1 ‘Ua fetalai mai le Atua ‘iā Iakopo, “Tula‘i ia, ‘inā e alu a‘e i Peteli ma nofo ai; ma e fai ai le fatafaitaulaga i le Atua na fa‘aali ‘iā te oe ‘ina ‘ua e sola ‘ese ‘iā Esau lou uso.”
2 ‘Ona fai ane lea o Iakopo i lona ‘āiga ma i latou uma sa ‘iā te ia:“Tu‘u ‘ese ia o atua ‘ese o lo‘o i ai ‘iā te ‘outou, ma ‘ia ‘outou fa‘amamāina ‘iā te ‘outou ma fesui i o ‘outou ‘ofu;
3 ‘inā tatou tula‘i ia, ma tatou ō a‘e i Peteli, ‘ou te fai ai le fatafaitaulaga i le Atua na tali mai ‘iā te a‘u i le aso na ‘ou puapuagā ai, sa ‘iā te a‘u fo‘i i le ala na ‘ou ui ai.”
4 ‘Ona latou avane lea ‘iā Iakopo o latou atua ‘ese uma lava sa ‘iā te i latou, ma a latou mama sa i o latou taliga, ‘ua nanā ai e Iakopo i lalo o le aluna e lata ane i Sekema.
5 ‘Ua latou ō ‘ese ai, sa i ai le mata‘u mai le Atua i ‘a‘ai uma na vagavagai ‘iā te i latou, ‘ua latou lē tulituliloa i le fānau a Iakopo.
6 ‘Ua o‘o Iakopo i Lusa i le nu‘u o Kanana, (o Peteli fo‘i lea,) o ia ‘atoa ma tagata uma sa ‘iā te ia.
7 ‘Ua ia fai ai le fatafaitaulaga, ma na fa‘aigoa lea mea o Elipeteli, auā na fa‘aali mai ai le Atua ‘iā te ia ‘ina ‘ua sola ‘ese i lona uso.
8 ‘Ona oti lea o Tepora lē na tausi ‘iā Repeka, na tanu ai o ia i lalo ifo o Peteli, i lalo o le aluna, ‘ua fa‘aigoa ai o Aluna-pakata.
9 ‘Ua toe fa‘aali mai le Atua ‘iā Iakopo ‘ina ‘ua sau nai Patanarama, ‘ua fa‘amanuia fo‘i ‘iā te ia.
10 ‘Ua fetalai mai le Atua ‘iā te ia:“O Iakopo lou igoa; ‘e te lē toe igoa a‘i ‘iā Iakopo, a o Isaraelu ‘e te igoa ai;” ‘ua na fa‘aigoa ‘iā te ia o Isaraelu.
11 ‘Ua fetalai mai le Atua ‘iā te ia, “O a‘u le Atua e ou le malosi uma lava; ‘ia fa‘ato‘ateleina oe ma ‘ia uluola; o le nu‘u ma le vao nu‘u e tutupu mai ai ‘iā te oe; e fānaua fo‘i e oe o tupu.
12 o le lau‘ele‘ele na ‘ou foa‘iina atu ‘iā Aperaamo ma Isaako, ‘ou te foa‘i atu ai ‘iā te oe, o lau fānau fo‘i pe a mavae atu oe ‘ou te foa‘i atu ai le lau‘ele‘ele.”
13 ‘Ua afio a‘e le Atua nai ‘iā te ia a‘i le mea sa fetalai mai ai ‘iā te ia.
14 ‘Ona fa‘atū lea e Iakopo le fa‘ailoga i le mea na fetalai mai ai o ia ‘iā te ia, o le fa‘ailoga ma‘a; na ia liligi ifo i ona luga le taulaga i mea e inu ma liligi i ai le suāu‘u.
15 ‘Ua fa‘aigoa e Iakopo le mea na fetalai ai le Atua ‘iā te ia, o Peteli.
16 ‘Ua alu ‘ese o ia nai Peteli, ‘ua tali o‘o atu i Efarata, ‘ona fa‘atigā lea o Rasela, ‘ua faigatā lona fānauga.
17 ‘Ua o‘o ‘ina faigatā lona fānauga, ‘ona fai mai lea ‘iā te ia o lē na fa‘atōsaga le fānauga, “‘Aua le fefe, auā e ‘iā te oe fo‘i lenei tama.”
18 ‘Ua o‘o ‘ina a mavae atu lona agaga, (auā ‘ua oti ai o ia,) ‘ua ia fa‘aigoa ‘iā te ia o Penani; a o lona tamā na ia fa‘aigoa ‘iā te ia o Peniamina.
19 ‘Ua oti Rasela, ‘ua tanu i le ala i Efarata, o Peteleema fo‘i lea.
20 ‘Ua fa‘atū e Iakopo le fa‘ailoga i lona tu‘ugamau; o le fa‘ailoga lea o le tu‘ugamau o Rasela ‘ua o‘o i le aso nei.
21 ‘Ona alu ai lea o Isaraelu ‘ua tō lona fale ‘ie i tala atu o le ‘olo o Eteru.
22 Sa nofo Isaraelu i lea nu‘u, ‘ona alu ai lea o Reupena ‘ua momoe ma Pila le palake a lona tamā; ‘ua lagona ai e Isaraelu le tala.O atali‘i o Iakopo ‘ua to‘atinoagafulu ma le to‘alua i latou.
23 O tama a Lea; o le ulumatua a Iakopo, o Reupena ma Simeona, ma Levi, ma Iuta, ma Isakara, ma Sepulona.
24 O tama a Rasela; o Iosefa ma Peniamina.
25 O tama a Pila le ‘au‘auna fafine a Rasela; o Tanu ma Nafatali.
26 O Tama a Selepa le ‘au‘auna fafine a Lea; o Kato ma Asera; o atali‘i ia o Iakopo na fānaua ‘iā te ia i Patanarama.
27 ‘Ua o‘o atu Iakopo ‘iā Isaako lona tamā i Mamere i Kiriatarapa, (o Heperona lea,) sa āumau ai Aperaamo ma Isaako.
28 O aso na ola ai Isaako, na selau tausaga ma le valugafulu.
29 ‘Ona tō lea o le mānava a Isaako, ‘ua oti o ia ma ‘ua fa‘atasi atu i lona nu‘u, ‘ua toeaina, ‘ua tu‘u tulu‘i lona ola; na tanu fo‘i o ia e Esau ma Iakopo ona atali‘i.