20 ‘Ua fetalai mai fo‘i le ALI‘I ‘iā Mose, “‘Ia e ala usu atu i le taeao, ma ‘ia e tu i luma o Farao; fa‘auta, o le a alu ane o ia i le vai, ma ‘ia e fai atu ‘iā te ia, ‘O lo‘o fa‘apea ‘ona fetalai mai o le ALI‘I, tu‘u mai ia lo‘u nu‘u e ō, ‘ina ‘ia latou ‘au‘auna mai ‘iā te a‘u;
21 auā a e lē mafai ‘ona tu‘u mai lo‘u nu‘u e ō, ‘ona ‘ou ‘auina atu lea ‘iā te oe, ma au ‘au‘auna, ma lou nu‘u, ma ou fale, o le vao garova; e tūtūmu fo‘i fale o Aikupito ‘atoa ma le lau‘ele‘ele o i ai latou i garova.
22 ‘Ou te vavae ‘ese fo‘i i lea lava aso o le lau‘ele‘ele o Kosena e i ai lo‘u nu‘u, ‘ina ‘ia lē o‘o i ai ni garova, ‘ina ‘ia e iloa ai o a‘u lava o le ALI‘I le pule i le lalolagi.
23 ‘Ou te tu‘u ai fo‘i se tuā‘oi i le vā o lo‘u nu‘u ma lou nu‘u; e fai lava lenei fa‘ailoga a taeao.’”
24 ‘Ona fa‘apea lava lea ‘ona fai e le ALI‘I, ‘ua o‘o mai ai garova e tele lava i le fale o Farao, ma fale o ana ‘au‘auna, ma le nu‘u ‘atoa uma o Aikupito; ‘ua leaga le nu‘u ‘ona o le vao garova.
25 ‘Ona vala‘au lea o Farao ‘iā Mose ma Arona, ‘ua fai mai i ai, “‘Inā ō ia ‘outou, ma fai taulaga i lo ‘outou Atua i le nu‘u lenā.”
26 A ‘ua fai atu Mose, “E lē tatau ‘ona matou faia fa‘apea; auā o mea e ‘inosia e Aikupito, o le a matou fai a‘i taulaga i le ALI‘I lo matou Atua; fa‘auta, a matou fai a‘i taulaga i mea e ‘inosia e Aikupito i o latou lava luma, latou te lē fetogi mai ‘ea ‘iā te i matou i ma‘a?