1 ‘Ua fetalai mai le ALI‘I ‘iā Mose, “Fa‘auta mai, ‘ua ‘ou tofia oe e fai ma Atua ‘iā Farao, o lou uso fo‘i o Arona, e fai o ia ma perofeta ‘iā te oe.
2 ‘E te fai atu mea uma lava ‘ou te fai atu ai ‘iā te oe; e tautala atu fo‘i lou uso o Arona ‘iā Farao, ‘ina ‘ia tu‘u atu e ia o le fānauga a Isaraelu e ō ‘ese i lona nu‘u.
3 O a‘u fo‘i ‘ou te fa‘ama‘a‘a i le loto o Farao, ‘ou te fa‘atele fo‘i ‘ou fa‘ailoga ma ‘ou vāvega i le nu‘u o Aikupito;
4 ‘ae lē fa‘alogo mai Farao ‘iā te ‘oulua; ‘ona ‘ou fa‘ao‘o lea o lo‘u lima i Aikupito, ‘ou te ‘aumaia fo‘i o a‘u ‘au, o lo‘u nu‘u lava o le fānauga a Isaraelu, mai le nu‘u o Aikupito i sala tetele.
5 E iloa fo‘i e Aikupito, o a‘u lava o le ALI‘I, pe a ‘ou fa‘aloaloa lo‘u lima i luga o Aikupito; ‘ou te ‘aumaia fo‘i le fānauga a Isaraelu a‘i totonu ‘iā i latou.”
6 ‘Ona faia lea e Mose ma Arona e pei ‘ona fetalai mai ai o le ALI‘I ‘ia te i lā‘ua, sa fa‘apea lava ‘ona fai e i lā‘ua.
7 O tausaga o Mose ‘ua valugafulu; o tausaga fo‘i o Arona ‘ua valugafulu ma le tolu, ‘ina ‘ua tautala atu i lā‘ua ‘iā Farao.
8 ‘Ua fetalai mai fo‘i le ALI‘I ‘iā Mose ma Arona, ‘ua fa‘apea mai,
9 “‘Āfai mai Farao ‘iā te ‘oulua, ‘ua fa‘apea mai, ‘‘Inā faia se vāvega e ‘oulua,’ ‘ona e fai atu lea ‘iā Arona, ‘Tago ia i lou to‘oto‘o, ma lafo i uma o Farao, ‘ona liu gata ai lea.’”
10 ‘Ona ō atu lea o Mose ma Arona ‘iā Farao, ‘ua la faia e fa‘apei ‘ona fetalai mai ai o le ALI‘I; ‘ua lafo e Arona lona to‘oto‘o i luma o Farao ma ana ‘au‘auna, ‘ona liu gata ai lea.
11 ‘Ona vala‘au atu lea o Farao i le ‘au popoto ma taulāitu; ‘ua fa‘apea fo‘i ‘ona fai e taulāitu a Aikupito ‘iā latou togafiti fa‘ataulāitu.
12 Auā ‘ua latou ta‘itasi ma lafo lona to‘oto‘o ‘ona liu gata ai lea; a ‘ua folo o latou to‘oto‘o e le to‘oto‘o o Arona.
13 A ‘ua fa‘ama‘a‘aina le loto o Farao, e le‘i fa‘alogo fo‘i o ia ‘iā i lā‘ua, fa‘apei ‘ona fetalai mai ai o le ALI‘I.
14 ‘Ua fetalai mai fo‘i le ALI‘I ‘iā Mose, “‘Ua ma‘a‘a lava le loto o Farao, e lē mafai e ia ‘ona tu‘u atu o le nu‘u e ō.
15 ‘Inā alu ia oe ‘iā Farao i le taeao; fa‘auta, o le a alu atu o ia i le vai; ‘e te tu atu fo‘i lua te fetaia‘i ma ia i le ‘auvai o le vaitafe; o le to‘oto‘o fo‘i sa liu gata ‘e te ‘ave i lou lima.
16 ‘E te fai atu fo‘i ‘iā te ia, ‘‘Ua ‘auina mai a‘u ‘iā te oe e le ALI‘I le Atua o sa Eperū, o lo‘o fetalai mai, “‘Ia e tu‘u mai lo‘u nu‘u e ō, ‘ina ‘ia latou ‘au‘auna mai ‘iā te a‘u i le vao.” Fa‘auta fo‘i, ‘ua e lē āu fa‘alogo mai lava.
17 O lo‘o fa‘apea ‘ona fetalai mai le ALI‘I, “O le mea nei ‘e te iloa ai, o le ALI‘I lava a‘u.” Fa‘auta, ‘ou te tā i lenei to‘oto‘o ‘ua i lo‘u lima i le vai o le vaitafe, ‘ona liu toto ai lea;
18 e mamate ai i‘a o i le vaitafe, e elo fo‘i le vaitafe; ‘ona ‘ino‘ino ai lea o Aikupito ‘ona inu i le vai mai le vaitafe.’”
19 ‘Ua fetalai mai fo‘i le ALI‘I ‘iā Mose, “‘Ia e fai atu ‘iā Arona, ‘‘Inā tago ia i lou to‘oto‘o, ma fa‘aloaloa lou lima i luga o le vai o Aikupito, i o latou vaitafe, ma o latou vaita‘i, ma o latou vailepa, ma mea uma lava e i ai o latou vai, ‘ina ‘ia liu toto; ‘ina ‘ia i ai toto i le nu‘u uma lava o Aikupito, i ipu la‘au ‘atoa ma ipu ma‘a.’”
20 ‘Ua fa‘apea ‘ona fai e Mose ma Arona, pei ‘ona fetalai mai o le ALI‘I; ‘ua ia si‘i i luga fo‘i le to‘oto‘o ma tā le vai o le vaitafe i luma o Farao ma ana ‘au‘auna; ‘ona liu toto ai lea o le vai uma lava o le vaitafe.
21 ‘Ona mamate ai lea o i‘a sa i le vaitafe, ‘ua elo fo‘i le vaitafe, e lē mafai e Aikupito ‘ona inu i le vai o le vaitafe, sa i ai le toto i le nu‘u uma lava o Aikupito.
22 ‘Ona fa‘apea lea ‘ona fai e taulāitu o Aikupito ‘iā latou togafiti fa‘ataulāitu; ‘ona fa‘ama‘a‘aina ai lea o le loto o Farao, ‘ua lē fa‘alogo fo‘i ‘iā te i lā‘ua, fa‘apei ‘ona fetalai mai ai o le ALI‘I.
23 ‘Ona liliu ai lea o Farao, ‘ua alu i lona fale, e le‘i mafaufau fo‘i o ia i lenei mea.
24 ‘Ona ‘eli lea e Aikupito uma i tafatafa o le vaitafe ‘ia maua se vai latou te inu ai; auā e lē mafaia e i latou ‘ona inu o le vai nai le vaitafe.
25 ‘Ua fa‘a‘atoa fo‘i ona aso e fitu talu ‘ona taia e le ALI‘I o le vaitafe.