1 Pe ‘āfai e gaoi se tagata i se povi po o se mamoe, ma fasi, pe fa‘atau ai, ‘ia toe taui mai e ia e lima povi e sui a‘i le povi, e fa fo‘i mamoe e sui a‘i le mamoe.
2 Pe ‘āfai e maua se gaoi a‘o ‘eli e ia i le pā o le fale, ‘ia fasia o ia ma oti ai; ‘aua le sasa‘a se toto e sui a‘i o ia.
3 ‘Ae ‘āfai ‘ua alu a‘e le la, a o i ai o ia, e sasa‘a ai le toto e sui a‘i o ia; ‘ia matuā avatu se totogi e ia; a leai sana mea, ‘ia fa‘atauina o ia e sui a‘i lona gaoi.
4 Pe ‘āfai e maua lava, o lo‘o ‘iā te ia le mea na ia gaoia, o se povi, po o se asini, po o se mamoe, o lo‘o ola, ‘ia totogi ane ai e ia ta‘ilua.
5 Pe ‘āfai e fa‘asaunoa e se tasi le fanua po o le tōvine, ma tu‘u atu ai lana manu, ma fa‘asaunoa le fanua o se tasi, ‘ia totogi atu e ia i mea e sili ‘ona lelei i lona fanua, ma le mea e sili ‘ona lelei i lona tōvine.
6 Pe ‘āfai e mū se afi, e maua ai la‘au tuitui e susunu ai le faupuegasaito, po o le saito o lo‘o tu, po o le fanua; ‘ia totogi atu lava e lē na mū ai le afi.
7 Pe ‘āfai e tu‘uina atu e se tagata ni tupe po o ‘oloa i lē la te tuā‘oi, na te tausia, ‘ae gaoia nai le fale o lea tagata; a iloa le nā gaoi, ‘ia totogi atu lava e ia ‘ia ta‘ilua.
8 ‘Āfai e lē iloa le gaoi ‘ia alu ane le matai o le fale i fa‘amasino, ‘ina ‘ia iloa po ‘ua tago atu o ia i le ‘oloa a lē la te tuā‘oi.
9 O mea uma lava e tupu ai le agaleaga, po o se povi, po o se asini, po o se mamoe, po o se ‘ofu, po o se tasi mea ‘ua lē iloa, e fai ane ai se tasi “O lana lava lea,” e avatu ai le ‘upu a lā‘ua i fa‘amasino, i le o lē ‘ua fa‘asalaina e fa‘amasino, ‘ia totogi atu lava e ia i lē la te tuā‘oi e ta‘ilua.
10 Pe ‘āfai e tu‘uina atu e se tagata se asini, po o se povi, po o se mamoe, po o se tasi manu i lē la te tuā‘oi, na te tausia, a mate, pe gau, po ‘ua ‘avea, ‘ae le‘i iloa e se tasi;
11 ‘ona fai lea e ia o le tautō i le ALI‘I, na ia lē tago atu i le mea a lē la te tuā‘oi, ‘ia talia lea e lē ana le manu, ‘aua le tauia.
12 ‘Ae ‘āfai ‘ua gaoia lava nai ‘iā te ia, ‘ia totogi atu i lē ana le manu.
13 ‘Āfai ‘ua saeia lava, ‘ia ‘aumai e ia e fa‘amaoni ai; o le mea na saeia e lē tauia lea.
14 Pe ‘āfai e nonō e se tasi se mea mai lē la te tuā‘oi, a gau lea mea pe mate, a o le i ai lē ana le manu, ‘ia totogi lava lea.
15 ‘Āfai o i ai lava lē ana le manu, ‘aua le totogi ‘iā te ia; ‘āfai na ‘aumai ‘ina ‘ia fai se totogi, ‘ua o‘o mai ‘iā te ia i lona fai totogi.
16 Pe ‘āfai e fa‘a‘ole‘ole se tasi i se taupou, e le‘i faufautane, ‘ua la momoe fo‘i ma ia; ‘ia avatu lava e ia le ‘oloa e fa‘atau ai ‘ia te ia e fai māna avā.
17 ‘Ae ‘āfai e lē mafai lava lona tamā ‘ona avatu o ia ‘iā te ia, ‘ia avatu i ai e ia tupe e tusa ma le ‘oloa e avatu ai i le taupou.
18 ‘Aua lava ne‘i ola se taulāitu fafine.
19 ‘Ai se tasi la te momoe ma se manu, ‘ia fasiotia lava ia.
20 O sē fai taulaga i se isi atua, ‘ia fano lava ia; ‘ua na o le ALI‘I lava e fai taulaga i ai.
21 ‘Aua le agaleaga, pe fa‘asauā i se tagata ‘ese; auā sa fai ma tagata ‘ese ‘outou i le nu‘u o Aikupito.
22 ‘Aua le agaleaga i se fafine ‘ua oti lana tane, po o sē mātuaoti.
23 ‘Āfai ‘e te agaleaga lava i ai, ‘ona ‘alaga mai lea o ia ‘iā te a‘u, ‘ou te fa‘alogo lava i lona ‘alaga mai.
24 E matuā tupu ai lo‘u ita, ‘ou te fasioti ai fo‘i ‘iā te ‘outou i le pelu, e ‘avea fo‘i a ‘outou avā o fafine ‘ua oti a latou tane, o la ‘outou fānau fo‘i e mātuaoti.
25 Pe ‘āfai ‘e te avatu tupe i se tagata mativa o lo‘u nu‘u lua te felāta‘i ‘aua ‘e te tagi ‘iā te ia i se totogi fa‘asili, ‘aua fo‘i ‘e te fai atu ai ‘iā te ia i se totogi fa‘asili.
26 Pe ‘āfai ‘ua ‘iā te oe le ‘ofu o lē lua te tuā‘oi na tu‘u fa‘afa‘atau, ‘ia e toe avatu lava ‘iā te ia, a o le‘i goto le lā;
27 auā o lona pulupulu lava lea, o le ‘ofu o lona lava tino; se a se mea a afu ai o ia pe a ‘alaga mai o ia ‘iā te a‘u, ‘ou te fa‘alogo i ai; auā ‘ou te alofa lava a‘u.
28 ‘Aua ‘e te fāifai i fa‘amasino, pe fetu‘u i le ali‘i sili o lou nu‘u.
29 ‘Aua ‘e te fa‘atuai mai le fa‘apolopolo o le fua o lou fanua, ‘atoa ma lau suāvine.O le ulumatua i ou atali‘i ‘e te tu‘uina mai mo‘u.
30 ‘E te faia fa‘apea fo‘i i lau povi ma lau mamoe, e tu‘u pea ia i le aumatuā i aso e fitu; a o le aso valu ‘e te ‘aumai ai ma a‘u.
31 E fai ‘outou ma tagata pa‘ia mo a‘u; ‘aua fo‘i tou te ‘a‘ai se manu na saeia i le vao; ‘ia lafo lava lea i ulī.#