1 ‘Ua fetalai mai le ALI‘I ‘iā Mose, “‘Inā alu ia ‘iā Farao ma fai atu ‘iā te ia, ‘O lo‘o fa‘apea ‘ona fetalai mai o le ALI‘I; ‘ia e tu‘u mai lo‘u nu‘u e ō, ‘ina ‘ia latou ‘au‘auna mai ‘iā te a‘u.
2 ‘Āfai fo‘i ‘e te lē mafai ‘ona tu‘u mai o i latou e ō, fa‘auta, ‘ou te taia lou nu‘u uma lava i rane.
3 E tutupu tele mai o rane i le vaitafe; e a‘e mai, ma ulufale i lou fale, i lou afeafe moe, ma lou moega, ma le mea ‘e te ta‘oto ai, o fale fo‘i o au ‘au‘auna, ‘atoa ma lou nu‘u, o au ‘ogāumu fo‘i, ma au mea e palu ai falaoa;
4 e ō a‘e rane i luga ‘iā te oe, ma luga o lou nu‘u, ma luga o au ‘au‘auna uma lava.’”
5 ‘Ua fetalai mai fo‘i le ALI‘I ‘iā Mose, “‘E te fai atu ‘iā Arona; ‘‘inā fa‘aloaloa ia lou lima e i ai lou to‘oto‘o i luga o vaitafe, ma vaitai, ma vailepa, ma ia fa‘aa‘e mai rane i le nu‘u o Aikupito.’”
6 ‘Ona fa‘aloaloa lea e Arona o lona lima i vai o Aikupito, ‘ona a‘e mai ai lea o rane, ‘ua lilo ai lava le nu‘u o Aikupito.
7 ‘Ua fa‘apea ‘ona fai fo‘i e taulāitu ‘iā latou togafiti fa‘ataulāitu; ‘ua fa‘aa‘e fo‘i e i latou o rane i le nu‘u o Aikupito.
8 ‘Ona vala‘au lea o Farao ‘iā Mose ma Arona, ‘ua fai mai, “‘Inā fa‘atoga ia ‘oulua i le ALI‘I ‘ia ‘ave ‘ese e ia o rane ‘iā te a‘u ma lo‘u nu‘u, ‘ona ‘ou tu‘u atu lea o le nu‘u e ō, ‘ina ‘ia latou fai taulaga i le ALI‘I.”
9 ‘Ua tali atu Mose ‘iā Farao, “‘Ia e fa‘atonu mai ‘iā te a‘u, po o afea ‘ou te fa‘atoga atu ai mo oe, ma au ‘au‘auna, ma lou nu‘u, ‘ia fa‘aumatia ai rane o ‘iā te oe ma ou fale, ‘ina ‘ia gata i le vaitafe ‘ona i ai?”
10 ‘Ua fai mai o ia, “O a taeao;”‘Ona fai atu lea o Mose, “E faia fa‘apei o lau afioga, ‘ina ‘ia e silafia, e leai se tasi e tusa ma le ALI‘I lo matou Atua;
11 e mavae atu rane o ‘iā te oe, ma ou fale, ma au ‘au‘auna ma lou nu‘u, na o le vaitafe e gata ai.”
12 ‘Ona ō i fafo lea o Mose ma Arona nai ‘iā Farao; ‘ua ‘alaga atu fo‘i Mose i le ALI‘I ‘ona o rane ‘ua ia tu‘uina atu ai ‘iā Farao.
13 ‘Ona faia lea e le ALI‘I e tusa ma le ‘upu a Mose; ‘ua mamate ai rane nai o latou fale, ma faoa ‘a‘ai, ‘atoa ma fanua.
14 ‘Ua latou fa‘apotopoto ai fo‘i i faupuega rane, ‘ua elo ai le nu‘u.
15 ‘Ua iloa e Farao, ‘ua nā maua sina mapu, ‘ona fa‘ama‘a‘a ai lea e ia o lona loto ma na lē fa‘alogo ‘iā te i lā‘ua, fa‘apei ‘ona fetalai mai ai o le ALI‘I.
16 ‘Ona fetalai mai lea o le ALI‘I ‘iā Mose, “‘Ia e fai atu ‘iā Arona, ‘fa‘aloaloa ia lou to‘oto‘o, ma tā a‘i le efuefu o le fanua, ‘ina ‘ia liu ‘utu i le nu‘u uma lava o Aikupito.’”
17 Na la faia fo‘i fa‘apea, na fa‘aloaloa e Arona lona lima sa i ai lona to‘oto‘o, na ia tā i le efuefu o le fanua, i le ‘ua fai ma ‘utu i tagata ‘atoa ma manu; ‘ua liu ‘utu o le efuefu uma lava o le fanua i le nu‘u uma lava o Aikupito.
18 ‘Ua fa‘apea ‘ona fai fo‘i e taulāitu ‘iā latou togafiti fa‘ataulāitu, ‘ina ‘ia tutupu a‘e o ‘utu, ‘ae lē mafaia; sa i ai fo‘i o ‘utu i tagata ‘atoa ma manu.
19 ‘Ona fai atu lea o taulāitu ‘iā Farao, “O le ‘a‘ao lenei o le Atua.” A ‘ua ma‘a‘a pea le loto o Farao, e le‘i fa‘alogo o ia ‘iā te i lā‘ua, fa‘apei ‘ona fetalai mai ai o le ALI‘I.
20 ‘Ua fetalai mai fo‘i le ALI‘I ‘iā Mose, “‘Ia e ala usu atu i le taeao, ma ‘ia e tu i luma o Farao; fa‘auta, o le a alu ane o ia i le vai, ma ‘ia e fai atu ‘iā te ia, ‘O lo‘o fa‘apea ‘ona fetalai mai o le ALI‘I, tu‘u mai ia lo‘u nu‘u e ō, ‘ina ‘ia latou ‘au‘auna mai ‘iā te a‘u;
21 auā a e lē mafai ‘ona tu‘u mai lo‘u nu‘u e ō, ‘ona ‘ou ‘auina atu lea ‘iā te oe, ma au ‘au‘auna, ma lou nu‘u, ma ou fale, o le vao garova; e tūtūmu fo‘i fale o Aikupito ‘atoa ma le lau‘ele‘ele o i ai latou i garova.
22 ‘Ou te vavae ‘ese fo‘i i lea lava aso o le lau‘ele‘ele o Kosena e i ai lo‘u nu‘u, ‘ina ‘ia lē o‘o i ai ni garova, ‘ina ‘ia e iloa ai o a‘u lava o le ALI‘I le pule i le lalolagi.
23 ‘Ou te tu‘u ai fo‘i se tuā‘oi i le vā o lo‘u nu‘u ma lou nu‘u; e fai lava lenei fa‘ailoga a taeao.’”
24 ‘Ona fa‘apea lava lea ‘ona fai e le ALI‘I, ‘ua o‘o mai ai garova e tele lava i le fale o Farao, ma fale o ana ‘au‘auna, ma le nu‘u ‘atoa uma o Aikupito; ‘ua leaga le nu‘u ‘ona o le vao garova.
25 ‘Ona vala‘au lea o Farao ‘iā Mose ma Arona, ‘ua fai mai i ai, “‘Inā ō ia ‘outou, ma fai taulaga i lo ‘outou Atua i le nu‘u lenā.”
26 A ‘ua fai atu Mose, “E lē tatau ‘ona matou faia fa‘apea; auā o mea e ‘inosia e Aikupito, o le a matou fai a‘i taulaga i le ALI‘I lo matou Atua; fa‘auta, a matou fai a‘i taulaga i mea e ‘inosia e Aikupito i o latou lava luma, latou te lē fetogi mai ‘ea ‘iā te i matou i ma‘a?
27 Matou te ō malaga i aso e tolu i le vao, matou te fai taulaga ai i le ALI‘I lo matou Atua, fa‘apei ‘ona fetalai mai ai o ia ‘iā te i matou.”
28 ‘Ona fai mai lea o Farao, “‘Ou te tu‘uina atu ‘outou e ō, ‘ina ‘ia ‘outou fai taulaga i le ALI‘I lo ‘outou Atua i le vao; tau lava ‘ina ne‘i ‘outou ō mamao; ‘ia ‘oulua fa‘atoga mo a‘u.”
29 ‘Ua tali atu Mose, “Fa‘auta, ‘ou te alu ‘ese nei ‘iā te oe, ‘ou te fa‘atoga atu fo‘i i le ALI‘I ‘ina ‘ia ‘ave‘esea le vao garova ‘iā Farao, ma ana ‘au‘auna, ma lona nu‘u o a taeao; tau lava ‘ina ne‘i toe pepelo Farao i lona lē tu‘uina mai le nu‘u e ō e fai taulaga i le ALI‘I.”
30 ‘Ona alu ‘ese lea o Mose ‘iā Farao, ‘ua na fa‘atoga atu fo‘i i le ALI‘I.
31 ‘Ua fai fo‘i e le ALI‘I e tusa ma le ‘upu a Mose, ‘ua ‘ave ‘ese le vao garova ‘iā Farao, ma ana ‘au‘auna, ma lona nu‘u, ‘ua lē toe ai se tasi.
32 A ‘ua toe fa‘ama‘a‘a e Farao i lona loto i lenei mea, ‘ua na lē tu‘uina mai lava le nu‘u e ō.