1 Sa nofo Iakopo i le nu‘u na āumau ai lona tamā, o le nu‘u lea o Kanana
2 o tala nei i gafa o Iakopo. E sefulu ma le fitu tausaga o Iosefa, sa i ai o ia i ona uso ‘ua leoleo i le lafu, o ia fo‘i o le tama, sa i ai i tama a Pila ma tama a Selepa, o avā ia a lona tamā; na tala mai e Iosefa le tala ‘iā latou amio leaga i lo latou tamā.
3 Sa sili le alofa o Isaraelu ‘iā Iosefa i ona atali‘i uma auā na fānau o ia ‘ina o toeaina ia; ‘ua ia fai se ‘ofu talaloa mōna.
4 ‘Ua iloa e ona uso ‘ua sili le alofa o lo latou tamā ‘iā te ia ‘ae itiiti i ona uso uma, ‘ona latou ‘ino‘ino ai lea ‘iā te ia, ma ‘ua lē mafai ‘ona tautala filemū ‘iā te ia.
5 Na fai le miti a Iosefa, ‘ua fa‘aali i ona uso, ‘ua atili ai ‘ona latou ‘ino‘ino ‘iā te ia.
6 ‘Ua ia fai atu ‘iā te i latou, “Fa‘alogologo mai ia i la‘u nei miti.
7 Fa‘auta, sa tatou fusifusia fusi saito i le fanua; fa‘auta fo‘i, na tula‘i la‘u fusi saito, ‘ua tu lava ia i luga; fa‘auta fo‘i, na si‘osi‘o i ai a ‘outou fusi saito ma latou ifo i la‘u fusi saito.”
8 ‘Ua fai mai ona uso ‘iā te ia, “‘E te fai ma tupu ‘ea ‘iā te i matou? ‘E te pule fo‘i ‘ea ‘iā te i matou?” ‘Ua atili ai ‘ona latou ‘ino‘ino ‘iā te ia ‘ona o ana miti ma ana ‘upu.
9 ‘Ua toe fai le tasi ana miti, ‘ua ta‘uina atu ai i ona uso, ‘ua fai atu, “Fa‘auta, ‘ua toe fai la‘u miti; fa‘auta fo‘i i le lā ma le masina, ma fetū e sefulu ma le tasi ‘ua latou ifo mai ‘iā te a‘u.”
10 ‘Ua ia ta‘u atu ai i lona tamā ma ona uso; ‘ona a‘oa‘i ai lea o lona tamā ‘iā te ia, ‘ua fa‘apea mai ‘iā te ia, “O le a ‘ea lau miti na fai? Matou te ō mai ‘ea, o a‘u ma lou tinā, ma ou uso, matou te ifo to‘ele ‘iā te oe?”
11 ‘Ua matatau‘a ona uso ‘iā te ia, a o lona tamā ‘ua ia tāofi i le ‘upu.
12 Na ō atu ona uso e leoleo mamoe a lo latou tamā i Sekema.
13 ‘Ua fai atu Isaraelu ‘iā Iosefa, “E lē o leoleo mamoe ‘ea ou uso i Sekema. Sau ia, ‘ou te ‘auina atu oe ‘iā te i latou.”‘Ua fai mai o ia ‘iā te ia, “O a‘u lava lenei.”
14 ‘Ua fai atu ia ‘iā te ia, “Alu ia, ‘inā asiasi po ‘ua saogalemū ou uso ma saogalemū o mamoe, ‘ona e fo‘i mai ai lea ma se tala.” ‘Ua ia ‘auina o ia ai le vanu o Heperona.‘Ua o‘o ia i Sekema.
15 ‘Ua iloa o ia e le tasi tagata, fa‘auta, ‘ua fesēa‘i o ia i le vao. ‘Ua fesili le tagata ‘iā te ia ‘ua fa‘apea mai, “Se a ‘ea ‘e te sā‘ili na?”
16 ‘Ua fai atu o ia, “‘Ou te sā‘ilia o‘u uso; se‘i e ta‘ua mai po o fea o latou leoleo ai mamoe?”
17 ‘Ua fai mai tagata, “‘Ua ō ‘ese i latou i le mea nei, auā na ‘ou fa‘alogo o lo‘o fa‘apea ane i latou, ‘Tatou ō ia i Totana.’” ‘Ona alu lea o Iosefa ‘ua mulimuli atu i ona uso, ‘ua maua i latou i Totana.
18 ‘Ua latou iloa mamao ‘iā te ia, a o le‘i latalata o ia ‘iā te i latou, ‘ua latou taupulepule e fasioti ‘iā te ia.
19 ‘Ua fetautalatala‘i i latou, “Fa‘auta, o lo‘o sau lenā ali‘i fai miti;
20 o lenei, ō mai ia, ‘inā tatou fasioti ‘iā te ia ma lafo i se tasi lua ma tatou fa‘apea ane, ‘Ua ‘aina o ia e se manu fe‘ai; ‘ona tatou iloa lea pe i‘u i ni a ana miti.”
21 ‘Ua fa‘alogo ai Reupena ma na lavea‘i ‘iā te ia a‘i o latou lima, ‘ua fai atu fo‘i, “‘Aua le fasioti ‘iā te ia.”
22 ‘Ua fai atu fo‘i Reupena ‘iā latou, “‘Aua le fa‘amaligia le toto; tu‘u ia ‘iā te ia i lenei lua o lo‘o i le vao, ‘ae ‘aua le o‘o se lima ‘iā te ia.” Sa fa‘apea ia, ‘ina ‘ia na lavea‘i ‘iā te ia a‘i o latou lima ma fa‘afo‘i atu ‘iā te ia i lona tamā.
23 ‘Ua o‘o atu Iosefa i ona uso, ‘ona latou tatala lea o lona ‘ofu ia Iosefa, o lona ‘ofu talaloa lea.
24 ‘Ua latou ‘ave ‘iā te ia ma tu‘u ai i le lua, sa lē sua le lua, e lē i ai se vai.
25 ‘Ona nonofo lea o i latou ma fai le ‘ava; ‘ua tetepa a‘e, ‘ua va‘ai, fa‘auta, le malaga a sa Isamaelī ‘ua ō mai mai Kiliata ma a latou kamela, o lo‘o ‘ave pulu Seturo ma pulu pasama ma pulu latano, o le a ō i latou e ‘ave ifo ai i Aikupito.
26 ‘Ua fai ane Iuta i ona uso, “Se a le aogā pe a tatou fasioti lo tatou uso ma ufiufi lona toto?
27 Ō mai ia, ‘inā tatou fa‘atauina ia i sā Isamaelī, ‘ae ‘aua le o‘o o tatou lima ‘iā te ia, auā o lo tatou uso ma lo tatou lava tino ia;” ‘ua fa‘alogo ai ona uso ‘iā te ia.
28 ‘Ona ō ane lea o tagata Mitiana, o ē fa‘atau ‘oa, ‘ona latou sisi lea ma ‘ava‘e ‘iā Iosefa a‘i le lua ma latou fa‘atau ‘iā Iosefa i sa Isamaelī i tupe e luafulu; ‘ona latou avatua lea o Iosefa i Aikupito.
29 ‘Ua fo‘i mai Reupena i le lua fa‘auta, ‘ua lē i ai Iosefa i le lua; ‘ona saei lea e ia ona ‘ofu.
30 ‘Ona fo‘i atu lea o ia i ona uso, ‘ua fai atu ai, “E leai se tama! a o a‘u, ‘ou te alu nei ifea?”
31 ‘Ua latou ‘ave le ‘ofu o Iosefa, ‘ua fasi se ‘oti ma fufui ai le ‘ofu i le toto.
32 ‘Ua latou ‘ave le ‘ofu talaloa ma avatu i lo latou tamā, ‘ua fa‘apea ane, “‘Ua matou maua le mea nei, se‘i e iloiloina, po o le ‘ofu lenei o lou atali‘i pe leai.”
33 ‘Ua ia iloiloina, ‘ua fai ane, “O le ‘ofu o lo‘u atali‘i lava, ‘ua ‘aina ia e se manu fe‘ai, ‘ua saeia lava Iosefa.”
34 ‘Ona saei lea e Iakopo ona ‘ofu, ‘ua ia lavalava i le ‘ie talatala, ma na fa‘anoanoa pea ia i aso e tele ‘ona o lona atali‘i.
35 ‘Ua tutū i luga ona atali‘i uma ma ona afafine uma e fa‘amafanafana ‘iā te ia; ‘ae lē mafai ‘ona fa‘amafanafanaina o ia, ‘ua fai ane, “Auā ‘ou te alu ifo ma le fa‘anoanoa i le tu‘ugamau i lo‘u atali‘i;” ‘ona tagi lea o lona tamā ‘iā te ia.
36 ‘Ua fa‘atau e sa Mitianā ‘iā te ia i Aikupito ‘iā Potifara o le ‘au‘auna sili a Farao, o le pule i le ‘au e fa‘afeao.