1 ‘Ona fetalai mai lea o le ALI‘I ‘iā Mose, “‘Ia e tā mai ni papa ma‘a se lua, pei o papa muamua; ‘ou te tusi fo‘i i ia papa o ‘upu sa i ai i papa muamua, na e ta‘eia;
2 ma ‘ia e saunia i le taeao, ma alu a‘e i le taeao i le mauga o Sinai, ‘e te tu mai ai i o‘u luma i le tumutumu o le mauga.
3 ‘Aua fo‘i ne‘i lua ō a‘e ma se tasi; ‘aua ne‘i iloa se tagata e to‘atasi i le mauga uma; o lafu mamoe fo‘i ma povi, ‘aua ne‘i tata‘a i luma o lea mauga.”
4 ‘Ona tā lea e ia o papa ma‘a e lua, e pei o papa muamua; ‘ua tula‘i fo‘i Mose i le taeao lava, ‘ua alu a‘e i le mauga o Sinai, fa‘apei ‘ona fetalai mai ai o le ALI‘I ‘iā te ia, ‘ua ‘ave fo‘i i lona lima o papa ma‘a e lua.
5 ‘Ona afio ifo lea o le ALI‘I i le ao, ‘ua la tutū fo‘i ma ia i lea mea, ‘ua ia ta‘u mai fo‘i le suafa o le “ALI‘I.”
6 ‘Ua afio ane fo‘i le ALI‘I i ona luma, ma na tala mai:“O le ALI‘I, o le ALI‘I,o le Atua alofa mutimutivale ma le alofa fua,e telegese lona to‘asā,‘ae tele le alofa ma le fa‘amaoni.
7 O lē tausi le alofa e o‘o atu i afe o tupulagao lē fa‘amāgalo fo‘i i le amioletonu ma le solitulafono ma le agasala,‘ae lē fa‘asaoina lava e ia o ē agasala;‘ae taui atu e ia le agasala a mātua ‘iā latou fānau ma le fānau a latou fānau,e o‘o i le tolu ma le fa o tupulaga.”
8 ‘Ona fa‘ata‘alise lea o Mose, ‘ua punou i le ‘ele‘ele ma ifo.
9 ‘Ua ia fai atu fo‘i, “Le Ali‘i e, ‘āfai ‘e te alofa mai ‘iā te a‘u, le Ali‘i e ‘inā tatou afio atu ma oe auā o le nu‘u lenei ‘ua ma‘a‘a le ua, ‘ia e fa‘amāgalo fo‘i a matou amioletonu, mā a matou agasala, ‘ia ‘avea fo‘i i matou mou tofi.”
10 ‘Ona fetalai mai lea o ia: Fa‘auta, ‘ou te osia le feagaiga; ‘ou te faia vāvega i luma o lou nu‘u uma, e le‘i faia lava i le lalolagi uma, po o nu‘u ‘ese uma; e va‘aia fo‘i le galuega a le ALI‘I e le nu‘u uma ‘e te i ai oe; auā o le mea mata‘utia o le a ‘ou faia ‘iā te oe.
11 ‘ia e tausi i le ‘upu ‘ou te fai atu ai ‘iā te oe i le asō fa‘auta, ‘ou te tuli ‘ese atu i ou luma o sa Amorī, ma sa Kanana, ma sa Heti, ma sa Perisē, ma sa Hivī, ma sa Iepusē.
12 ‘Ia oe, ne‘i e osi le feagaiga ma ē e nonofo i le nu‘u o le a e alu atu i ai, ne‘i ‘avea ai ma mailei ‘iā te oe;
13 a ‘ia ‘outou sofaia o latou fatafaitaulaga, ‘ia nutipala i o latou tupua, ma vavae i lalo o latou tupua o Asaira.
14 Auā ‘e te lē ifo i se tasi atua; auā o le ALI‘I, o le Fuā, o lona lea suafa, o le Atua fuā lava o ia.
15 Ne‘i e osi le feagaiga ma ē o nonofo i le nu‘u, e mulilulua ai fo‘i i latou i o latou atua, ma fai taulaga i o latou atua; e vala‘au fo‘i i latou ‘iā te oe, ‘ona e ‘ai lea ‘iā latou taulaga.
16 Ne‘i e ‘aumai fo‘i o latou afafine ma avā a ou atali‘i, e mulilulua fo‘i o latou afafine i o latou atua, e mulilulua ai fo‘i ou atali‘i i o latou atua.
17 ‘Aua ne‘i e fai mo oe ni atua u‘amea.
18 ‘Ia e tausiusi i le tausamiga o le areto e lē fa‘afefeteina. E fitu aso ‘e te ‘ai ai le areto e lē fa‘afefeteina, na ‘ou fai atu ai ‘iā te oe i ona po na ‘atofaina i le masina o Apipa; auā o le masina o Apipa na e sau ai nai Aikupito.
19 O ulumatua uma lava e fai lava ia mo a‘u; o po‘a uma o au manu, o le ulumatua a le povi ‘atoa ma le mamoe;
20 a o le ulumatua a le asini, ‘e te sui ai se tama‘i mamoe; ‘āfai fo‘i ‘e te lē suia, ‘ia e vavae lona ua; ‘e te suia o ulumatua uma a ou atali‘i.‘Aua fo‘i ne‘i iloa mai se tasi i o‘u luma ‘ua leai sana mea.
21 E ono aso ‘e te galue ai, a o le aso fitu ‘ia e mālōlō ai; ‘ia e mālōlō ai lava i le tau e suō ai, ma le tau e selesele ai.
22 ‘E te faia fo‘i le tausamiga o vaisapati, o le fa‘apolopolo o le seleselegāsaito, ‘atoa ma le tausamiga o le fa‘aputugafua ‘ina a uma le tausaga.
23 E ta‘i atu tolu i tausaga ‘ia iloa ai tane uma lava ‘ua ‘iā te oe i luma o le ALI‘I le Atua, o le Atua o Isaraelu.
24 Auā ‘ou te tuli ‘ese nu‘u ‘ese i ou luma, ma ‘ou fa‘alautele lou lau‘ele‘ele; e lē mana‘o fo‘i se tagata i lou fanua pe a e alu a‘e fa‘atolu i tausaga, ‘ina ‘ia iloa ai oe i luma o le ALI‘I lou Atua.
25 ‘Aua ne‘i e fai taulaga i le toto o la‘u taulaga ma le areto ‘ua fa‘afefeteina; ‘aua ne‘i aoina le taulaga i le tausamiga o le paseka.
26 O le fa‘apolopolo o le ulua‘i fua o lou lau‘ele‘ele ‘e te ‘aumaia i le fale o le ALI‘I lou Atua.‘Aua ne‘i e tunu le tama‘i ‘oti i le suāsusu o lona tinā.
27 ‘Ona fetalai mai lea o le ALI‘I ‘iā Mose: ‘Ia e tusi nei ‘upu, auā ‘ua ‘ou osia le feagaiga ma oe ‘atoa ma Isaraelu e tusa ma ia lava ‘upu.
28 Sa i lea mea fo‘i i lā‘ua ma le ALI‘I e fagafulu ona ao, e fagafulu fo‘i ona po; e le‘i ‘ai ai o ia, e le‘i inu ai fo‘i; na tusi fo‘i e ia i luga o papa ma‘a o ‘upu o le feagaiga, e sefulu ‘upu.
29 ‘Ua o‘o ‘ina alu ifo Mose nai le mauga o Sinai ma papa e lua o le tulafono i le lima o Mose, na alu ifo o ia nai le mauga, e le‘i iloa e Mose ‘ua pupula le pa‘u o ona fofoga, a o fetalai i lā‘ua ma ia.
30 A ‘ua iloa atu e Arona, ma le fānauga a Isaraelu uma lava ia Mose, fa‘auta, o lo‘o pupula mai le pa‘u o ona fofoga; ‘ona latou fefefe lea i fa‘alatalata ‘iā te ia.
31 A ‘ua vala‘au atu Mose ‘iā te i latou, ‘ona toe fo‘i atu lea ‘iā te ia o Arona ma ali‘i uma o le fa‘apotopotoga; ‘ona tautala atu lea o Mose ‘iā te i latou.
32 E mulimuli ane fo‘i ‘ua fa‘alatalata mai le fānauga uma a Isaraelu, ‘ona fai atu ai lea o ia ‘iā te i latou ‘upu uma lava na fetalai mai ai le ALI‘I ‘iā te ia i le mauga o Sinai.
33 ‘Ua uma atu ‘upu a Mose ‘iā te i latou, ‘ona tu‘uina lea e ia o le ufiufi i ona fofoga.
34 A ulu atu Mose i luma o le ALI‘I, ‘ina ‘ia la tautalatala ma ia, ‘ona tu‘u ‘ese ai lea o le ufiufi, ‘ina se‘ia toe ulufafo, ‘ona alu atu lea o ia, ma fai atu i le fānauga a Isaraelu le mea na fetalai mai ai.
35 ‘Ua iloa e le fānauga a Isaraelu fofoga o Mose, ‘ua pupula mai le pa‘u o fofoga o Mose, ‘ona tu‘u lea e Mose o le ufiufi i ona fofoga ‘ina se‘ia toe ulufale atu la te tautalatala ma ia.