1 ‘Ua fa‘alogo fo‘i o ia i ‘upu a atali‘i o Lapana, ‘ua fa‘apea ane, “‘Ua ‘ave‘esea e Iakopo o mea uma na i lo tatou tamā; o mea fo‘i sa i lo tatou tamā ‘ua maua ai e ia lenā tamao‘āiga uma.”
2 ‘Ua iloa atu fo‘i e Iakopo mata o Lapana, fa‘auta fo‘i, ‘ua lē fiafia mai ‘iā te ia ‘ua lē pei o anamua.
3 ‘Ua fetalai mai fo‘i le ALI‘I ‘iā Iakopo, “‘Inā toe fo‘i atu ia i le nu‘u o ou tamā, ma lou ‘āiga, ‘ou te i ai fo‘i ‘iā te oe.”
4 ‘Ua ‘a‘ami fo‘i e Iakopo Rasela ma Lea, la te ō mai ‘iā te ia i le vao i lona lafu.
5 ‘Ua fa‘apea atu fo‘i o ia ‘iā te i lā‘ua, “‘Ua ‘ou iloa nei o mata o lo ‘oulua tamā, ‘ua lē fiafia mai ‘iā te a‘u ‘ua lē pei o anamua; a o le Atua o lo‘u tamā ‘ua ‘iā te a‘u ia.
6 ‘Ua ‘oulua iloa fo‘i ‘ua ‘ou ‘au‘auna i lo ‘oulua tamā i lo‘u malosi uma lava.
7 ‘Ua fa‘a‘ole‘ole mai fo‘i lo ‘oulua tamā ‘iā te a‘u, ‘ua fa‘asefulu ‘ona feliua‘i e ia o lo‘u totogi; a ‘ua lē tu‘uina atu e le Atua ‘ia leaga ai a‘u ‘iā te ia.
8 A fa‘apea mai o ia, ‘O manu ilaila solo o lou totogi lea,’ ‘ona fānanau mai lea o manu uma i ē ilaila solo; a fa‘apea mai o ia, ‘o ē tusitusi o lou totogi lea,’ ‘ona fānanau mai lea o manu uma i ē tusitusi.
9 O lea ‘ua ‘ave‘eseina ai e le Atua o manu a lo ‘oulua tamā, ma ‘ua foa‘iina mai ‘iā te a‘u.
10 “Na o‘o fo‘i i ona po e ofi ai manu, na ‘ou va‘ai atu i la‘u miti, fa‘auta fo‘i, o manu po‘a e na feosofi i luga o manu, ‘ua tusitusi, ma ilaila solo, ma pulepule i latou.
11 ‘Ua fa‘apea mai fo‘i le agelu a le Atua ‘iā te a‘u i lau miti, ‘Iakopo e;’ ‘ona ‘ou tali atu lea, ‘O a‘u lenei.’
12 ‘Ona fa‘apea mai lea o ia, ‘‘Inā va‘ai atu ia ma e iloa atu, o manu po‘a uma e feosofi i luga o manu e tusitusi, ma ilaila solo, ma pulepule i latou; auā ‘ua ‘ou va‘ai i mea uma lava ‘ua faia e Lapana ‘iā te oe.
13 O a‘u o le Atua sa fa‘aali atu ‘iā te oe i Peteli, o le mea na e u‘uina ai le ma‘a e fai ma fa‘ailoga, o le mea na e tautō ai le tautoga ‘iā te a‘u; o lenei, ‘inā tula‘i ia, ma e tu‘ua ia o lenei nu‘u, ‘ae fo‘i atu i le nu‘u o lou ‘āiga.’ ”
14 ‘Ona tali mai lea o Rasela ma Lea, ‘ua fa‘apea mai ‘iā te ia:“E i ai ‘ea se toe vaegā‘oloa po o se tofi mo i mā‘ua i le ‘āiga o lo maua nei tamā?
15 E lē ‘ua ‘avea ‘ea i mā‘ua ma tagata ‘ese ‘iā te ia? Auā ‘ua fa‘atauina i mā‘ua e ia, ‘ua matuā fa‘aumatia fo‘i e ia a mā‘ua ario.
16 O le ‘oloa uma fo‘i ‘ua ‘ave‘eseina e le Atua na i lo mā‘ua tamā, o mā‘ua ia, ma a mā‘ua fānau; o lenei, o mea uma ‘ua fetalai mai ai le Atua ‘iā te oe, ‘inā faia ia o lea.”
17 ‘Ona tula‘i lea o Iakopo, ‘ua ia fa‘ati‘eti‘e fo‘i ona atali‘i ma ana avā i luga o kamela.
18 ‘Ua ia ‘ave‘esea fo‘i ana manu uma, ma ana ‘oloa uma ‘ua na mā‘ua, o manu na mā‘ua e ia, na na mā‘ua i Patanarama, o le a alu i lona tamā o Isaako i le nu‘u o Kanana.
19 ‘Ua alu fo‘i Lapana e sele fulufulu o ana mamoe; ‘ua gaoi fo‘i e Rasela o tupua a lona tama.
20 ‘Ua sola fa‘agaoi Iakopo ‘iā Lapana le Suria, auā na ia lē ta‘u atu ‘iā te ia o le a sola ia.
21 ‘Ua sola lava ia, ma ana mea uma; ‘ua ia tula‘i ma la‘asia i le vaitafe ma aga atu i le mauga o Kiliata.
22 ‘Ua o‘o i le aso tolu ‘ona ta‘u atu ai lea ‘iā Lapana, ‘ua sola Iakopo.
23 ‘Ona latou ō lea ma ona uso, ‘ua tuliloa ‘iā te ia i aso e fitu; ‘ona mā‘ua atu lea ‘iā te ia i le mauga o Kiliata.
24 Na afio ane fo‘i le Atua ‘iā Lapana le Suria i le miti i le po, ‘ua fa‘apea mai ai ‘iā te ia, “‘Ia oe, ne‘i e tautala ‘iā Iakopo i se lelei po o se leaga.”
25 ‘Ua maua atu fo‘i e Lapana o Iakopo. Sa fa‘atūina fo‘i e Iakopo lona fale ‘ie i le mauga; ‘ua fa‘atūina fo‘i e Lapana ma ona uso o latou fale i le mauga o Kiliata.
26 ‘Ua fai atu Lapana ‘iā Iakopo:“Se a lenā mea ‘ua e faia, ‘ina ‘ua e sola fa‘agaoi ‘iā te a‘u, ma ‘ua e ‘aumai o‘u afafine fa‘atagataotau‘a?
27 Se a le mea na e sola fa‘alilolilo ai, ma e alu fa‘agaoi ai ‘iā te a‘u; ma e lē ta‘u mai ‘iā te a‘u, ‘ia ‘ou tu‘uina atu fo‘i oe ma le ‘oli‘oli, ma pese, ma le topa, ma le kitara;
28 ma e lē tu‘u mai ‘iā te a‘u se‘i matou taufeasogi ma o‘u atali‘i ma o‘u afafine? O lenei, ‘ua e fa‘avalea ‘ina ‘ua e faia lenei mea.
29 E mafai ‘iā te a‘u ‘ona fa‘ao‘o ‘iā te ‘outou se leaga; a ‘ua fetalai mai le Atua o lo ‘outou tamā ‘iā te a‘u i le po anapō, ‘ua fa‘apea mai, ‘‘Ia oe, ne‘i e tautala ‘iā Iakopo i se lelei po o se leaga.’
30 O lenei fo‘i, ‘ua e fia alu lava, auā ‘ua e matuā mana‘o i le ‘āiga o lou tamā; a o le a le mea ‘ua e gaoi ai i o‘u atua?”
31 ‘Ona tali mai lea o Iakopo ‘iā Lapana, ‘ua fa‘apea mai, “Na ‘ou sola, ‘ina ‘ua ‘ou fefe; auā na ‘ou fa‘apea, ‘ina ne‘i e fao ou afafine ‘iā te a‘u.
32 O lē ‘e te maua ‘ua i ai ou atua, ‘aua le ola ia; ‘ia e silasila i luma o i tatou uso nei i au mea ‘ua ‘iā te a‘u ma e ‘ave e oe.” Auā ‘ua lē iloa e Iakopo ‘ua gaoia e Rasela.
33 ‘Ona ulufale atu lea o Lapana i le fale ‘ie o Iakopo ma le fale fo‘i o Lea, ‘atoa ma fale o ‘au‘auna fafine e to‘alua, a ‘ua lē maua e ia. ‘Ona sau lea o ia nai le fale o Lea ma ulufale atu i le fale o Rasela.
34 Na ‘ave fo‘i e Rasela tupua ma tu‘u ai i le nofoa o le kamela, ‘ua ia nofo ai fo‘i i o latou luga. ‘Ua su‘esu‘e fo‘i e Lapana i le fale uma, a ‘ua lē maua.
35 ‘Ua fai mai fo‘i o ia i lona tamā, “‘Aua ne‘i to‘atama‘i lo‘u ali‘i ‘ina ‘ua lē mafai ‘ona ‘ou tula‘i i ou luma; auā o lo‘o ‘iā te a‘u le uiga o fafine.” ‘Ua ia sā‘ili‘ili lava, a ‘ua lē maua tupua.
36 ‘Ona ita lea o Iakopo, ‘ua ia finau atu ‘iā Lapana; ‘ua fai atu Iakopo ‘iā Lapana, ‘ua fa‘apea atu:“Se a lo‘u leaga? Se a la‘u agasala ‘ina ‘ua e matuā tulituliloa mai ai ‘iā te a‘u.
37 O lenei, ‘ua uma ‘ona e su‘esu‘e i a‘u mea uma, o ifea se mea o mea uma a lou ‘āiga ‘ua e maua? Tu‘u mai ia ‘i‘inei i luma o o‘u uso ma ou uso, ‘ina ‘ia latou fa‘amasino mai ‘iā te i tā‘ua.
38 E luafulu tausaga na ‘ou i ai ‘iā te oe; ‘ua lē papā au mamoe fafine ma au ‘oti fafine, ‘ua ‘ou le ‘ai fo‘i i mamoe po‘a o lou lafu.
39 O le na saeia ‘ou te le‘i avatua ‘iā te oe; na ‘ou tauia lava; o lē na gaoia i le ao po ‘ua gaoia i le po na e su‘e mai ‘iā te a‘u.
40 Na fa‘apea ai a‘u; na puapuagātia a‘u i le vevela i le ao ma le ma‘alili i le po; na lē iloa fo‘i sina moe e o‘u mata.
41 ‘Ua fa‘apea ‘ona i ai a‘u i lou ‘āiga i ona tausaga e luafulu; na ‘ou ‘au‘auna ‘iā te oe i tausaga e sefulu ma le fa mo ou afafine e to‘alua, ‘ae ono fo‘i tausaga mo au manu ia; ‘ua fa‘asefulu fo‘i ‘ona e feliua‘i lo‘u totogi.
42 ‘Ana le ‘iā te a‘u le Atua o lo‘u tamā, o le Atua o Aperaamo, ma lē ‘ua mata‘u i ai Isaako, po ‘ua e aufuaina mai lava a‘u. ‘Ua silafia e le Atua lo‘u puapuagā ma le galuega a o‘u lima, i lē ‘ua ia a‘oa‘i atu ‘iā te oe i le po anapō.”
43 ‘Ona tali mai lea o Lapana ‘iā Iakopo, ‘ua fa‘apea mai, “O fafine nei o o‘u afafine ia, o tama nei fo‘i o o‘u atali‘i ia, o manu nei fo‘i o a‘u manu ia, o mea uma fo‘i ‘ua e iloa atu nei o a‘u lava ia mea; o o‘u afafine nei fo‘i, se a se mea ‘ou te faia ‘iā te i lā‘ua i le aso nei, po o a la fānau ‘ua fānanau ai i lā‘ua?
44 O lenei, sau ia, ‘inā fai ia sa tā mavaega; ‘ia fai fo‘i lea ma molimau ‘iā te i tā‘ua.”
45 ‘Ona tago lea o Iakopo i le ma‘a ma fa‘atū ai e fai ma fa‘ailoga.
46 ‘Ua fai atu fo‘i Iakopo i ona uso, “‘Inā fa‘apotopoto mai ia o ma‘a;” ‘ona ‘aumai lea e i latou o ma‘a ma fai ai le faupuega; ‘ona latou ‘a‘ai ai lea i luga o le faupuega.
47 ‘Ua fa‘aigoa ai e Lapana o Ikasetuta; a ‘ua fa‘aigoa ai e Iakopo o Kaleta.
48 ‘Ua fai atu fo‘i e Lapana, “E fai lenei faupuega ma molimau ‘iā te i tā‘ua i le aso nei;” o le mea lea na fa‘aigoa ai lona igoa o Kaleta;
49 ma Mesepa, auā na fa‘apea ane, “‘Ia silasila mai le ALI‘I ‘iā te i tā‘ua, pe a tā te‘a ‘ese‘ese o oe ma a‘u.
50 ‘Āfai ‘e te agaleaga atu i o‘u afafine, pe fa‘aopoopo i o‘u afafine nisi au avā, ‘ua leai se tagata ‘iā te i tā‘ua, fa‘auta mai ‘ea, o le Atua e sisila ia ‘iā te i tā‘ua ma oe.”
51 ‘Ua fa‘apea atu fo‘i Lapana ‘iā Iakopo, “Fa‘auta mai, o lenei faupuega, fa‘auta mai fo‘i, o lenei fa‘ailoga, ‘ua ‘ou fa‘atūina ‘iā te i tā‘ua;
52 ‘ia fai lenei faupuega ma molimau, ‘ia fai fo‘i lenei fa‘ailoga ma molimau, ‘ou te lē la‘asia atu lenei faupuega ‘iā te oe, ‘e te lē la‘asia mai fo‘i lenei faupuega ma lenei fa‘ailoga ‘iā te a‘u, e fai ai se mea leaga.
53 O le Atua o Aperaamo, o le Atua fo‘i o Nakori,” o le Atua o lo lā‘ua tamā, “‘ia fa‘amasino mai o ia ‘iā te i tā‘ua.” ‘Ona tautō ai lea o Iakopo i lē ‘ua mata‘u i ai lona tamā o Isaako.
54 ‘Ona fasi lea e Iakopo ni manu i le mauga, ‘ua fai atu fo‘i i ona uso e ō mai e ‘a‘ai; ‘ona latou ‘a‘ai ai lea, ‘ua latou nonofo pea fo‘i i le mauga i lea po.
55 ‘Ona tula‘i lea o Lapana i le taeao lava ma taufeasogi ma ona atali‘i ma ona afafine, ‘ua ia fa‘amanuia atu fo‘i ‘iā te i latou ‘ona alu lea o Lapana ma toe fo‘i atu i lona nu‘u.