9 ‘Ona fai atu lea o le afafine o Farao ‘iā te ia, “‘Ia e ‘ave lenei tama ma tausi i ai ma a‘u, ‘ou te avatu ai fo‘i ‘iā te oe le totogi;” ‘ona ‘ave lea o le tama e le fafine ma na tausia.
10 ‘Ua matua le tama, ‘ona ia avatu lea i le afafine o Farao, i le ‘ua fai ai māna tama; ‘ua ia fa‘aigoa ‘iā te ia, o Mose, “auā” o lo‘o fa‘apea ana, “Na ‘ou tōina a‘e o ia nai le vai.”
11 ‘Ua o‘o i ona po na matua ai Mose, ‘ona alu atu lea o ia i ona uso, ‘ua na va‘ai atu fo‘i ‘iā latou avega mamafa; ‘ua ia iloa fo‘i le tagata Aikupito ‘ua fasi le tagata sa Eperū o so lona ‘au uso.
12 ‘Ua ia feva‘ava‘aia‘i i lea itū ma lea itū, ‘ua iloa e ia e leai se tagata, ‘ona fasi loa e ia le Aikupito ma ‘ua natia i le oneone.
13 ‘Ona alu atu lea o ia i le aso a taeao, fa‘auta, o tagata sa Eperū e to‘alua o lo‘o femisa‘i; ‘ona fai atu lea o ia i lē ‘ua sesē, “Se a ‘ea le mea ‘e te fasi ai i lē lua te to‘alua?”
14 ‘Ona fai mai lea o ia, “O ai ‘ea na tofia mai oe e fai ma ali‘i ma fa‘amasino ‘iā te i mā‘ua. ‘Ua e manatu ‘ea e fasioti ‘iā te a‘u fa‘apei ‘ona e fasiotia le Aikupito?” ‘Ona fefe ai lea o Mose, ‘ua fa‘apea ana, “E moni lava ‘ua iloa lea mea.”
15 ‘Ua fa‘alogo Farao i lenā mea, ‘ona fia fasioti lea o ia ‘iā Mose; ‘ona sola ‘ese lea o Mose ‘iā Farao, ‘ua nofo i le nu‘u o Mitiana; ‘ua ia nofo fo‘i i luga o le vai‘eli.