1 ‘Ona alu ane lea o Iosefa ‘iā Farao ma na ta‘u atu ‘iā te ia, o lo‘o fa‘apea atu, “‘Ua ō mai mai le nu‘u o Kanana o lo‘u tamā, ma o‘u uso ma a latou lafu mamoe ma a latou povi ma mea uma lava o lo‘o ‘iā i latou; fa‘auta fo‘i, o lo‘o i le lau‘ele‘ele o Kosena i latou.”
2 ‘Ua ‘ave fo‘i e ia i ai ona uso o tagata e to‘alima ma tu‘u atu i latou i luma o Farao.
3 ‘Ona fai mai lea o Farao i ona uso, “Se a ‘ea lo ‘outou faiva.”‘Ona tali atu lea o i latou ‘iā Farao, “O leoleo mamoe au nei ‘au‘auna, o i matou nei ‘atoa ma o matou tamā.”
4 ‘Ua latou fai atu fo‘i ‘iā Farao, “‘Ua matou ō mai, matou te āumau i le nu‘u nei, auā ‘ua leai ni mea e faga a‘i lafu mamoe a au ‘au‘auna, ‘ina ‘ua velavela le oge i le nu‘u o Kanana; o lenei, pe te finagalo ‘ia nonofo au ‘au‘auna i le lau‘ele‘ele o Kosena.”
5 ‘Ona fai mai lea o Farao ‘iā Iosefa, o lo‘o fa‘apea mai, “‘Ua ō mai ‘iā te oe lou tamā ma ou uso;
6 o lo‘o i ou luma lava le lau‘ele‘ele o Aikupito; ‘ia e tu‘uina atu lou tamā ma ou uso e nonofo i le fanua e sili ‘ona lelei; ‘ia nonofo i latou i le lau‘ele‘ele o Kosena; ‘āfai fo‘i ‘ua e iloa ni o latou ‘ua malolosi, ‘ia fai i latou ma leoleo sili i a‘u manu.”
7 ‘Ona ‘aumai lea e Iosefa o lona tamā o Iakopo, ma ‘ua tu‘u atu ‘iā te ia i luma o Farao; ‘ona fa‘amanuia lea e Iakopo ‘iā Farao.
8 ‘Ona fai mai lea o Farao ‘iā Iakopo, “E fia ‘ea tausaga o lou olaga?”
9 ‘Ona fai atu lea o Iakopo ‘iā Farao, “O tausaga ‘ua ‘ou āumau ai, o tausaga ia e tasi le selau ma le tolugafulu; ‘ua itiiti ma ‘ua leaga tausaga o lo‘u nei olaga e le‘i o‘o i tausaga o olaga o o‘u tamā i o latou aso na latou āumau ai.”
10 ‘Ona fa‘amanuia lea e Iakopo ‘iā Farao, ‘ona alu ‘ese lea o ia i luma o Farao.
11 ‘Ona tu‘u atu lea e Iosefa le nu‘u e mau ai lona tamā ma ona uso ma na avatu ai e fai mo latou i le nu‘u o Aikupito i le fanua ‘ua sili ‘ona lelei, o le nu‘u o Ramese fa‘apei ‘ona poloa‘i i ai o Farao.
12 ‘Ua fagaina fo‘i e Iosefa lona tamā, ma ona uso ma le ‘āiga ‘atoa uma o lona tamā i le mea e ‘ai ‘ua o‘o lava i o latou tamaiti.
13 Sa leai fo‘i sina mea e ‘ai i le nu‘u ‘atoa, auā ‘ua matuā velavela le oge, ‘ua lailoa fo‘i le nu‘u o Aikupito ma le nu‘u o Kanana ‘ona o le oge.
14 ‘Ona fa‘apotopotoina lea e Iosefa o tupe uma lava na maua i le nu‘u o Aikupito ma le nu‘u o Kanana mo le saito na fa‘atauina e i latou; ‘ua ‘ave fo‘i e Iosefa o tupe i le fale o Farao.
15 ‘Ua uma fo‘i tupe i le nu‘u o Aikupito ma le nu‘u o Kanana, ‘ona ō ane lea o Aikupito uma ‘iā Iosefa, ‘ua fa‘apea mai, “‘Ia e ‘aumai ‘iā te i matou ni mea e ‘ai. Ai lava a matou oti i ou luma, auā ‘ua uma tupe.”
16 ‘Ona fai atu lea o Iosefa, “‘Inā ‘aumai ia a ‘outou manu, ‘ou te fa‘atauina a ‘outou manu i mea e ‘ai ma ‘outou, pe ‘āfai ‘ua uma tupe.”
17 ‘Ona latou avane lea a latou manu ‘iā Iosefa; ‘ona avatu lea e Iosefa ‘iā te i latou o mea e ‘ai e fa‘atau a‘i solofanua ma lafu mamoe ma lafu povi, ‘atoa ma asini; na ia fagaina fo‘i i latou i lea tausaga o le totogi lea o a latou lafu uma.
18 ‘Ua mavae fo‘i lea tausaga, ‘ona ō ane lea o i latou ‘iā te ia i lona lua o tausaga, ma latou fai mai ‘iā te ia:“Matou te lē nanā i lo matou ali‘i, ‘ua uma tupe o i lo matou ali‘i fo‘i a matou lafu manu; ‘ua lē toe lava sina mea ‘iā i matou i luma o lo matou ali‘i, ‘ua na o matou tino ma o matou fanua,
19 Ai lava a matou oti i ou luma, o i matou lava, ‘ae tu‘ufua lo matou fanua. ‘ia e fa‘atauina atu i matou ma lo matou fanua i mea e ‘ai, ‘ona fai lea o i matou ma ‘au‘auna a Farao, o i matou ma lo matou fanua; ma ‘ia e foa‘iina mai ni mea e totō ‘ina ‘ia ola i matou, ne‘i oti i matou ‘ae lē ‘ainā le fanua.”
20 ‘Ona fa‘atauina lea e Iosefa le fanua uma lava o Aikupito mo Farao; auā na fa‘atauina atu e Aikupito o ta‘ito‘atasi ma lona fanua; auā sa manumālō le oge ‘iā i latou; i le ‘ua ‘avea le fanua mo Farao.
21 O le nu‘u fo‘i na ‘aumaia i latou e ia i ‘a‘ai e gata mai i le tasi tuā‘oi o Aikupito e o‘o atu lava i le tasi tuā‘oi.
22 Na o fanua o le ‘au ositaulaga, e le‘i fa‘atauina e ia; auā sa i ai i ositaulaga o le vaega o mea e ‘ai mai ‘iā Farao; na latou ‘a‘ai fo‘i i o latou vaega o mea e ‘ai na foa‘iina atu ‘iā i latou e Farao; o le mea lea latou te le‘i fa‘atauina ai o latou fanua.
23 ‘Ona fai atu lea o Iosefa i le nu‘u, “Fa‘auta, ‘ua ‘ou fa‘atauina mai ‘outou i le asō ‘atoa ma ‘outou fanua ma Farao; fa‘auta, o le saito lenei ma ‘outou, tou te lūlūina i le fanua.
24 A o‘o ‘ina tupu, tou te avatua ‘iā Farao o lona vaega e lima; a o vaega e fa ‘ua totoe e a ‘outou lava ia, e fai ma saito e lūlū ma mea e ‘ai ma ‘outou, ‘atoa ma i latou ‘ua i o ‘outou ‘āiga ma mea e ‘ai ma a ‘outou fānau.”
25 ‘Ona latou tali mai lea, “‘Ua e fa‘aola mai lava ‘iā te i matou; ‘ia alofagia i matou e lo matou ali‘i, e fai fo‘i i matou ma ‘au‘auna a Farao.”
26 ‘Ua fai ai fo‘i lea e Iosefa ma tulafono i le nu‘u o Aikupito ‘ua o‘o mai lava i ona po nei, ‘ia avatu ‘iā Farao le vaega e lima; na o le fanua lava o ositaulaga ‘ua lē faia lea mo Farao.
27 ‘Ona nofo lea o sa Isaraelū i le nu‘u o Aikupito i le lau‘ele‘ele o Kosena ma latou fai fanua ai; ‘ua uluola fo‘i i latou, ‘ua fa‘ato‘ateleina lava.
28 Sa nofo Iakopo i le nu‘u o Aikupito i tausaga e sefulu ma le fitu, o aso fo‘i o ona tausaga uma na ola ai Iakopo, ‘ua tasi le selau ma le fagafulu ma tausaga e fitu.
29 ‘Ua tau lata mai fo‘i aso e maliu ai Isaraelu ‘ona ‘a‘ami lea e ia o lona atali‘i o Iosefa, ‘ua fa‘apea atu ‘iā te ia, “‘Āfai ‘ua alofagia a‘u e oe, ‘ia e sulu mai lou lima i lalo o lo‘u aloivae, ma ‘ia e alofa mai, ma fa‘amaoni mai ‘iā te a‘u, ‘aua lava ‘e te tanu ‘iā te a‘u i Aikupito;
30 a ‘ou te ta‘oto fa‘atasi ma o‘u tamā, ‘ia e ‘ava‘e a‘u a‘i Aikupito, ma e tanu ‘iā te a‘u i lo latou tu‘ugamau.” ‘Ona tali mai lea o ia ‘iā te ia, “‘Ou te faia lava e pei ‘ona e fai mai ai.”
31 ‘Ona fai atu ai lea o ia, “‘Ia e tautō mai ‘iā te a‘u;” ‘ona tautō ai lea o ia ‘iā te ia; ‘ona ifo ai lea o Isaraelu i le ulu o le moega.