‘ou te faia i ai; mulimuli ane na te tu‘uina atu ‘outou e ō.
21 ‘Ou te, fa‘atupuina fo‘i le alofa o Aikupito i lenei nu‘u, a o‘o ‘ina ‘outou ō tou te lē ō fua;
22 ‘ae ta‘itasi le fafine ma ole atu i lē o tuā‘oi ma ia, ma lē o nofo i lona fale, i mea ario, ma mea auro, ma ‘ofu, tou te fa‘a‘ofu a‘i i o ‘outou atali‘i ma ‘outou afafine, tou te fa‘amativaina ai Aikupito.”