1 ‘Ua ia fetalai mai fo‘i ‘iā Mose, “‘Inā ‘outou ō mai i luga nei i le ALI‘I: o oe ma Arona, ma Natapu ma Aviu, ‘atoa ma toeaina o Isaraelu e to‘afitugafulu, ma ‘ia ‘outou ifo mamao mai.
2 Na o Mose e fa‘alatalata to‘atasi o ia i le ALI‘I, a o i latou, ‘aua ne‘i fa‘alatalata mai; ‘aua fo‘i ne‘i ō a‘e le nu‘u fa‘atasi ma ia.”
3 ‘Ona alu lea o Mose ma na fa‘ailoa atu i le nu‘u o afioga uma lava a le ALI‘I ma fa‘amasinoga uma. ‘Ona tali mai lea o le nu‘u uma ma le leo gatasi, ‘ua fa‘apea mai, “O mea uma lava ‘ua fetalai mai ai le ALI‘I, matou te faia lava.”
4 ‘Ona tusi lea e Mose o afioga uma lava a le ALI‘I; ‘ona tula‘i lea o ia i le, taeao lava ma na faia le fatafaitaulaga i lalo o le mauga, ‘atoa ma fa‘ailoga ma‘a e sefulu ma le lua mo itū‘āiga o Isaraelu e sefulu ma le lua.
5 ‘Ua, ia ‘a‘auina atu fo‘i taulele‘a o le fānauga a Isaraelu, ‘ua latou avatu taulaga mū ma latou faia taulaga fa‘afetai, o povi ia, i le ALI‘I.
6 ‘Ona ‘ave lea e Mose le tasi vaega o le toto, ma ‘ua liligi i ipu; o le tasi vaega o le toto ‘ua ia sausauina i luga o le fatafaitaulaga.
7 ‘Ua ia ‘ave fo‘i le tusi o le feagaiga, ma na faitaulia i luma o le nu‘u; ‘ona latou fai mai ai lea, “O mea ‘atoa uma ‘ua fetalai mai ai le ALI‘I matou te faia lava, ma fa‘alogo i ai.”
8 ‘Ona ‘ave lea e Mose o le toto, ma na sausauina ai le nu‘u; ‘ua ia fa‘apea atu fo‘i, “Fa‘auta i le toto o le feagaiga ‘ua osia e le ALI‘I ma ‘outou i nei mea uma lava.”
9 ‘Ona ō a‘e lea o Mose, ma Arona, ma Natapu, ma Aviu, ‘atoa ma toeaina o Isaraelu e to‘afitugafulu;
10 ‘ua latou va‘ai atu fo‘i i le Atua o Isaraelu; sa i lalo ifo o ona ‘a‘ao pei o le mea ‘ua faia i ma‘a safaira, e pei o le lagi lava ‘ona pupula.
11 ‘Ua ia lē fa‘ao‘o atu fo‘i lona ‘a‘ao i ali‘i o le fānauga a Isaraelu, ‘ua latou iloa atu i le Atua, ma latou ‘a‘ai ma inu.
12 ‘Ua fetalai mai fo‘i le ALI‘I ‘iā Mose, “‘Inā sau ia oe i luga nei ‘iā te a‘u i le mauga, ma e nofo ai; ‘ou te avatu ai ‘iā te oe papama‘a, ma le tulafono, ma poloa‘iga na ‘ou tusia, e a‘oa‘o ai ‘iā te i latou.”
13 ‘Ona tula‘i lea o Mose ma lana ‘au‘auna o Iosua, ‘ona alu a‘e lea o Mose i le mauga o le Atua.
14 ‘Ua ia fai atu fo‘i i toeaina. “‘Ia ‘outou tali atu i mā‘ua ‘i‘inei, se‘ia ma fo‘i mai ‘iā te ‘outou; fa‘auta, o Arona ma Huro o ‘iā te ‘outou i lā‘ua; ai se tasi ‘ua i ai se mea e fa‘amasino ai ‘ia alu atu o ia ‘iā i lā‘ua.”
15 ‘Ona alu a‘e lea o Mose i le mauga, ‘ona ufitia lea o le mauga i le ao;
16 ‘ua tumau fo‘i le pupula o le ALI‘I i luga o le mauga o Sinai, e ono fo‘i aso na ufitia ai i le ao; o le aso fitu fo‘i na ia vala‘au mai ai ‘iā Mose a‘i totonu o le ao.
17 O le tino mai fo‘i o le pupula o le ALI‘I, sa pei o le afi ma‘ama‘ai i le tumutumu o le mauga i luma o le fānauga a Isaraelu.
18 ‘Ua alu fo‘i Mose i totonu lava o le ao, ‘ua alu a‘e fo‘i i le mauga; sa i ai Mose i le mauga i ao e fagafulu ma po e fagafulu.#