1 ‘Ua toeaina lava Aperaamo, ‘ua tele ona tausaga; ‘ua fa‘amanuia fo‘i le ALI‘I ‘iā Aperaamo i mea uma.
2 ‘Ona fai atu lea o Aperaamo i lana ‘au‘auna o le toeaina o le ‘āiga, sa pule i ana mea uma, “Se‘i sulu mai ia lou lima i lalo o lo‘u aloivae;
3 ma ‘ia e tautō mai ‘ia te a‘u i le ALI‘I, o le Atua o le lagi, ma le Atua o le lalolagi, ‘e te lē ‘aumai se avā a lo‘u atali‘i i fafine o Kanana, o le nu‘u ‘ou te nofo ai nei.
4 A ‘ia e alu atu i lo‘u nu‘u ma lo‘u ‘āiga, ma e ‘aumai ai se avā ma lo‘u atali‘i o Isaako.”
5 ‘Ona tali mai lea o le ‘au‘auna ‘iā te ia, “Pe ‘āfai e lē mafai le fafine ‘ona mā ō mai i le nu‘u nei, ma te matuā ō atu ‘ea ma lou atali‘i i le nu‘u na e sau ai?”
6 ‘Ona fai atu lea o Aperaamo ‘iā te ia, “‘Ia oe, ne‘i e ‘ave lava lo‘u atali‘i i lea mea.
7 O le ALI‘I, o le Atua o le lagi, o lē na ‘aumaia a‘u mai le ‘āiga o lo‘u tamā ma le nu‘u o lo‘u ‘āiga, o lē na fetalai mai fo‘i ‘iā te a‘u, ma na tautō mai ‘iā te a‘u, na fa‘apea mai, ‘‘Ou te foa‘iina lenei lava nu‘u mo lau fānau;’ e ‘auina atu e ia lava o lana agelu e muamua ‘iā te oe; ‘e te ‘aumai fo‘i se avā ma lo‘u atali‘i ai lea mea.
8 ‘Ae ‘āfai e lē mafai le fafine ona ‘oulua ō mai ma ia, ‘ona e māgalo ai lea ai lau tautoga nei; ‘ae ‘aua lava lua te ō atu ma lo‘u atali‘i i lea mea.”
9 ‘Ona sulu ai lea e le ‘au‘auna o lona lima i lalo o le aloivae o Aperaamo lona matai, ma tautō atu ‘iā te ia i lea mea.
10 ‘Ona ‘ave lea e le ‘au‘auna o kamela e sefulu, ai kamela a lona matai, ‘ua alu fo‘i o ia ma mea lelei uma a lona matai i lona lima; ‘ua tula‘i fo‘i o ia ma alu atu i Mesopotamia i le ‘a‘ai o Nakori.
11 ‘Ona fai atu lea o ia ‘ia to‘otuli kamela i tua o le ‘a‘ai, e lata ane i le vai‘eli, i le afiafi, i le itū aso e ō atu ai fafine e utu vai.
12 ‘Ona fa‘apea atu lea o ia:“Le ALI‘I e, le Atua o lo‘u matai o Aperaamo, ‘ia e fa‘amanuia lava ‘iā te a‘u i le asō, ma e alofa mai fo‘i i lo‘u matai o Aperaamo.
13 Fa‘auta, o a‘u nei, ‘ou te tu i luga o le vaipuna; o le a ō mai fo‘i afafine o tagata o le ‘a‘ai e utu vai;
14 ‘ia fa‘apea ‘ona fai, o le teine ‘ou te fa‘apea atu i ai, ‘Se‘i ē tu‘utu‘u ifo lau kate so‘u inu a‘e;’ ‘ona fa‘apea mai lea o ia, ‘‘Inā inu ia, ‘ou te fa‘ainua fo‘i a‘u kamela;’ o le teine lea ‘ua e tofia ma lau ‘au‘auna o Isaako; ‘ou te iloa fo‘i i lea mea ‘ua e alofa mai i lo‘u matai.”
15 Fa‘auta fo‘i, e le‘i uma atu lana ‘upu, a ‘ua sau Repeka, o le afafine o Petueli le tama tane lea a Meleka, le avā a Nakori, o le uso o Aperaamo, sa i lona ua lana kate.
16 O le teine e matuā lālelei lava, o le taupou, e le‘i iloa e ia se tane; ‘ua alu ifo o ia i le vai, ‘ua utu ai lana kate, ma toe alu a‘e.
17 ‘Ona momo‘e atu lea o le ‘au‘auna e fa‘afetaia‘i ‘iā Repeka, ‘ua fa‘apea atu, “So‘u inu a‘e sina vai a‘i lau kate.”
18 ‘Ona fa‘apea mai lea o Repeka, “Le ali‘i e, taumafa ia;” ‘ona vave tu‘u ifo lea e ia o lana kate i lona lima ma tu‘u atu ‘iā te ia e inu ai.
19 ‘Ua uma ‘ona avatu ‘iā te ia e inu ‘ona fa‘apea atu lea o Repeka, “‘Ou te utufia fo‘i ma au kamela, se‘ia latou feinu ai ‘ia malilie.”
20 ‘Ona fa‘ata‘alise lea o Repeka ma sasa‘a lana kate i le umete, ‘ona toe momo‘e ifo lea o ia i le vai e utu a‘e, i le ‘ua utu a‘e e ia ma ana kamela uma.
21 O le tagata fo‘i, ‘ua ofo o ia ‘iā Repeka; ‘ua fa‘alologo i le fia iloa po ‘ua, fa‘amanuia e le ALI‘I lana malaga pe leai.
22 ‘Ua uma ‘ona feinu o kamela, ‘ona avatu lea e le tagata o le mama auro, o le vaeluagalemū o le sekeli lona mamafa, ma taulima auro e lua mo ona lima, e sefulu sekeli o lo la mamafa lea;
23 ‘ua fa‘apea atu fo‘i o ia, “Se‘i e ta‘u mai ‘iā te a‘u, pe se afafine oe o ai? Pe ai ‘ea se mea i le fale o lou tamā matou te api ai?”
24 ‘Ona tali mai lea o Repeka ‘iā te ia, “O a‘u o le afafine o Petueli o le tama ia a Meleka, na fānau e ia ‘iā Nakori.”
25 ‘Ua fa‘apea mai fo‘i Repeka ‘iā te ia, “O ‘iā i matou ‘au o saito, ma mea e ‘ai e tele a manu, ‘atoa ma le mea e api ai.”
26 ‘Ona punou lea o le tagata, ma ifo atu i le ALI‘I.
27 ‘Ua fa‘apea atu fo‘i o ia, “‘Ia fa‘afetaia le ALI‘I o le Atua o lo‘u matai o Aperaamo, o lē ‘ua lē tu‘ua lona alofa ma lona fa‘amaoni i lo‘u matai; na ‘ou i le ala, ‘ona ta‘ita‘iina ai lea o a‘u e le ALI‘I i le fale o uso o lo‘u matai.”
28 ‘Ona momo‘e lea o le teine ma ta‘u atu ia mea i le ‘āiga o lona tinā.
29 Sa ‘iā Repeka le tuagane o Lapana lona igoa; ‘ua momo‘e mai fo‘i Lapana i le tagata i le vaipuna.
30 ‘Ua iloa e ia o le mama auro ma taulima i lima o lona tuafafine, ‘ua fa‘alogo atu fo‘i i ‘upu a lona tuafafine o Repeka, ‘ua fa‘apea mai, “Na fa‘apea ‘ona tautala mai o le tagata ‘iā te a‘u,” ‘ona alu lea o ia i le tagata, fa‘auta fo‘i, ‘ua tu o ia ma kamela i luga o le vaipuna,
31 ‘ona fa‘apea mai lea o Lapana, “Maliu mai ia o oe ‘ua fa‘amanuia e le ALI‘I; se a le mea ‘ua e tu ai i fafo? Auā ‘ua uma ‘ona ‘ou teuteua o le fale ma le mea e ‘ave i ai kamela.”
32 ‘Ona ulufale lea o le tagata i le fale; ‘ona tatalaina lea e Lapana o kamela, ma avane ‘au o saito ma mea e ‘ai ma kamela, ma vai fo‘i e mulumulu ai ona vae, ma vae o tagata na ō mai ma ia.
33 ‘Ona laulauina mai ai lea ‘iā te ia o mea e ‘ai; a ‘ua fa‘apea atu le tagata, “‘Ou te lē ‘ai lava, se‘ia uma ‘ona ‘ou ta‘u atu o la‘u fe‘au.” ‘Ona fa‘apea atu lea o Lapana, “‘Inā ta‘u mai ia.”
34 ‘Ona fa‘apea mai lea o le tagata, “O a‘u o le ‘au‘auna a Aperaamo.
35 ‘Ua fa‘amanuia tele lava e le ALI‘I lo‘u matai; ‘ua mamalu lava o ia; ‘ua foa‘iina fo‘i e ia ‘iā te ia o lafu mamoe, ma lafu povi, ma ario, ma auro, ma ‘au‘auna tane ma ‘au‘auna fafine, ma kamela, ‘atoa ma asini.
36 O Sara fo‘i le avā a lo‘u matai na fānau e ia le atali‘i o lo‘u matai ‘ina o lo‘omatua ‘ua foa‘iina atu fo‘i e Aperaamo ‘iā te ia o ana mea uma.
37 O a‘u fo‘i, na ‘ou tautō ‘ina ‘ua fai mai ai o lo‘u matai, ‘ua fa‘apea mai, ‘‘E te lē ‘aumai se avā ma lo‘u atali‘i i fafine o Kanana, o le nu‘u ‘ou te nofo ai nei.
38 A ‘ia e alu atu i le ‘āiga o lo‘u tamā, ma lo‘u ‘āiga, ma ‘aumai ai se avā ma lo‘u atali‘i.’
39 “‘Ona ‘ou tali atu lea i lo‘u matai, ‘Atonu e lē mafai le fafine ‘ona mā ō mai.’
40 ‘Ona fa‘apea mai lea o ia ‘iā te a‘u, ‘O le ALI‘I, o lo‘o savali a‘u nei i ona luma e ‘auina atu e ia lana agelu lua te ō fa‘atasi ma ia, na te fa‘amanuia ai lau malaga; ‘e te ‘aumai fo‘i se avā ma lo‘u atali‘i mai lo‘u ‘āiga, ma le ‘āiga o lo‘u tamā.
41 ‘E te māgalo i lau tautō, pe a e o‘o i lo‘u ‘āiga; ‘āfai fo‘i latou te lē tu‘ua mai se tasi ‘iā te oe, ‘ona e māgalo ai lea i lau tautō.’
42 “Na ‘ou sau fo‘i i le aso nei i le vaipuna, ma ‘ou fa‘apea atu, ‘Le ALI‘I e, le Atua o lo‘u matai o Aperaamo, ‘āfai ‘e te fa‘amanuia lava la‘u malaga ‘ua ‘ou sau ai;
43 fa‘auta, o a‘u nei, ‘ou te tu i luga o le vaipuna, ‘ia fa‘apea ‘ona fai, o le taupou e sau e utu vai, ma ‘ou fa‘apea atu i ai, “Se‘i ‘aumai sina vai, so‘u inu a‘e ai lau kate.”
44 ‘Ona tali mai lea o ia ‘iā te a‘u, “‘Inā inu ia oe, ‘ou te utufia fo‘i ma au kamela;” o le avā lea ‘ua tofia e le ALI‘I ma le atali‘i o lo‘u matai.’
45 “Na lē uma fo‘i ‘ona ‘ou fa‘apea ifo i lo‘u loto, fa‘auta, ‘Ua sau Repeka, ‘ua fa‘afuata mai lana kate; ‘ona alu ifo lea o ia i le vaipuna ma utu a‘e ai; ‘ona ‘ou fa‘apea atu lea ‘iā te ia, ‘So‘u inu a‘e.’
46 ‘Ona vave tu‘u ifo lea e ia o lana kate, ma fa‘apea mai, ‘‘Inā inu ia, ‘ou te fa‘ainua fo‘i au kamela.’ ‘Ona ‘ou inu lea; na fa‘ainua fo‘i e ia o kamela.
47 ‘Ona ‘ou fesili atu lea ‘iā te ia, ‘Pe se afafine oe o ai?’ ‘Ona tali mai lea o ia, ‘O le afafine o Petueli le atali‘i o Nakori, sa fānau ‘iā te ia e Meleka.’ ‘Ona ‘ou tu‘u atu lea o le mama i lona fofoga ma taulima i ona lima.
48 ‘Ona ‘ou punou lea, ma ifo atu i le ALI‘I, ma fa‘afetai atu i le ALI‘I le Atua o lo‘u matai o Aperaamo, o lē na ta‘ita‘i ‘iā te a‘u i le ala tonu, e ‘aumai le afafine o le uso o lo‘u matai e fai ma avā a lona atali‘i.
49 O lenei fo‘i, tou te ta‘u mai, pe tou te alofa ma fa‘amaoni i lo‘u matai; ‘ae ‘āfai e leai, ta‘u mai ‘iā te a‘u, ‘ina ‘ia ‘ou fa‘asaga i le itū taumatau po‘o le itū tauagavale.”
50 ‘Ona tali mai lea o Lapana ma Petueli, ‘ua fa‘apea mai. “‘Ua tupu mai i le ALI‘I lenā mea; ma te lē mafai ‘ona fai atu ‘iā te oe i sona lelei po o sona leaga.
51 Fa‘auta, o Repeka i ou luma ia; ‘inā ō ia ‘oulua ma ia, ‘ia fai o ia ma avā a le atali‘i o lou matai, e pei ‘ona fetalai mai ai o le ALI‘I.”
52 ‘Ua fa‘alogo atu le ‘au‘auna a Aperaamo ‘iā la ‘upu, ‘ona ifo to‘ele lea o ia i le ALI‘I.
53 ‘Ona ‘aumai lea e le ‘au‘auna o teuga ario, ma teuga auro, ‘atoa ma ‘ofu ma avatu ‘iā Repeka; ‘ua ia foa‘i atu fo‘i i lona tuagane ma lona tinā o ‘oloa tāua.
54 ‘Ona latou ‘a‘ai ai lea ma inu, o ia ma tagata na latou ō mai ma ia, ‘ona latou momoe ai lea; ‘ua latou tula‘i fo‘i i le taeao, ‘ona fa‘apea atu lea o ia, “Tu‘u mai ‘iā te a‘u ‘ia ‘ou alu atu i lo‘u matai.”
55 ‘Ona tali mai lea o lona tuagane ma lona tinā, “Se‘i matou nonofo ma le teine i ni aso pe toe sefulu; a mavae mai ia, i le alu ai o ia.”
56 ‘Ona fa‘apea atu lea o ia ‘iā te i lā‘ua, “‘Aua lua te tāofi ‘iā te a‘u, auā ‘ua fa‘amanuia mai e le ALI‘I la‘u malaga; tu‘u mai ‘iā te a‘u ‘ia ‘ou alu atu i lo‘u matai.”
57 ‘Ona tali mai lea o lā‘ua, “Se‘i, ma vala‘auina ane le teine ma fesili atu pe se a lona loto.”
58 ‘Ona vala‘au ane lea o i lā‘ua ‘iā Repeka, ‘ua fa‘apea atu fo‘i ‘iā te ia, “Lua te ō ‘ea ma le ali‘i nei”‘Ona tali mai lea o ia, “Ma te ō.”
59 ‘Ona latou tu‘uina atu lea o Repeka lo latou tuafafine ma lē na tausi ‘iā te ia, ma le ‘au‘auna a Aperaamo, ‘atoa ma ona tagata.
60 ‘Ua latou fa‘amanuia atu fo‘i ‘iā Repeka, ‘ua fa‘apea atu ‘iā te ia,“O oe o lo matou tuafafine, ‘ia ‘avea oe ma tinā, o afe e mano,‘ia maua fo‘i e lau fānau o faitoto‘a o ē ita mai ‘iā te i latou.”
61 ‘Ona tula‘i lea o Repeka, ma ona teine, ma latou ti‘eti‘e i kamela, ma mulimuli atu i le tagata; ‘ua ‘aumai Repeka e le ‘au‘auna a Aperaamo, ‘ona latou ō ai lea.
62 ‘Ua sau fo‘i Isaako i le ala e ui i Perelaaroi, auā sa mau o ia i le nu‘u i le itū i saute.
63 ‘Ua alu atu fo‘i Isaako i le fanua i le afiafi e mafaufau ai; ‘ua tepa a‘e fo‘i o ia ma iloa atu, fa‘auta fo‘i, o kamela ‘ua ō mai.
64 ‘Ua tepa a‘e fo‘i Repeka ‘ua na iloa atu ‘iā Isaako, ‘ona alu ifo lea o ia i le kamela.
65 Auā na ia fesili atu i le ‘au‘auna, “O ai lenā tagata ē savali mai i le fanua e fa‘afetaia‘i ‘iā te i tatou.”Na tali mai fo‘i le ‘au‘auna, “O lo‘u matai o ia.” ‘Ona tago ai lea o ia i le ufiufi mata, ma ufi ifo ai ‘iā te ia.
66 ‘Ua fa‘amatalaina atu fo‘i e le ‘au‘auna ‘iā Isaako mea uma lava na faia e ia.
67 ‘Ona ta‘ita‘i atu lea e Isaako ‘iā te ia i le fale ‘ie o lona tinā o Sara, ‘ua ‘ave e ia o Repeka, ‘ua fai fo‘i o ia ma ana avā ‘ua fiafia fo‘i Isaako ‘iā te ia; ‘ona fa‘ato‘ā fa‘amafanafanaina ai lea o Isaako talu ‘ona oti o lona tinā.