1 ‘Ua mavae ia mea, ‘ona tofotofo lea o le Atua ‘iā Aperaamo, ‘ua fa‘apea mai ‘iā te ia, “Aperaamo e;” ‘ona tali atu lea o ia, “O a‘u lenei.”
2 ‘Ona fetalai mai lea o ia, “‘ia e ‘ave lou atali‘i, o lou atali‘i e to‘atasi, o lē ‘ua pele ‘iā te oe, o Isaako lava ma e alu i le nu‘u o Moria; ma avatu ‘iā te ia e fai ma taulaga mū i lea mea i le tasi mauga ‘ou te ta‘uina atu ai ‘iā te oe.”
3 ‘Ona ala tula‘i lea o Aperaamo i le taeao ma fa‘anofoa lana asini, ‘ua ‘ave fo‘i e ia ni ona taulele‘a e to‘alua ma Isaako lona atali‘i; ma na taisi fafie e fai a‘i le taulaga mū, ‘ona tula‘i lea o ia ma alu i le mea na ta‘uina mai ai e le Atua ‘iā te ia.
4 ‘Ua o‘o i le aso tolu ‘ona tepa a‘e lea o Aperaamo ma ‘ua iloa lea mea ‘ae mamao.
5 ‘Ua fai atu fo‘i Aperaamo i ona taulele‘a, “Tali atu ia ‘i‘inei ma le asini, a o a‘u ma le tama ma te ō i o e tapua‘i ai, i le ma toe fo‘i mai ‘iā te ‘oulua.”
6 ‘Ua ‘ave fo‘i e Aperaamo le fafie e fai a‘i le taulaga mū ma fa‘ae‘e ai ‘iā Isaako lona atali‘i, ‘ua ‘ave fo‘i e ia i ona lima le afi ma le polo, ‘ona ō ai lea o i lā‘ua.
7 ‘Ona fai atu lea o Isaako i lona tamā o Aperaamo, ‘ua fa‘apea atu, “Lo‘u tamā e.”‘Ona tali mai lea o ia, “Lo‘u atali‘i e, o a‘u lenei.”‘Ona fai atu lea o ia, “Fa‘auta, o le afi ma le fafie; a o ifea se tama‘i mamoe e fai a‘i le taulaga mū?”
8 ‘Ona tali mai lea o Aperaamo, “Lo‘u atali‘i e, e ‘aumai e le Atua se tama‘i mamoe māna e fai a‘i le taulaga mū.” ‘Ona ō fa‘atasi ai lea o i lā‘ua.
9 ‘Ua o‘o atu lā‘ua i le mea na ta‘uina mai ai e le Atua ‘iā te ia; ‘ona faia lea e Aperaamo o le fatafaitaulaga i lea mea, ma fa‘aafu le fafie; ‘ua na fusifusi fo‘i lona atali‘i o Isaako ma fa‘ae‘e ‘iā te ia i le fata i luga o le fafie.
10 ‘Ona ‘a‘apa atu lea o Aperaamo lona lima i le polo, o le a fasioti lona atali‘i.
11 ‘Ona vala‘au ifo lea o le agelu a le ALI‘I ‘iā te ia mai le lagi, ‘ua fa‘apea mai, “Aperaamo, Aperaamo e;”I le ‘ua tali atu o ia, “O a‘u lenei.”
12 ‘Ona fetalai mai lea o ia, “Sōia le o‘o lou lima i le tama, ‘aua fo‘i ‘e te fai se mea e tasi ‘iā te ia; auā ‘ua ‘ou iloa nei ‘ua e mata‘u i le Atua, ‘ina ‘ua e lē tāofia lou atali‘i, o lou atali‘i e to‘atasi, a ‘ua e tu‘u mai ‘iā te a‘u.”
13 ‘Ona tepa a‘e lea o Aperaamo, ‘ua iloa atu, fa‘auta, o le mamoe po‘a i ona tua ‘ua lavelavea ona nifo i le la‘au filifili; ‘ona alu lea o Aperaamo ma ‘aumai le mamoe po‘a, ‘ua osi ai le taulaga mū e sui a‘i lona atali‘i.
14 ‘Ona fa‘aigoa ai lea e Aperaamo o lea mea “O le ALI‘I na te ‘aumaia,” e pei ‘ona fai mai ai i nei ona po, “E iloa le ALI‘I i le mauga.”
15 ‘Ua toe vala‘au ifo le agelu a le ALI‘I ‘iā Aperaamo mai le lagi,
16 ‘ua fa‘apea mai, “O lo‘o fa‘apea a le ALI‘I, ‘ua ‘ou tautō a‘u ‘iā te a‘u; ‘ua e faia lava lenei mea, ‘ua e lē tāofia lou atali‘i, o lou atali‘i e to‘atasi;
17 o le mea lea ‘ou te matuā fa‘amanuia ai ‘iā te oe, ma ou matuā fa‘ato‘ateleina lava lau fānau e pei o fetū o le lagi e pei o le oneone fo‘i i le matāfaga; e maua fo‘i e lau fānau faitoto‘a o ē ita ‘iā i latou.
18 O lau fānau fo‘i e manuia ai atu nu‘u uma lava o le lalolagi auā ‘ua e usiusita‘i i la‘u ‘upu.”
19 ‘Ua toe fo‘i Aperaamo i ona taulele‘a; ‘ona latou tula‘i lea ma latou ō fa‘atasi i Peresepa; ‘ua mau ai fo‘i Aperaamo i Peresepa.
20 ‘Ua mavae fo‘i ia mea, ‘ona ta‘ua mai lea ‘iā Aperaamo, ‘ua fa‘apea mai, “Fa‘auta mai, ‘ua fānau fo‘i e Meleka ana tama i lou uso o Nakori.
21 O lana ulumatua o Usa, ma lona uso o Pusa, ma Kimueli le tamā o Arama,
22 ma Kiseta, ma Haso, ma Pilitaso, ma Itelafo, ma Petueli.”
23 ‘Ua fānaua fo‘i e Petueli o Repeka; o i latou nei e to‘avalu ‘ua fānau mai e Meleka ‘iā Nakori le uso o Aperaamo.
24 O lana palake fo‘i, o Reuma lona igoa, ‘ua fānau mai fo‘i e ia o Tepa, ma Kaamo, ma Taaso, ma Maaka.