1 ‘Ua ia fai atu fo‘i i lē na pule i lona ‘āiga, ‘ua fa‘apea atu, “‘Ia fa‘atūtūmu taga a ia tagata i mea e ‘ai, ‘ia tu‘ugataina i latou; ‘ia tu‘u fo‘i tupe a le tagata ta‘itasi i le gutu o lana taga.
2 ‘Ia tu‘u fo‘i la‘u ipu fa‘a‘ofu‘ofu, le ipu ario i le gutu o le taga a lē aupito itiiti, ‘atoa ma tupe o lana saito.” ‘Ona faia lea e ia fa‘apei ‘ona fai atu ai e Iosefa.
3 ‘Ua malama a‘e le taeao, ‘ona ‘a‘auina atu lea o ia tagata, o i latou ‘atoa ma a latou asini.
4 ‘Ua tuana‘i e i latou le ‘a‘ai, ‘ae le‘i mamao fo‘i, ‘ona fai atu ai lea o Iosefa i lē ‘ua pule i lona ‘āiga, “Tū ia i luga, tuliloa atu ia i nā tagata; pe a e maua atu fo‘i ‘iā te i latou, ‘ia e fai atu i ai, ‘Se a le mea ‘ua ‘outou taui mai ai le lelei i le leaga?
5 E lē o le mea ‘ea lenā e inu ai lo‘u ali‘i ma ‘ua ‘i‘ite ai lava? ‘ua ‘outou agaleaga mai i le mea ‘ua ‘outou faia.’”
6 Na ia maua atu fo‘i ‘iā te i latou, ‘ona fai atu ai lea ‘iā te i latou ia lava ‘upu.
7 ‘Ona latou fai mai ai lea ‘iā te ia. “Se a ‘ea le mea e fa‘apea mai ai ia ‘upu e le ali‘i? e mamao ma au ‘au‘auna ‘ona latou fai se mea fa‘apenā.
8 Fa‘auta ‘ea, o tupe na matou maua i gutu o a matou taga na matou toe ‘aumai ‘iā te oe ai le nu‘u o Kanana; se a le mea a matou gaoi ai ario po o auro i le maota o lou ali‘i?
9 O so matou o au ‘au‘auna e maua ai le mea, ‘ia oti lava ia; e fai fo‘i i matou ma pologa ‘iā te oe lo matou ali‘i.”
10 ‘Ona fai atu ai lea o ia, “O lenā lava, ‘ia faia a ‘outou ‘upu; o lē ‘ua i ai le mea ia fai lea mo‘u pologa, ‘ae māgalo ‘outou.”
11 ‘Ona latou ta‘itasi ai lea ma vave tu‘u i lalo lana taga i le ‘ele‘ele, ‘ua ta‘itasi fo‘i ma tatala lana taga.
12 ‘Ona ia su‘esu‘e ai lea, ‘ua amata i le aupito matua, ‘ua o‘o i le aupito itiiti, ‘ua maua fo‘i le ipu i le taga a Peniamina.
13 ‘Ona latou saei ai lea o latou ‘ofu, ‘ua ta‘itasi ma fa‘ae‘e le avega i lana asini ma latou fo‘i atu i le ‘a‘ai.
14 ‘Ua ō mai Iuta ma ona uso i le fale o Iosefa, auā na i ai pea ia; ‘ona latou fa‘apa‘u‘ū faō mai ai lea i ona luma.
15 ‘Ona fai atu ai lea o Iosefa ‘iā te i latou, “Se a lenei mea ‘ua ‘outou faia? po ‘ua ‘outou lē iloa ‘ea e mafai lava e le tagata fa‘apei o a‘u nei ‘ona ‘i‘ite?”
16 ‘Ona tali mai lea o Iuta, “Se a se mea matou te fai atu i lo matou ali‘i? se a sa matou ‘upu? pe fa‘apefea ‘ona matou fa‘atonuina atu o i matou? ‘Ua fa‘aalia e le Atua le agasala a au ‘au‘auna; fa‘auta, o ‘au‘auna i matou ‘iā te oe lo matou ali‘i, o i matou ‘atoa ma lē ‘ua maua ‘ua i ai le ipu.”
17 ‘Ona fai atu ai lea o ia, “E mamao ‘iā te a‘u ‘ona ‘ou fai lea mea; o lē ‘ua maua ‘ua i ai le ipu, e fai lea ma a‘u ‘au‘auna, a o ‘outou, ō pea ia ‘outou ma le manuia i lo ‘outou tamā.”
18 ‘Ona sōsō mai ai lea o Iuta ‘iā te ia, ‘ua fa‘apea mai:“Le ali‘i e, tu‘u mai ia i lau ‘au‘auna se‘i fai atu se ‘upu e fa‘afofoga i ai oe le ali‘i, ‘aua fo‘i ne‘i e to‘atama‘i ai i lau ‘au‘auna; auā o oe e fa‘apei o Farao lava.
19 Le ali‘i e, na e fesili mai i au ‘au‘auna, ‘ua fa‘apea mai, ‘Pe i ai so ‘outou tamā, po o so ‘outou uso?’
20 ‘Ona matou fai atu ai lea ‘iā te oe lo matou ali‘i, ‘O lo matou tamā lava, o le toeaina, ma le tama na fānaua e ia ‘ina ‘ua toeaina, o le tama itiiti; ‘ua oti fo‘i lona uso, o le toe tama fo‘i ia a lona tinā, e fa‘apelepele lava lona tamā, ‘iā te ia.’
21 ‘Ona e fetalai mai lea i au ‘au‘auna, ‘‘Ia ‘aumai o ia ‘iā te a‘u, ‘ou te matamata i ai.’
22 ‘Ona matou fai atu ai lea i lo matou ali‘i, ‘E lē mafai ‘ona tu‘ua e le tama lona tamā; auā pe ‘āfai na te tu‘ua lona tamā e oti lava lona tamā.’
23 ‘Ona e fetalai mai ai lea i au ‘au‘auna, ‘‘Āfai tou te lē ō mai ma lo ‘outou uso aupito itiiti, tatou te lē toe fesilafa‘i.’
24 ‘Ua ō a‘e i matou i lau ‘au‘auna o lo matou tamā, ‘ona matou ta‘u atu ai lea ‘iā te ia le fetalaiga a lo matou ali‘i.
25 ‘Ua fai mai fo‘i lo matou tamā, ‘Toe ō ia e fa‘atau mai sina mea e ‘ai ma tatou.’
26 ‘Ona matou fai atu ai lea, ‘E lē mafai ‘ona matou ō ifo; ‘ae ‘āfai matou te ō ma lo matou uso aupito itiiti, ‘ona matou ō ifo ai lea; auā e lē mafai ‘ona matou iloa o fofoga o le ali‘i pe ‘āfai e lē i ai ‘iā te i matou lo matou uso aupito itiiti.’
27 ‘Ona fai mai ai lea o lau ‘au‘auna, o lo matou tamā, ‘iā te i matou. ‘‘Ua ‘outou iloa na fānau mai la‘u avā ‘iā te a‘u o atali‘i e to‘alua.
28 Na alu ‘ese fo‘i le tasi ‘iā te a‘u, ‘ona ‘ou fa‘apea ane ai lea, Ai lava ‘ua saeia lava ia, ‘ou te le‘i toe iloa fo‘i ia talu ai.
29 ‘Āfai tou te ‘ave‘eseina fo‘i lenei ‘iā te a‘u, a o‘o atu fo‘i ‘iā te ia se leaga, tou te ‘aveina ifo ai ‘ou lauulu sinā i le tu‘ugamau ma le fa‘anoanoa.’
30 O lenei, pe a a‘u alu atu i lau ‘au‘auna o lo‘u tamā, ‘ae lē o ‘iā te i matou le tama, auā o le ola o le tama e ola ai o ia,
31 pe a iloa e ia e lē o i ai le tama, ‘ona oti ai lea; ‘ona ‘aveina ifo ai lea e au ‘au‘auna o lauulu sinā o lau ‘au‘auna, o lo matou tamā, i le tu‘ugamau ma le fa‘anoanoa.
32 Auā na fai lau ‘au‘auna ma moni o le tama i lo‘u tamā, ‘ua fa‘apea atu, ‘‘Āfai ‘ou te lē toe ‘aumaia o ia ‘iā te oe, ‘ona ‘ou nofo sala ai lea i lo‘u tamā i aso uma.’
33 O lenei, ‘ou te ‘ai‘oi atu, ‘ia nofo a‘u o lau ‘au‘auna e fai ma pologa i lo‘u ali‘i e sui a‘i le tama, a ‘ia alu a‘e le tama fa‘atasi ma ona uso;
34 auā ‘ou te mafaia fa‘apefea ‘ona alu a‘e i lo‘u tamā, ‘ae lē o ‘iā te a‘u le tama? ne‘i ou iloa le leaga e o‘o i lo‘u tamā.”