1 ‘Ona fa‘apotopotoga mai lea e Mose a Isaraelu, ‘ua fai atu ‘iā te i latou: O mea nei ‘ua poloa‘i mai ai le ALI‘I ‘ia faia.
2 E ono aso e fai ai galuega, a o le aso fitu e pa‘ia lea ‘iā te ‘outou, o le sapati e mālōlō ai i le ALI‘I; ai se fai galuega ai e fasiotia lava ia.
3 ‘Aua ne‘i mū se afi i so ‘outou fale i le aso sapati.
4 ‘Ua fai atu fo‘i Mose i le fa‘apotopotoga uma o le fānauga a Isaraelu, ‘ua fa‘apea atu: O le mea lenei, ‘ua poloa‘i mai ai le ALI‘I ‘ua fa‘apea mai:
5 ‘Inā fai ia ‘outou se taulaga i le ALI‘I, e ta‘ito‘atasi o lē manatu i ai i lona loto, ‘ia ‘aumai e ia le taulaga i le ALI‘I, o le auro, ma le ario ma le ‘apamemea,
6 ma le ‘ie uli, ma le pāuli, ma le mūmū ma le ‘ie vavae, ma fulufulu ‘oti
7 ma pa‘u mamoe po‘a fa‘alanu ulaula, ma pa‘u takesa, ma le la‘au o le setima;
8 o le suāu‘u fo‘i e mū a‘i le afi, o mea manogi e manogi a‘i le u‘u e fa‘au‘u a‘i e fai a‘i fo‘i le mea manogi lelei e mū,
9 o ma‘a soama, ma ma‘a e teu ai i le efota ma le ufifatafata.
10 O i latou uma fo‘i o ‘iā te ‘outou ‘ua popoto, ‘ia latou ō mai, ma latou faia mea uma lava ‘ua poloa‘i mai ai le ALI‘I;
11 o le malumalu, o lona fale fetāfa‘i, ma lona ufiufi, o ona fa‘amau, o ona laupapa, o ona fa‘alava, o ona pou, ma ona lago;
12 o le ‘atola‘au, ma ona amo, o le nofoa o le alofa, ma le ‘ie puipui;
13 o le la‘o‘ai, ma ona amo, ma ana mea uma lava, ma le areto e laulauina i luma;
14 ma le tu‘ugālamepa, e mū ai le afi, ma ana mea, ma ona lamepa, ma le suāu‘u e mū a‘i le afi;
15 ma le fata e mū ai mea manogi, ma ona amo, ma le u‘u e fa‘au‘u a‘i, ma le mea manogi lelei e mū, ma le ‘ie puipui o le faitoto‘a e pupuni ai le malumalu;
16 o le fata e fai ai taulaga mū, ma lona ta‘igaafi ‘apamemea o ona amo, ma ana mea uma; le tanoa e mulumulu ai ma lona tulaga;
17 o ‘ie puipui mo le lotoā, o ona pou, ma ona lago, ma le ‘ie puipui mo le faitoto‘a o le lotoā;
18 o fa‘amau mo le malumalu, ma fa‘amau mo le lotoā, ma ona maea;
19 o ‘ie o mea e fai ai tapua‘iga e ‘au‘auna ai i le mea pa‘ia, o ‘ofu sa mo le ositaulaga o Arona, ma ‘ofu o ona atali‘i, e fai ai le faiva o ositaulaga.
20 ‘Ona tu‘ua lea o le fa‘apotopotoga uma o le fānauga a Isaraelu nai luma o Mose.
21 ‘Ona latou ō mai lea, o i latou uma o ē ‘ua ua‘i i ai o latou loto ma i latou uma o ē ‘ua manatu ai o latou loto, na latou ‘aumaia le taulaga i le ALI‘I mo galuega o le fale fetāfa‘i o le fa‘apotopotoga mo ona sauniga uma ‘atoa ma ‘ofu sa.
22 ‘Ua latou ō mai, o tane ‘atoa ma fafine; o i latou uma lava o ē na manatu i ai o latou loto, ‘ua latou ‘aumaia o mama, ma mama o taliga, ma mama o lima, ma asoa auro, ma mea auro uma, e ta‘ito‘atasi uma lava o ē na fai taulaga, ‘ua fai ai le taulaga auro i le ALI‘I.
23 E ta‘ito‘atasi uma fo‘i ‘ua i ai se ‘ie uli, ma le pāuli, ma le mūmū ma le ‘ie vavae, ma fulufulu ‘oti, ma pa‘u mamoe po‘a fa‘alanu ulaula, ma pa‘u takesa, ‘ua latou ‘aumaia.
24 E ta‘ito‘atasi uma o ē na faitaulaga i le ario, ma le ‘apamemea, ‘ua ‘aumai e ia le taulaga i le ALI‘I; e ta‘itasi uma fo‘i na i ai la‘au o le setima e aogā i se mea o le galuega, ‘ua ‘aumaia.
25 O fafine ta‘ito‘atasi uma fo‘i ‘ua atamamai, ‘ua milo i o latou lima, ma ‘aumai o mea na milo, o le ‘ie uli, ma le pāuli, ma le mūmū, ma le ‘ie vavae.
26 O fafine uma fo‘i ‘ua ua‘i i ai o latou loto ma le poto, ‘ua milo e i latou fulufulu ‘oti.
27 O ali‘i fo‘i, ‘ua ‘aumai e i latou o ma‘a soama, ma ma‘a e teu ai i le efota ma le ufifatafata;
28 ma le mea manogi, ma le suāu‘u e mū a‘i le afi, ma le u‘u e fa‘au‘u ai, ‘atoa ma le mea manogi lelei e mū.
29 E ta‘ito‘atasi uma o tane ‘atoa ma fafine ē na manatu i ai i o latou loto, ‘ua ‘aumaia mea e fai a‘i galuega uma lava na poloa‘i mai ai le ALI‘I ‘iā Mose ‘ia faia; ‘ua ‘aumaia ma le loto e le fānauga a Isaraelu i le ALI‘I.
30 ‘Ona fa‘apea atu lea o Mose i le fānauga a Isaraelu: Fa‘auta, ‘ua vala‘auina e le ALI‘I i lona lava igoa o Pesaleli, o le atali‘i o Auri, o le atali‘i lea o Huro, o le itū‘āiga o Iuta;
31 ‘ua fa‘atumuina fo‘i o ia i le Agaga o le Atua i le poto, ma le fa‘autauta, ma le iloa lelei, e fai ai galuega uma lava;
32 ‘ina ‘ia mafaufau o ia i galuega faigatā, e galue o ia i le auro, ma le ario, ma le ‘apamemea;
33 e togitogi fo‘i i ma‘a e fa‘amau ai, e togitogi fo‘i i la‘au, e fai ai galuega faigatā uma lava.
34 ‘Ua ia tu‘uina i lona loto ‘ia mafai ‘ona a‘oa‘o atu, o ia ‘atoa ma Aliavu, o le atali‘i o Aisamako, o le itū‘āiga o Tanu.
35 ‘Ua na fa‘atumuina fo‘i i lā‘ua i le poto e fai galuega uma a le tufuga togitogi mea, ma le galuega a le tufuga poto, ma lē lalaga ‘ie lanu ‘ese‘ese, o le ‘ie uli, ma le pāuli, ma le mūmū ma le ‘ie vavae, ‘atoa ma ē lalaga mea, ma matagaluega ‘ese‘ese ma galuega a e mafaufau i galuega faigatā.