1 ‘Ua alu a‘e Aperamo nai Aikupito, o ia ma lana avā, ma ana mea uma, o Lota fo‘i fa‘atasi ma ia, e ō i le itū i saute.
2 ‘Ua mau‘oa tele lava Aperamo i manu, ario ma auro.
3 ‘Ua alu fo‘i o ia i lana malaga nai le itū i saute ‘ua o‘o i Peteli, i le mea lava sa mua‘i i ai lona fale ‘ie, i le vā o Peteli ma Ai.
4 O le mea na i ai le fatafaitaulaga sa na mua‘i faia i lea mea; ‘ua vala‘au atu ai fo‘i Aperamo i le suafa o le ALI‘I.
5 O Lota fo‘i, sa la ō ma Aperamo, sa ‘iā te ia o mamoe, ma povi, ma fale ‘ie.
6 ‘Ua lē mafai lava ‘ona la mau fa‘atasi i le nu‘u, auā sa tele lava a lā‘ua mea, ‘ua lē mafai ai ‘ona la mau fa‘atasi.
7 ‘Ua femisa‘i fo‘i leoleo o manu a Aperamo ma leoleo o manu a Lota; o ona po fo‘i ia sa Kananā ma sa Perisē i le nu‘u.
8 ‘Ona alu lea o Aperamo ‘iā Lota, “‘Aua lava ne‘i femisa‘i tā‘ua, po o a tā‘ua leoleo manu; auā o le uso i tā‘ua.
9 E lē o i ou luma ‘ea le lau‘ele‘ele uma? Se‘i e te‘a ‘ese ma a‘u. ‘Āfai ‘e te alu i le itū tauagavale ‘ona ‘ou alu ai lea i le itū taumatau; a e alu i le itū taumatau, ‘ona ‘ou alu ai lea i le itū tauagavale.”
10 ‘Ua va‘ava‘ai Lota, ‘ona iloa atu ai lea e ia i le fanua laugatasi uma ‘ua i ai Ioritana, ‘ua lafulemū uma lava, e o‘o i Soara, e pei o le fa‘ato‘aga a le ALI‘I, e pei o le lau‘ele‘ele o Aikupito, a o le‘i fa‘aumatia e le ALI‘I o Sotoma ma Komoro.
11 ‘Ona filifilia e Lota mōna o le fanua uma na i ai Ioritana ‘ua aga‘i atu fo‘i Lota i sasa‘e; ‘ona la te‘a ‘ese‘ese ai lea o le tasi ma le tasi.
12 ‘Ua mau Aperamo i le nu‘u o Kanana, a o Lota ‘ua mau ia i le ‘a‘ai o le fanua laugatasi, ma ‘ua fa‘atūina ai lona fale ‘ie, ‘ua o‘o atu i Sotoma.
13 A o tagata o Sotoma ‘ua leaga i latou ma ‘ua matuā agasala i luma o le ALI‘I.
14 ‘Ua fetalai atu fo‘i le ALI‘I, ‘iā Aperamo ‘ina ‘ua te‘a ‘ese‘ese o Lota ma ia:“Se‘i e va‘ava‘ai ia ma ‘ia e iloa atu i le mea ‘e te i ai na, i le itū i matū, ma le itū i saute, sasa‘e, ma sisifo;
15 auā o le lau‘ele‘ele uma ‘ua e iloa atu nei, ‘ou te foa‘iina atu mo oe ma lau fānau e fa‘avauvau.
16 ‘Ou te faia fo‘i lau fānau e pei o le efuefu o le ‘ele‘ele, ‘āfai e mafaia e se tagata ‘ona faitaulia o le efuefu o le ‘ele‘ele ‘ona mafai lea ‘ona faitaulia o lau lava fānau.
17 ‘Inā tula‘i ia, ma fealualua‘i i le nu‘u i lona umi ma lona lautele; auā ‘ou te foa‘iina atu mo oe.”
18 ‘Ona ‘ave lea e Aperamo lona fale ‘ie, ‘ua alu atu ‘ua mau i aluna o Mamere, o i Heperona lea, ‘ua ia faia fo‘i i lea mea le fatafaitaulaga i le ALI‘I.