1 ‘Ona tali atu lea o Mose, ‘ua fa‘apea atu, “Fa‘auta, latou te lē talia mai a‘u, latou te lē fa‘alogo mai fo‘i i la‘u ‘upu, auā o le a fai mai i latou, ‘E le‘i fa‘aali mai le ALI‘I ‘iā te oe.’”
2 ‘Ona fetalai mai lea o le ALI‘I ‘iā te ia, “Pe se a lenā mea i lou lima?”‘Ua fai atu ia, “O le to‘oto‘o.”
3 ‘Ua ia fetalai mai, “‘Inā lafo ia i le ‘ele‘ele;” ‘ona lafo lea e ia i le ‘ele‘ele, ‘ua liu gata; ‘ona sola ‘ese ai lea o Mose.
4 ‘Ona fetalai mai lea o le ALI‘I ‘iā Mose, “‘Inā ‘a‘apa atu ia o lou lima ma tago i lona i‘u.” ‘Ona ‘a‘apa atu ai lea o lona lima, ‘ua pu‘e atu ai, ‘ona liu to‘oto‘o lea i lona lima.
5 “‘Ina ‘ia latou talia mai ai, na fa‘aali ‘iā te oe le ALI‘I le Atua o latou tamā, o le Atua o Aperaamo, o le Atua o Isaako, o le Atua fo‘i o Iakopo.”
6 ‘Ua toe fetalai mai le ALI‘I ‘iā te ia, “‘Ia e tu‘u lou lima i lou fatafata;” ‘ona tu‘u ai lea o lona lima i lona fatafata; ‘ona tō mai ai lea, fa‘auta, o lona lima ‘ua lepela e pei o le kiona.
7 ‘Ua fetalai mai o ia, “‘Inā toe tu‘u ia lou lima i lou fatafata;” ‘ua toe tu‘u lona lima i lona fatafata, ‘ona toe tō mai lea ‘ua i lona fatafata, fa‘auta fo‘i, ‘ua toe liliu, ‘ua tusa ma lona lava tino.
8 “‘Āfai fo‘i latou te lē talia mai oe, ma lē fa‘alogo i le leo o le ulua‘i fa‘ailoga, latou te talia lava le leo o le fa‘ailoga mulimuli.
9 Pe ‘āfai fo‘i latou te lē talia o nei fa‘ailoga e lua, e lē fa‘alogo mai fo‘i i lau ‘upu, ‘ona e asu ai lea sina vai nai le vaitafe, ma sasa‘a i le ‘ele‘ele matūtū, ‘ona liu toto ai lea i le ‘ele‘ele matūtū, o le vai ‘e te asuina mai le vaitafe.”
10 ‘Ona fai atu lea o Mose i le ALI‘I, “A e alofa, le Ali‘i e, o a‘u o le tagata e lē iloa fai lauga, talu anamua, ma ona po nei ‘ua e fetalai mai ai i lau ‘au‘auna ‘ua lē matala lo‘u gutu, ‘ua lē matala fo‘i lo‘u laulaufaiva.”
11 ‘Ona fetalai mai lea o le ALI‘I ‘ia te ia, “O ai ‘ea na na faia le gutu o le tagata, po o ai na te faia le gūgū, po o le tutuli, po o le va‘ai, po o le tauaso? E lē o a‘u ‘ea le ALI‘I?
12 O lenei, alu ia oe; o a‘u fo‘i ‘ou te fa‘atasi ma lou gutu, ‘ou te a‘oa‘o atu fo‘i ‘iā te oe i ‘upu ‘e te tautala atu ai.”
13 A ‘ua fai atu o ia, “A e alofa le Ali‘i e, ‘ia e ‘auina atu se tasi e tatau ‘ona e ‘auina atu ai.”
14 ‘Ona tele lea o le to‘asā o le ALI‘I ‘iā Mose, ‘ua fetalai mai, “E lē o lou uso ‘ea o Arona o le sa Levī? ‘Ua ‘ou iloa e fai lauga lelei lava ia; fa‘auta fo‘i, o lo‘o sau o ia e fa‘afetaia‘i ‘iā te oe; a iloa mai fo‘i oe, ‘ona fiafia ai lea o lona loto.
15 ‘E te tautala atu lava ‘iā te ia ma tu‘u atu ai ia ‘upu i lou gutu; ‘ou te fa‘atasi fo‘i ma lou gutu ‘atoa ma lona gutu ‘ou te a‘oa‘o fo‘i ‘iā te ‘oulua i mea lua te faia.
16 E tautala atu ia mo oe i le nu‘u, e fai fo‘i o ia ma gutu mo oe, e fai fo‘i oe ma Atua mo ia.
17 O le to‘oto‘o lenā, ‘e te ‘ave i lou lima, ‘e te fai ai fa‘ailoga.”
18 ‘Ona alu lea o Mose, ‘ua fo‘i atu i le tamā o lana avā o Ietero, ‘ua ia fai atu ‘iā te ia, “Se‘i ‘ou alu, ‘ou te fo‘i atu i o‘u uso o i Aikupito, ‘ia ‘ou iloa pe ola mai i latou.” ‘Ona fai mai lea o Ietero ‘iā Mose, “‘Inā alu ia oe ma le manuia.”
19 ‘Ona fetalai mai lea o le ALI‘I ‘iā Mose i Mitiana, “‘Inā alu ia, ‘ia e fo‘i atu i Aikupito, auā ‘ua oti tagata uma ē na fia fasioti ‘iā te oe.”
20 ‘Ona ‘ave lea e Mose o lana avā ma ona atali‘i, ‘ina ‘ia fa‘ati‘eti‘e i latou i luga o le asini, ‘ua fo‘i atu i le nu‘u o Aikupito; ‘ua ‘ave fo‘i e Mose le to‘oto‘o o le Atua i lona lima.
21 ‘Ua fetalai mai fo‘i le ALI‘I ‘iā Mose, “Pe a e alu e fo‘i atu i Aikupito, ‘ia e fa‘autauta i vāvega uma lava ‘ua ‘ou tu‘uina atu ‘iā te oe, ma ‘ia e faia lava i luma o Farao; a o a‘u, ‘ou te fa‘ama‘a‘a i lona loto, e lē tu‘uina mai e ia le nu‘u e ō.
22 ‘E te fai atu fo‘i ‘iā Farao, ‘O lo‘o fa‘apea ‘ona fetalai mai le ALI‘I: O lo‘u atali‘i Isaraelu, o la‘u ulumatua.
23 ‘Ou te fai atu ‘iā te oe, “‘Ia e tu‘u mai lo‘u atali‘i ‘ia ‘au‘auna mai o ia ‘iā te a‘u;” ‘ae lē mafai ‘ona tu‘u mai, fa‘auta, o a‘u nei ‘ou te fasiotia lou atali‘i, o lau lava ulumatua.’”
24 Sa i le ala o ia, ‘ona fetaia‘i lea o le ALI‘I ma ia, ‘ina o i le mea e moe ai, ‘ua fia fasioti ‘iā te ia.
25 ‘Ona tago lea o Sepora i le fatu, ‘ua tipi ‘ese ai le pa‘u o le tino o lana tama, ‘ua lafo atu i ona vae, ‘ua fa‘apea atu, “E moni, o le tane toto lima lava oe ‘iā te a‘u.”
26 ‘Ona tu‘u atu lea o ia ‘iā te ia; ‘ona fa‘apea atu ai lea o le fafine, “O le tane toto lima lava oe, ‘ona o le peritomega.”
27 ‘Ua fetalai mai le ALI‘I ‘iā Arona, “‘Inā alu ia oe, lua te fetaia‘i ma Mose i le vao.” ‘Ona alu lea o ia, ‘ua la fetaia‘i ma ia i le mauga o le Atua, ‘ona la fea sogi ai lea ma ia.
28 ‘Ona ta‘u atu lea e Mose ‘iā Arona ‘upu uma lava a le ALI‘I o lē na ‘auina mai o ia, ‘atoa ma fa‘ailoga uma lava na ia fetalai mai ai ‘iā te ia.
29 ‘Ona ō lea o Mose ma Arona, ‘ua la fa‘apotopotoina toeaina uma lava o le fānauga a Isaraelu.
30 ‘Ona talatala atu lea o Arona i ‘upu uma lava ‘ua fetalai mai ai le ALI‘I ‘iā Mose, ‘ua ia faia fo‘i fa‘ailoga i luma o le nu‘u.
31 ‘Ona talia lea e le nu‘u, ma ‘ua latou fa‘alogologo ‘ua asiasi mai le ALI‘I i le fānauga a Isaraelu, ‘ua na silasila mai fo‘i i lo latou puapuagā; ‘ona latou punonou lea ma ifo.#