1 ‘Aua ‘e te si‘i le tala fatu fua; ‘aua fo‘i le ‘au fa‘atasi ma le tagata amio leaga, ne‘i fai oe ma molimau fa‘asauā.
2 ‘Aua ‘e te mulimuli atu i le to‘atele e fai le amio leaga; ‘aua fo‘i ‘e te tali atu i se finauga, e ‘au ma le to‘atele e fa‘api‘opi‘o ai le fa‘amasinoga.
3 ‘Aua ‘e te āva i tagata mativa i lana finauga.
4 Pe ‘āfai lua te fetaia‘i ma le povi a lē lua te masesei, po o lana asini ‘ua sē, ‘ia e toe fa‘afo‘i mai ai lava ‘iā te ia.
5 Pe ‘āfai ‘e te iloa le asini a lē ‘ua ita mai ‘iā te oe, o lo‘o ta‘oto i lalo o lana avega; ‘ia oe ne‘i e tu‘ua lava o ia, a ‘ia ‘oulua tatalaina lava fa‘atasi ma ia.
6 ‘Aua ‘e te fa‘api‘opi‘oina le fa‘amasinoga o le tagata mativa lua te felāta‘i i lana finauga.
7 ‘Ia e taumamao ma le ‘upu pepelo, ‘aua fo‘i le fasioti le tagata e lē sala ma lē ‘ua amiotonu; auā ‘ou te lē ta‘uamiotonuina lē tagata amio leaga.
8 ‘Aua le talia se mea alofa; auā o le mea alofa e fa‘atauaso a‘i o ē va‘ava‘ai, e fa‘asesēina ai fo‘i ‘upu a ē amiotonu.
9 ‘Aua fo‘i ‘e te fa‘asauā i se tagata ‘ese, auā ‘ua ‘outou iloa lava le loto o le tagata ‘ese, auā sa fai ‘outou ma tagata ‘ese i le nu‘u o Aikupito.
10 E ono tausaga ‘e te lūlū ai saito i lou fanua, ma fa‘aputu mea e tutupu ai;
11 a o le tausaga e fitu, ‘e te tu‘u ia ma ia tu‘u ai pea lava, ‘ina ‘ia ‘a‘ai ai o ē matitiva i lou nu‘u; o mea fo‘i e totoe ‘iā te i latou e ‘a‘ai ai o manu o le vao ‘ia fa‘apea fo‘i ‘ona e fai i lau tōvine ma lou tōolive.
12 E ono aso ‘e te fai ai au galuega, a o le aso fitu ‘e te mālōlō ai, ‘ina ‘ia mālōlō ai lau povi ma lau asini, ‘ia mapu fo‘i le tama a lau ‘au‘auna fafine, ma le tagata ‘ese.
13 O nei mea uma fo‘i ‘ua ‘ou fai atu ai ‘iā te ‘outou, ‘ia ‘outou tausi i ai; ‘aua fo‘i ne‘i tou ta‘uta‘u le igoa o atua ‘ese ‘aua lava ne‘i tautala i ai lou gutu.
14 E ta‘i atu tolu i tausaga ‘ona e fai o tausamiga ‘iā te a‘u.
15 ‘ia e fai le tausamiga o areto e lē fa‘afefeteina e fitu aso ‘e te ‘ai ai areto e lē fa‘afefeteina, fa‘apei ‘ona ‘ou poloa‘i atu ai ‘iā te oe, i ona po na ‘atofaina i le masina o Apipa; auā na e sau ai nai le nu‘u o Aikupito; ‘aua fo‘i ne‘i iloa se isi i o‘u luma ‘ua leai sana mea.
16 O le tausamiga o le seleselegāsaito ma le ulua‘i fua o lau galuega ‘ua e totōina i le fanua; ma le tausamiga o le fa‘aputuga o mea e ‘ai ‘ina a uma le tausaga, pe a uma ‘ona fa‘aputuina o au mea mai le fanua.
17 E ta‘i atu tolu i tausaga ‘ona iloa ai o tane uma lava ‘ua ‘iā te oe i luma o le Ali‘i le ATUA
18 ‘Aua le fai taulaga i le toto o la‘u taulaga fa‘atasi ma le areto ‘ua fa‘afefeteina ‘aua fo‘i ne‘i tu‘u pea se‘ia taeao ga‘o o la‘u taulaga.
19 O le fa‘apolopolo o le ulua‘i fua o lou lau‘ele‘ele, ‘ia e ‘aumai lea i le fale o le ALI‘I lou Atua.‘Aua le tunu se tama‘i ‘oti i le suāsusu o lona tinā.
20 Fa‘auta, ‘ou te ‘auina atu le agelu i ou luma, na te tausia oe i le ala, na te fa‘ao‘o atu fo‘i ‘iā te oe i le mea ‘ua ‘ou saunia;
21 ‘ia e fa‘aeteete oe ‘iā te oe i ona luma ma ‘ia e fa‘alogo i lona leo, ‘aua le fa‘a‘ono‘ono ‘iā te ia, auā na te lē fa‘amāgaloina o ‘outou solitulafono; auā fo‘i o lo‘o ‘iā te ia i lo‘u nei igoa.
22 ‘Ae ‘āfai ‘e te matuā fa‘alogo i lona leo ma fai mea uma lava ‘ou te fai atu ai, ‘ona fai ai lea mo‘u fili o ē ‘ua fai oe mo latou fili, ‘ou te fa‘atigā atu fo‘i i ē fa‘atigā mai ‘iā te oe.
23 Auā e muamua atu la‘u agelu i ou luma, ma fa‘ao‘o atu ‘iā te oe i le nu‘u o sa Amorī, ma sa Hetī, ma sa Perisē, ma sa Kanana, ma sa Hivī, ma sa Iepusē; ‘ou te fa‘aumatia fo‘i i latou.
24 ‘Aua ‘e te ifo i o latou atua, ‘aua fo‘i le ‘au‘auna ‘iā i latou, ‘aua fo‘i le fai e tusa ma mea latou te faia; a ‘ia e matuā lepeti, ma matuā tu‘inini‘ia o latou tupua.
25 A ‘ia ‘outou ‘au‘auna i le ALI‘I lo ‘outou Atua, ‘ona fa‘amanuia lea e ia lau mea e ‘ai ‘atoa ma lou vai; ‘ou te fa‘ate‘a ‘ese fo‘i ma‘i ‘iā te oe.
26 E leai sē papā sana tama, e lē pā fo‘i se tasi i lou nu‘u; ‘ou te fa‘a‘atoaina lava ou aso.
27 O lo‘u mata‘utia ‘ou te ‘auina atu e muamua ‘iā te oe, ‘ou te tulia fo‘i nu‘u uma ‘e te alu atu i ai; ‘ou te tu‘uina atu fo‘i i ē ita ‘iā te oe uma lava ‘ia latou liliu mai o latou tua ‘iā te oe.
28 ‘Ou te ‘auina atu fo‘i ē muamua atu ‘iā te oe o lagomumu, e tuli ai sa Hivī, ma sa Kanana, ma sa Heti a‘i ou luma.
29 ‘Ou te lē tulia i latou a‘i ou luma i le tausaga e tasi, ne‘i gaogao le fanua, ma tupu tele ai o manu fe‘ai e tigā ai oe.
30 ‘Ae ta‘ito‘aitiiti ma ta‘ito‘aitiiti ‘ou te tulia ai i latou i ou luma, ‘ina se‘ia e tupu tele ai, ma ‘ia e maua le fanua.
31 ‘Ou te tu‘u fo‘i ou tuā‘oi e gata mai i le sami Ulaula, e gata mai fo‘i i le sami o Filisitia, e gata mai fo‘i i le vao, e gata mai i le vaitafe; auā ‘ou te tu‘uina atu i o ‘outou lima i latou o ē nonofo i le nu‘u, ‘e te tulia fo‘i i latou ai ou luma.
32 ‘Aua ‘e te osi se feagaiga ma i latou, po o latou atua.
33 ‘Aua ne‘i latou nonofo pea i lou nu‘u, ne‘i latou fa‘atupu ai lau agasala ‘iā te a‘u; auā pe a e ‘au‘auna i o latou atua, e fai lava ia ma mailei ‘iā te oe.