1 ‘Ua o‘o ‘ina amata ‘ona fa‘ato‘ateleina o tagata i le fogā‘ele‘ele, ma ‘ua fānauina e i latou o afafine,
2 ‘ona va‘ava‘ai lea o atali‘i o le Atua i afafine o tagata, ‘ua lālelei lava i latou; ‘ona fai avā ai lea o i latou i fafine uma ‘ua latou loto i ai.
3 ‘Ona fetalai ane lea o le ALI‘I, “E lē fa‘avavau ‘ona finau o lo‘u Agaga ma tagata, auā ‘ua na o tagata i latou; a o latou aso e selau ma le luafulu o tausaga ia.”
4 Sa i le lalolagi i ia ona aso o tagata maualuluga; e fa‘apea fo‘i i ona tua mai, ‘ina ‘ua ō ane o atali‘i o le Atua i afafine o tagata ma ‘ua fānanau ai ‘iā te i latou, o tagata malolosi ia ma le tāua anamua.
5 ‘Ua silafia e le ALI‘I ‘ua leaga tele lava tagata i le lalolagi, o manatu uma ‘ua mafaufau ifo ai i o latou loto ‘ua na ‘ona leaga ia i aso uma lava.
6 ‘Ua salamō fo‘i le ALI‘I ‘ina ‘ua faia e ia tagata i le lalolagi ma ‘ua tigā ai lona finagalo.
7 ‘Ona fetalai ane lea o le ALI‘I, “‘Ou te sōloi‘eseina i le fogā‘ele‘ele tagata na ‘ou faia; o tagata ma manu vaefā ma mea fetolofi, ‘atoa ma manu felelei auā ‘ua ‘ou salamō ‘ina ‘ua ‘ou faia i latou.”
8 A o Noa, ‘ua alofagia o ia e le ALI‘I.
9 O le tala lenei ‘iā Noa; o Noa o le tagata amiotonu ia ma le sa‘o i ē tupulaga ma ia; sa la feoa‘i o le Atua ma Noa.
10 ‘Ua fānaua fo‘i e Noa ona atali‘i e to‘atolu, o Semu ma Hamo ma Iafeta.
11 ‘Ua leaga lava le lalolagi i luma o le Atua ma ‘ua tumu le lalolagi i le sauā.
12 ‘Ua silasila mai le Atua i le lalolagi, fa‘auta fo‘i, ‘ua leaga lava; auā o tagata uma ‘ua leaga ‘iā i latou a latou amio i le lalolagi.
13 ‘Ua fetalai atu le Atua ‘iā Noa, “‘Ua o‘o mai i o‘u luma le i‘uga o tagata uma auā ‘ua tumu le lalolagi i le sauā ‘ona o i latou; fa‘auta fo‘i, o a‘u lava, ‘ou te fa‘aumatia i latou ‘atoa ma le lalolagi.
14 ‘Ia e faia se va‘a mo oe i le la‘au o le kofa; ‘e te faia ni ana i le va‘a, ‘e te puluti ai fo‘i i le liu ma tua i pulu.
15 ‘Ia fa‘apea fo‘i ‘ona e faia; e tolu selau o kupita o le umi lea o le va‘a, e limagafulu o kupita lona lautele, e tolugafulu o kupita fo‘i lona maualuga.
16 ‘E te faia se fa‘amalama i le va‘a, o le kupita fo‘i ‘e te fa‘aumaina i luga; ‘e te faia fo‘i se faitoto‘a o le va‘a i lona itū, ‘e te faia ni ona fogāva‘a, o le aupito i lalo ma lona lua ma lona tolu.
17 Fa‘auta, o a‘u fo‘i, ‘ou te fa‘ao‘oina atu le lolo i luga o le lau‘ele‘ele, e fa‘aumatia ai mea ola uma ‘ua i ai le mānava o le ola o i lalo o le lagi, e fa‘auma ai le ola o mea uma i le lalolagi.
18 ‘Ae ‘ou te fa‘atumauina la‘u feagaiga ma oe, ‘e te ulu atu fo‘i i le va‘a, o oe ma ou atali‘i ma lau avā, ‘atoa ma avā a ou atali‘i fa‘atasi ma oe.
19 ‘E te ‘ave i le va‘a mea ola ‘ia ta‘ilua i mea uma, ‘ia fa‘aolaina fa‘atasi ma oe; ‘ia i ai le manu po‘a ma le manu fafine;
20 o manu felelei e ta‘itasi ma lona uiga ma manu vaefā e ta‘itasi ma lona uiga, o mea fetolofi uma o i le ‘ele‘ele e ta‘itasi ma lona uiga, ‘ia ta‘ilua ‘ona ō atu ‘iā te oe i mea uma, ‘ia fa‘aolaina.
21 O oe fo‘i ‘e te ‘ave ma oe ni mea e ‘ai i mea uma e ‘aina, ‘e te fa‘aputuina ‘iā te oe, ‘e fai fo‘i ma mea e ‘ai mā oe ‘atoa ma i latou.”
22 Na faia fo‘i e Noa e fa‘apei ‘ona poloa‘i atu ai le Atua ‘iā te ia i mea uma, sa fa‘apea lava ‘ona fai e ia.#