1 ‘Ona fetalai mai lea o le ALI‘I ‘iā Mose, “E toe tasi le mala ‘ou te fa‘ao‘oina atu i luga o Farao, i luga fo‘i i Aikupito, e mulimuli ane e tu‘uina mai e ia o ‘outou e ō ‘ese i lenei mea; a o‘o ‘ina tu‘uina mai e ia, e matuā tutuli ‘ese lava e ia ‘iā te ‘outou i lenei mea.
2 ‘Ia e fai atu i le nu‘u ‘ia latou lagona, ‘ia ta‘itasi ma ole atu o le tane i lē la te tuā‘oi, ma le fafine i lē la te tuā‘oi i mea ario ma mea auro.”
3 ‘Ua fa‘atupuina e le ALI‘I le alofa o Aikupito i le nu‘u. O lenei tagata o Mose, na sili ‘ona mamalu lava o ia i le nu‘u o Aikupito, i le manatu o ‘au‘auna a Farao, ma le manatu o le nu‘u.
4 ‘Ona fai atu lea o Mose, “O lo‘o fa‘apea ‘ona fetalai mai o le ALI‘I: A lata i le tulua o po ma ao, ‘ona ‘ou alu atu lea i totonu o Aikupito,
5 ‘ona oti ai lea o ulumatua uma lava i le nu‘u o Aikupito, e āfua i le ulumatua a Farao, o lē ti‘eti‘e i lona nofoāli‘i, e o‘o lava i le ulumatua a le ‘au‘auna fafine o lo‘o i tua o le ma‘aolo, ‘atoa ma ulumatua uma lava a manu.
6 ‘Ona fai ai lea o le auega tele i le nu‘u ‘atoa uma o Aikupito, e le‘i fa‘apea anamua, e lē toe fa‘apea lava.
7 A o le fānauga uma lava a Isaraelu, e leai se ulī e fa‘agāoioi lona laulaufaiva i se tagata po o se manu; ‘ina ‘ia ‘outou iloa ‘ua fa‘ailogaina e le ALI‘I ‘iā Aikupito ma Isaraelu.
8 E ō ifo fo‘i o au nei ‘au‘auna uma lava ‘iā te a‘u, latou te ifo ‘iā te a‘u, e fa‘apea mai, ‘‘Inā alu ia oe ma le nu‘u uma lava o lo‘o mulimuli ‘iā te oe.’ A mavae nei mea, ‘ona ‘ou alu ai lea.” ‘Ona alu lea o ia nai luma o Farao, ‘ua ita tele.
9 ‘Ua fetalai mai fo‘i le ALI‘I ‘iā Mose, “E lē fa‘alogo Farao ‘iā te ‘oulua, ‘ina ‘ia fa‘atele ai ‘ou vāvega i le nu‘u o Aikupito.”
10 Na faia fo‘i e Mose ma Arona o ia vāvega uma i luma o Farao, a ‘ua fa‘ama‘a‘a e le ALI‘I le loto o Farao, e le‘i tu‘uina mai e ia o le fānauga a Isaraelu e ō ‘ese i lona nu‘u.