1 ‘Ua faia fo‘i e Pesaleli le ‘atola‘au i le la‘au o le setima, e lua kupita ma le vaeluagalemū o le kupita o lona umi; o le kupita e tasi ma le vaeluagalemū o le kupita lona lau; o le kupita e tasi ma le vaeluagalemū o le kupita lona maualuga.
2 ‘Ua ia ufiufi fo‘i i ai i le auro lelei i totonu ma tua, ‘ua ia fai fo‘i i ai le pale auro e si‘osi‘oina a‘i.
3 ‘Ua ia tunu le auro, ‘ua fai a‘i mama e fa, e tu‘uina i ona tuli ‘ato e fa; e lua mama i le tasi ona itū, e lua fo‘i mama i le tasi ona itū.
4 ‘Ua ia faia fo‘i amo i le la‘au o le setima, ma na ufiufi ai i le auro.
5 ‘Ua na sulu atu amo i mama i itū o le ‘atola‘au, e amo a‘i le ‘atola‘au.
6 ‘Ua ia faia fo‘i i le nofoa o le alofa i le auro lelei; e lua kupita ma le vaeluagalemū o le kupita lona umi, ma le kupita e tasi ma le vaeluagalemū o le kupita lona lau.
7 ‘Ua ia faia fo‘i kerupi auro e lua; ‘ua ia faia ‘ua togitogi fa‘amamanuina, o i pito e lua o le nofoa o le alofa;
8 o le tasi kerupi i le tasi pito nofoa, o le tasi fo‘i kerupi i le tasi pito nofoa, ma ia faia kerupi ia i le nofoa o le alofa i ona pito e lua i le mea e fai a‘i.
9 ‘Ua fālō e kerupi o la ‘apa‘au i luga, ‘ua fa‘amalumalu fo‘i i o la ‘apa‘au i le nofoa o le alofa; o la mata fo‘i ‘ua fesagai, ‘ua fa‘asaga mata o kerupi i le nofoa o le alofa.
10 ‘Ua ia faia fo‘i o le la‘o‘ai i le la‘au o le setima, e lua kupita lona umi, o le kupita e tasi lona lau, o le kupita ma le vaeluagalemū o le kupita lona maualuga.
11 ‘Ua ia ufiufi ai fo‘i i le auro lelei, ma na fai ai le pale auro e si‘osi‘oina a‘i.
12 ‘Ua ia fai ai fo‘i lona tafatafa i lalo e si‘osi‘oina a‘i, o le lautele o le alofilima e tasi lona lau; ‘ua ia fai fo‘i le pale auro mo le tafatafa i lalo e si‘osi‘oina a‘i.
13 ‘Ua ia tunu fo‘i le auro ‘ua fai a‘i mama e fa, ‘ua ia tu‘uina ta‘itasi mama i ona tuli la‘o‘ai e fa, ‘ua i ona vae e fa.
14 ‘Ua felāta‘i mama ma le tafatafa i lalo, e fai ma mea e sulu ai amo.
15 ‘Ua ia faia fo‘i amo i le la‘au o le setima, ma na ufiufi ai i le auro, e amo a‘i le la‘o‘ai.
16 ‘Ua ia faia fo‘i mea mo le la‘o‘ai, o ona tanoa salalafa, ma ona ipu, ma ona tanoa, ma ona ipu e asu a‘i e liligi ai; o le auro lelei na fai a‘i ia mea.
17 ‘Ua ia faia fo‘i le tu‘ugālamepa i le auro lelei, ‘ua na faia le tu‘ugālamepa, ‘ua togitogi fa‘amamanuina, o lona ‘au, ma ona maga, o ona ipu fa‘a‘ofu‘ofu, o ona pona, ma ona fuga, ‘ua faia uma i lea lava mea.
18 ‘Ua ō atu maga e ono i ona itū, e tolu maga o le tu‘ugālamepa i le tasi itū, e tolu fo‘i maga o le tu‘ugālamepa i le tasi itū.
19 E tolu ipu fa‘a‘ofu‘ofu e pei o sekati i le tasi maga, o le pona fo‘i ‘atoa ma le fuga; e tolu fo‘i ipu fa‘a‘ofu‘ofu e pei o sekati i le tasi maga, o le pona fo‘i ‘atoa ma le fuga; ‘ua fa‘apea fo‘i ona maga e ono e ō atu i le tu‘ugālamepa.
20 ‘Ua i le tu‘ugālamepa fo‘i o ipu fa‘a‘ofu‘ofu e fa, e pei o sekati, ona pona ‘atoa ma ona fuga;
21 ma le pona i lalo o isi ona maga e lua, ma le pona i lalo o isi ona maga e lua, ma le pona i lalo o isi ona maga e lua, e fa‘atatau i maga e ono ‘ua o atu ai;
22 ‘ua faia i le mea e tasi ona pona ma ona maga, ‘ua faia uma lava i le auro lelei, ‘ua togitogi fa‘amamanuina.
23 ‘Ua ia faia fo‘i ona lamepa e fitu, ma ona selelamepa, ma ona tu‘ugāmatapa‘u o le afi, i le auro lelei.
24 ‘Ua ia faia i le taleni o le auro lelei, ‘atoa ma ana mea uma lava.
25 ‘Ua faia fo‘i e ia le fata e mū ai le mea manogi i le la‘au o le setima; o le kupita e tasi lona umi, o le kupita e tasi fo‘i lona lau; ‘ua fa‘atafafā; ‘ua lua kupita lona maualuga; ‘ua fai ai ona nifo i lea lava mea.
26 ‘Ua ia ufiufi ai fo‘i i le auro lelei, i ona luga ma ona itū ‘ua so‘o ai, ‘atoa ma ona nifo; ‘ua ia fai ai fo‘i le pale auro e si‘osi‘oina a‘i.
27 E lua fo‘i mama auro ‘ua ia fai ai i lalo o lona pale i ona tuli fata e lua, i ona itū e lua; o mea ia e sulu ai ona amo e amo a‘i.
28 ‘Ua ia faia fo‘i ona amo i le la‘au o le setima, ma na ufiufi ai i le auro.
29 ‘Ua ia faia fo‘i le u‘u pa‘ia e fa‘au‘u a‘i, ma le mea manogi lelei e mū, ‘ua faia i mea manogi lelei i le faiva o le fai mea manogi.#