Kenese

O Gafa ma Tausaga o Tupuga, e āfua mai ‘iā Atamu e o‘o ‘iā Noa

¹O le tusi lenei i le gafa o Atamu. O le aso na faia ai e le Atua le tagata na ia faia o ia ‘ua fa‘atusa i le Atua. ²Na ia faia i lā‘ua, o le tane ma le fafine, na ia fa‘amanuia fo‘i ‘iā te i lā‘ua ma na fa‘aigoaina ai o la igoa o “Atamu,” i le aso na faia ai i lā‘ua. ³Na ola Atamu i tausaga e tasi le selau ma le tolugafulu, ‘ona fānaua lea e ia o lona atali‘i e foliga ‘iā te ia ma fa‘atusa i ai ma ‘ua fa‘aigoaina e ia lona igoa o Setu. ⁴O aso lava o Atamu talu ‘ina fānauina e ia o Setu e valu selau o ona tausaga ma ‘ua fānaua ai e ia o atali‘i ma afafine. ⁵O aso uma fo‘i na ola ai Atamu, e iva selau ma le tolu gafulu, o ona tausaga ia; ‘ona oti ai lea. ⁶Na ola Setu i tausaga e tasi le selau ma le lima, ‘ona fānaua lea e ia o Enosa ⁷o le olaga fo‘i o Setu talu ‘ina fānauina e ia o Enosa, o tausaga e valu selau ma le fitu ia, ma ‘ua fānaua, ai e ia o atali‘i ma afafine ⁸o aso uma fo‘i o Setu e iva selau ma le sefulu ma le lua, o ona tausaga ia; ‘ona oti ai lea. ⁹Na ola Enosa i tausaga e ivagafulu, ‘ona fānaua lea e ia o Kainano. ¹⁰O le olaga fo‘i o Enosa talu ‘ina fānauina e ia o Kainano, o tausaga ia e valu selau ma le sefulu ma tausaga e lima ma ‘ua fānaua ai e ia o atali‘i ma afafine. ¹¹O aso uma fo‘i o Enosa e iva selau ma le lima, o ona tausaga ia; ‘ona oti ai lea. ¹²Na ola Kainano i tausaga e fitugafulu, ‘ona fānaua lea e ia o Maalaelu. ¹³O le olaga fo‘i o Kainano talu ‘ina fānauina e ia o Maalaelu o tausaga ia e valu selau ma le fagafulu ma ‘ua fānaua ai e ia o atali‘i ma afafine. ¹⁴O aso uma fo‘i o Kainano e iva selau ma le sefulu, o ona tausaga ia; ‘ona oti ai lea. ¹⁵Na ola Maalaelu i tausaga e onogafulu ma le lima, ‘ona fānaua ai lea e ia o Iareto. ¹⁶O le olaga fo‘i o Maalaelu talu ‘ina fānauina e ia o Iareto, o tausaga ia e valu selau ma le tolugafulu ma ‘ua fānaua ai e ia o atali‘i ma afafine. ¹⁷O aso uma fo‘i o Maalaelu e valu selau ma le ivagafulu ma le lima, o ona tausaga ia; ‘ona oti ai lea. ¹⁸Na ola Iareto i tausaga e tasi le selau ma le onogafulu ma tausaga e lua, ‘ona fānaua ai lea e ia o Enoka. ¹⁹O le olaga fo‘i o Iareto talu ‘ina fānauina e ia o Enoka, o tausaga e valu selau ia ma ‘ua fānaua ai e ia o atali‘i ma afafine. ²⁰O aso uma fo‘i o Iareto e iva selau ma le onogafulu ma le lua o ona tausaga ia, ‘ona oti ai lea. ²¹Na ola Enoka i tausaga e onogafulu ma le lima, ‘ona fānaua ai lea e ia o Metusela. ²²Na la feoa‘i fo‘i o Enoka ma le Atua talu ‘ina fānauina e ia o Metusela, i tausaga e tolu selau ma ‘ua fānaua ai e ia o atali‘i ma afafine. ²³O aso uma fo‘i o Enoka e tolu selau ma le onogafulu ma le lima, o ona tausaga ia. ²⁴Na la feoa‘i fo‘i o Enoka ma le Atua, ‘ua lē iloa fo‘i e ia, auā na ‘avea o ia e le Atua. ²⁵Na ola Metusela i tausaga e selau ma le valugafulu ma tausaga e fitu, ‘ona fānaua ai lea e ia o Lameko. ²⁶O le olaga fo‘i o Metusela talu ‘ina fānauina e ia o Lameko, o tausaga ia e fitu selau ma le valugafulu ma tausaga e lua ma ‘ua fānaua ai e ia o atali‘i ma afafine. ²⁷O aso uma fo‘i o Metusela e iva selau ma le onogafulu ma le iva, o ona tausaga ia; ‘ona oti ai lea. ²⁸Na ola Lameko i tausaga e selau ma le valugafulu ma tausaga e lua, ‘ona fānaua ai lea e ia lona atali‘i, ²⁹ma ‘ua fa‘aigoaina e ia lona igoa o Noa, o lo‘o fa‘apea, “E fa‘amafanafanaina i tatou e ia i la tatou galuega ma le tigā o tatou lima, ‘ona o le lau‘ele‘ele ‘ua malaia i le ALI‘I.” ³⁰O le olaga fo‘i o Lameko talu ‘ina fānauina e ia o Noa, o tausaga ia e lima selau ma le ivagafulu ma tausaga e lima ma ‘ua fānaua ai e ia o atali‘i ma afafine. ³¹O aso uma fo‘i o Lameko e fitu selau ma le fitugafulu ma le fitu, o ona tausaga ia, ‘ona oti ai lea. ³²‘Ua lima selau tausaga o Noa, ‘ona fānaua ai lea e Noa o Semu ma Hamo ma Iafeta.