1 ‘Ua fetalai mai le ALI‘I ‘iā Mose, “‘Inā ulufale atu ia ‘iā Farao, auā ‘ua ‘ou fa‘ama‘a‘a i lona loto ma loto o ana ‘au‘auna, ‘ina ‘ia ‘ou tu‘uina atu a‘u nei fa‘ailoga i ona luma;
2 ‘ina ‘ia e ta‘u atu i taliga o lau fānau ‘atoa ma le fānau a lau fānau, o mea na ‘ou faia i Aikupito, ma a‘u fa‘ailoga na ‘ou tu‘uina atu ai ‘iā te i latou, ‘ina ‘ia ‘outou iloa ai, o a‘u lava o le ALI‘I.”
3 ‘Ona ulufale atu lea o Mose ma Arona ‘iā Farao, ‘ua la fai atu ‘iā te ia, “O lo‘o fa‘apea ‘ona fetalai mai o le ALI‘I le Atua o sa Eperū; ‘‘E te lē mafai ‘ea se‘ia afea ‘ona e fa‘amaulalo i o‘u luma? Tu‘u mai ia lo‘u nu‘u e ō, ‘ina ‘ia latou ‘au‘auna mai ‘iā te a‘u.
4 Auā pe ‘āfai ‘e te lē mafai ‘ona tu‘u mai o lo‘u nu‘u e ō, fa‘auta, a taeao ‘ou te ‘auina mai ai o sē akerise i lou nu‘u;
5 e lilo ai le fogā‘ele‘ele, e lē mafai ai ‘ona iloa le ‘ele‘ele, e ‘aina ai fo‘i toe mea na sao ma totoe ma ‘outou i le uato‘a; e uma fo‘i ona ‘aina o la‘au uma o lo‘o tutupu mo ‘outou i le fanua.
6 E tūtūmu ai fo‘i ou fale, ma fale o au ‘au‘auna uma lava, ‘atoa ma fale o Aikupito uma lava; na lē iloa se mea fa‘apea e o‘u mātua, po o mātua o o‘u mātua, talu le aso na latou nonofo ai i le nu‘u e o‘o i le aso nei.’” ‘Ona liliu ai lea o ia ‘ua ulufafo atu nai ‘iā Farao.