1 ‘Ua iloa e le nu‘u ‘ua fa‘atuatuai ‘ona alu ifo o Mose nai le mauga, ‘ona fa‘apotopoto mai lea o le nu‘u ‘iā Arona, ma latou fai atu ‘iā te ia, “Tu ia oe i luga, ‘ia e faia se atua mo i tatou, na te muamua atu ‘iā i tatou; auā o lenā Mose, o le tagata na ‘aveina a‘e i tatou nai le nu‘u o Aikupito, tatou te le‘i iloa pe se a se mea ‘ua o‘o ‘iā te ia.”
2 ‘Ona fai mai lea o Arona ‘iā i latou, “‘Ia ‘outou motusi ‘ese o mama auro o i taliga o a ‘outou avā, ma o ‘outou atali‘i, ma o ‘outou afafine, ma ‘aumaia ‘iā te a‘u.”
3 ‘Ona motusi ‘ese lea e le nu‘u uma o mama auro sa i o latou taliga ma avatu ‘iā Arona.
4 ‘Ua talia e ia nai ‘iā te i latou, ‘ua na gaosi ai i le tofi, ‘ua fai ai le tama‘i povi auro.‘Ona ia fai atu lea ‘iā i latou, “Isaraelu e, o lou atua lenei, o lē na ‘aveina a‘e oe nai le nu‘u o Aikupito.”
5 ‘Ua va‘ai atu i ai Arona, ‘ona ia faia lea o le fatafaitaulaga i ona luma; ‘ona ‘alaga atu lea o Arona, ‘ua fa‘apea atu, “O le a fai le tausamiga i le ALI‘I a taeao.”
6 ‘Ua latou tula‘i i le taeao lava, ‘ua fai taulaga mū, na latou avatua taulaga fa‘afetai; ona nonofo lea o le nu‘u i lalo e ‘a‘ai ma inu, ‘ona tutū lea i luga e sisiva.
7 ‘Ona fetalai mai lea o le ALI‘I ‘iā Mose, “Alu ia oe i lalō; auā o lou nu‘u, na e ‘aveina a‘e nai le nu‘u o Aikupito, ‘ua leaga lava i latou;
8 ‘ua vave ‘ona latou ō ‘ese i le ala na ‘ou poloa‘i atu ai ‘iā te i latou, ‘ua latou faia le tama‘i povi auro mo i latou, ‘ua latou ifo i ai, ma fai taulaga i ai; o lo‘o fa‘apea ane fo‘i i latou, ‘Isaraelu e, o lou atua lenei, o lē na ‘aveina a‘e oe nai le nu‘u o Aikupito.’”
9 ‘Ua fetalai mai fo‘i le ALI‘I ‘iā Mose, “‘Ua ‘ou va‘ai atu i lenei nu‘u, fa‘auta fo‘i, o le nu‘u ‘ua ma‘a‘a lava le ua;
10 o lenei, tu‘u mai ia o a‘u, ‘ina ‘ia tupu tele lo‘u ita ‘iā te i latou, ‘ina ‘ia ‘ou fa‘aumatia i latou; a ‘ou te faia oe ma nu‘u tele.”
11 A ‘ua matuā fa‘atoga o Mose i lona Atua o le ALI‘I; ‘ua ia fai atu i ai, “Le ALI‘I e, se a le mea e tupu tele ai lou to‘asā i lou nu‘u na e ‘aumai nai le nu‘u o Aikupito i le mana tele ma le ‘a‘ao malosi?
12 Se a le mea e tautala ai Aikupito, e fa‘apea ane, ‘Na ia ‘aveina atu i latou ‘ina ‘ia malaia, ma ia fasioti ‘iā te i latou i mauga, ma ‘ia fa‘auma ‘iā i latou a‘i le fogā‘ele‘ele?’ ‘Ia e liliu‘eseina lou to‘asā tele, ma ‘ia e salamō i le leaga ne‘i o‘o i lou nu‘u.
13 ‘Ia e manatua Aperaamo, ma Isaako, ‘atoa ma Isaraelu au ‘au‘auna, na e tautō ai o oe ‘iā te oe lava, ma e fa‘apea atu ‘iā te i latou, ‘‘Ou te fa‘ato‘ateleina a ‘outou fānau, pei o fetū o i le lagi, o lenei nu‘u ‘atoa fo‘i na ‘ou fai atu ai ‘ou te avatua ‘iā ‘outou fānau e fai ma latou tofi e fa‘avavau.’”
14 ‘Ona salamō ai lea o le ALI‘I i le leaga na fai a fa‘ao‘o atu i lona nu‘u.
15 ‘Ona liliu lea o Mose, ma ‘ua alu ifo nai le mauga, ma papa ma‘a e lua o le tulafono i lona lima, o papa ma‘a na tusia i o la itū e lua, o lea itū ma lea itū ‘ua tusia ai.
16 O ia papa ma‘a fo‘i, o le galuega a le Atua ia, o le mea fo‘i ‘ua tusia, o le tusi lea a le Atua na togitogiina i papa ma‘a.
17 ‘Ua fa‘alogo atu Iosua i le leo o le nu‘u o lo‘o ‘alalaga, ‘ona fai atu lea o ia ‘iā Mose, “O le vāvāō o le tau‘a o i le togālauapi.”
18 A ‘ua tali mai o ia,“E lē o le leo o ē ‘alalaga ‘ina ‘ua mālō;e lē o le leo fo‘i o ē ‘alalaga ‘ina ‘ua lafoia;a o le leo o le pese lava ‘ou te fa‘alogo i ai.”
19 ‘Ua fa‘alatalata atu o ia i le togālauapi, ‘ona iloa ai lea e ia o le tama‘i povi ma le siva; ‘ona tupu tele ai lea o le ita o Mose, ‘ua lafo ifo papa ma‘a nai ona lima, ‘ua nuti ai i lalo o le mauga.
20 ‘Ona tago ai lea o ia i le tama‘i povi na latou faia, ‘ua susunu i le afi, ‘ua olo ai ‘ua fai ma efuefu, ‘ua sasa‘a ai fo‘i i le vai, ma fa‘ainu ai le fānauga a Isaraelu.
21 ‘Ona fai atu lea o Mose ‘iā Arona, “O le a le mea na faia e lenei nu‘u ‘iā te oe ‘ina ‘ua e fa‘ao‘o ai lenei agasala tele ‘iā te i latou?”
22 ‘Ua tali mai Arona, “‘Aua ne‘i tupu tele mai le to‘asā o lo‘u ali‘i; ‘ua e silafia le nu‘u nei, ‘ua leaga lava i latou.
23 ‘Ua latou fai mai ‘iā te a‘u, ‘‘Inā faia mo i tatou se atua e muamua atu ‘iā i tatou; auā o lenā tagata o Mose na na ‘aveina a‘e i tatou nai le nu‘u o Aikupito, tatou te lē iloa pe se a se mea ‘ua o‘o ‘iā te ia.’
24 ‘Ona ‘ou fai atu lea ‘iā te i latou, ‘O ē o i ai auro ia motusi ‘ese,’ ma ‘ia latou ‘aumaia ‘iā te a‘u; ‘ona ‘ou lafo ai lea i le afi, i le ‘ua sau ai lenei tama‘i povi.”
25 ‘Ua va‘ai atu Mose ‘ua salalau le nu‘u, auā ‘ua fa‘asalalauvaleina e Arona e fa‘alumaina ai i latou i ē laga mai ‘iā te i latou;
26 ‘ona tula‘i lea o Mose i le faitoto‘a o le togālauapi, ma fa‘apea atu, “O ai sē ‘au ma le ALI‘I? ‘inā sau ia ‘iā te a‘u.” ‘Ona fa‘apotopoto mai lea ‘iā te ia o le fānauga a Levi uma lava.
27 ‘Ona fai atu lea o ia ‘iā te i latou, “O lo‘o fa‘apea ‘ona fetalai mai le ALI‘I, o le Atua o Isaraelu, ‘‘Ia ta‘itasi ma tu‘u lana pelu i lona itū, ‘inā feoa‘i ia i lea faitoto‘a ma lea faitoto‘a i le togālauapi, ma ‘ia ta‘itasi ma fasioti i lona uso, ma lana uō, ma lē la te tuā‘oi.’”
28 ‘Ona faia lea e le fānauga a Levi fa‘apei ‘ona fai atu ai o Mose, ‘ua fasia le nu‘u i lea aso pe to‘atolu gaafe o tagata.
29 ‘Ua fa‘apea atu fo‘i Mose, “‘Ia tofia ‘outou e ‘outou i le asō mo le ALI‘I, e ta‘ito‘atasi i lona atali‘i ma lona uso, ‘ina ‘ia tu‘uina mai i le asō se manuia ‘iā te ‘outou.”
30 ‘Ua o‘o i le taeao, ‘ona fai atu lea o Mose i le nu‘u, “‘Ua ‘outou faia le agasala o le agasala tele; o lenei, o le a a‘u alu a‘e i le ALI‘I, pe mafai ‘ona ‘ou faia se togiola ‘ona o a ‘outou agasala.”
31 ‘Ona fo‘i atu lea o Mose i le ALI‘I, ma na fai atu ai, “Auē! ‘ua agasala le nu‘u nei i le agasala tele, na fai mo i latou le atua auro
32 o lenei, pe mafai ‘ona e fa‘amāgalo la latou agasala; a leai, ‘ia sōloi‘esea a‘u i le tusi ‘ua e tusia.”
33 ‘Ona fetalai mai lea o le ALI‘I ‘iā Mose, “O lē ‘ua agasala mai ‘iā te a‘u, ‘ou te sōloi‘esea lava lea i la‘u tusi
34 o lenei, alu ia oe, ta‘ita‘i atu ia le nu‘u i le mea ‘ua ‘ou fai atu ai ‘iā te oe, fa‘auta, e muamua atu la‘u agelu i ou luma; o le aso fo‘i ‘ou te asiasi ai, ‘ou te asiasi lava ‘iā i latou ‘ona o la latou agasala.”
35 ‘Ona taia lea e le ALI‘I o le nu‘u ‘ona ‘ua latou faia le tama‘i povi, na faia e Arona.