1 E mulimuli ane fo‘i i ia mea, ‘ua tala atu ‘iā Iosefa, “Fa‘auta, ‘ua ma‘i lou tamā.” ‘Ona ‘ave ai lea e ia ona atali‘i e to‘alua, o Manase ma Efaraima.
2 ‘Ona ta‘u atu lea ‘iā Iakopo, o lo‘o fa‘apea atu, “Fa‘auta, o lo‘o sau ‘iā te oe lou atali‘i o Iosefa;” ‘ona fa‘amalosi lea o Isaraelu, ‘ua nofo i luga o le moega.
3 ‘Ona fai atu lea o Iakopo ‘iā Iosefa:“Na fa‘aali mai ‘iā te a‘u o le Atua e ona le malosi uma lava i Lusa i le nu‘u o Kanana ma na fa‘amanuia mai ‘iā te a‘u.
4 Na ia fetalai mai ‘iā te a‘u, ‘Fa‘auta, ‘ou te fa‘auluolaina oe, ma ‘ou fa‘ato‘ateleina oe, ‘ou te faia fo‘i oe ma fa‘apotopotoga o nu‘u; ‘ou te avatu fo‘i lenei nu‘u i lau fānau pe a mavae atu oe, e fai mo latou e fa‘avavau.’
5 O lenei fo‘i, o ou atali‘i e to‘alua ‘ua fānau ‘iā te oe i le nu‘u o Aikupito, a o le‘i sau o a‘u ‘iā te oe i Aikupito, e ‘ou lava i lā‘ua, o Efaraima ma Manase, e fai mo a‘u e fa‘apei o Reupena ma Simeona.
6 O lau fānau fo‘i ‘e te fānaua e mulimuli ane ‘iā i lā‘ua, e ou i latou, e ta‘ua i latou i le igoa o latou uso i o la tofi.
7 O a‘u fo‘i, na ‘ou sau nai Patana, ‘ona oti ai lea o Rasela e latalata ane ‘iā te a‘u i le nu‘u o Kanana, i le ala ‘ina ‘ua tali o‘o i Efarata, na ‘ou tanumia o ia i lea mea i le ala i Efarata, o Peteleema lava lea.”
8 ‘Ona iloa atu lea e Isaraelu i atali‘i o Iosefa, ‘ua fa‘apea ane, “O ai ‘ea i lā‘ua nei?”
9 ‘Ona tali atu lea o Iosefa i lona tamā, “O o‘u atali‘i lava i lā‘ua nei ‘ua foa‘iina mai ‘iā te a‘u e le Atua i lenei nu‘u.”‘Ona ia fai atu lea, “‘Inā ‘aumai ia ‘iā te a‘u, ‘ou te fa‘amanuia ‘iā te i lā‘ua.”
10 Sa fa‘asegosego fo‘i mata o Isaraelu, auā ‘ua toeaina, sa lē mailoa lelei; ‘ona ia fa‘alatalataina lea o i lā‘ua ‘iā te ia, ‘ona taufeāsogi lea o ia ma i lā‘ua, ma na fusi ‘iā i lā‘ua.
11 ‘Ona fai atu lea o Isaraelu ‘iā Iosefa, “Fa ita ‘ou te lē toe iloa atu ‘iā te oe, fa‘auta fo‘i ‘ua fa‘ailoa mai e le Atua ‘iā te a‘u au fānau.”
12 ‘Ona ‘aumaia lea e Iosefa o i lā‘ua nai le vā o ona vae, ‘ua ifo to‘ele fo‘i o ia.
13 ‘Ona ‘avea lea o i lā‘ua e Iosefa, o Efaraima i lona lima taumatau e feagai ma le lima tauagavale o Isaraelu, o Manase fo‘i i lona lima tauagavale e feagai ma le lima taumatau o Isaraelu, ‘ona fa‘alatalata atu lea o i lā‘ua ‘iā te ia.
14 ‘Ona fa‘aloaloa atu lea e Isaraelu o lona lima taumatau, ma fa‘ae‘e ai i le ulu o Efaraima, a o le ui‘i lava ia; a ‘ua fa‘ae‘e lona lima tauagavale i le ulu o Manase, ‘ua na fai fa‘autauta i ona lima, auā o Manase o le ulumatua lava lea.
15 ‘Ona fa‘amanuia atu lea o ia ‘iā Iosefa ‘ua fa‘apea atu ai:“O le Atua lava o lē na savali ai i ona luma o‘u tamā o Aperaamo ma Isaako. O le Atua lava o lē na fagaina a‘u talu ‘ina fānau o a‘u, ‘ua o‘o mai lava i le aso nei.
16 O le Agelu lava o lē na lavea‘iina mai a‘u ai le leaga uma lava, ‘ia fa‘amanuia atu lava o ia i tama nei. ‘Ia fa‘aigoa fo‘i i ai i lo‘u nei igoa ma igoa o o‘u tamā o Aperaamo ma Isaako, ma ‘ia matuā fa‘ato‘ateleina i lā‘ua i le lalolagi.”
17 ‘Ua iloa e Iosefa, ‘ua fa‘ae‘e e lona tamā lona lima taumatau i le ulu o Efaraima, ‘ua leaga lea ‘iā te ia, ‘ona si‘i lea e ia i luga le lima o lona tamā ‘ina ‘ia ‘avea nai le ulu o Efaraima i luga o le ulu o Manase.
18 ‘Ua fa‘apea atu fo‘i Iosefa i lona tamā “Lo‘u tamā e, ‘aua le fa‘apea, auā o le ulumatua lenei; se‘i fa‘ae‘e lou lima taumatau i luga i lona ulu.”
19 A ‘ua lē mafai lona tamā, ‘ua ia fai mai, “‘Ua ‘ou iloa, lo‘u atali‘i e, ‘ua ‘ou iloa lava, e ‘avea fo‘i o ia ma nu‘u, o ia fo‘i lava e fa‘ato‘ateleina; ‘ae peita‘i e sili lava lona uso aupito itiiti ‘iā te ia, e ‘avea fo‘i ana fānau ma nu‘u e tele.”
20 ‘Ona fa‘amanuia lea e ia ‘iā i lā‘ua i lea lava aso, ‘ua fa‘apea ane,“O oe e fai ai fa‘amanuia o Isaraelu,e fa‘apea, ‘‘Ia fa‘atusaina oe e le Atua ‘iā Efaraima ma Manase.‘Ua ia tofia Efaraima ‘ia sili ‘iā Manase.’”
21 ‘Ona fai atu lea o Isaraelu ‘iā Iosefa, “Fa‘auta, o a‘u nei o le a a‘u oti, ‘ae ‘iā te ‘outou pea le Atua, e fa‘afoisia e ia ‘outou i le nu‘u o ‘outou tamā.
22 O a‘u fo‘i, ‘ua ‘ou avatu ‘iā te oe le tasi tofi e sili i ou uso, o le mea na ‘ou faoa nai le lima o sa Amorī i la‘u pelu ma la‘u ‘aufana.” #