1 ‘Ua toeaina Isaako, ‘ua puaoa fo‘i ona mata ‘ua lē mafai ai ‘ona va‘ai, ‘ona ia vala‘au ai lea ‘iā Esau lona atali‘i e matua ma fai atu ‘iā te ia, “Lo‘u atali‘i e;”‘Ona fai mai ai lea o ia, “O a‘u lenei.”
2 ‘Ona ia fai atu ai lea, “Fa‘auta ‘ea, ‘ua ‘ou toeaina a‘u, ‘ou te lē iloa le aso ‘ou te oti ai;
3 o lenei, ‘inā ‘ave ia au ‘au‘upega, o lau utu ma lau ‘aufana ma e alu i le vao e tuli se manu o le vao ma a‘u.
4 ‘ia e fai ai sina mea e ‘ai e manogi ma a‘u, pei o le mea ‘ou te mana‘o ai, ma ‘aumai ‘iā te a‘u, ‘ou te ‘ai ai, ‘ina ‘ia ‘ou fa‘amanuia atu ‘iā te oe manū ‘ou te le‘i oti.”
5 ‘Ua fa‘alogo fo‘i Repeka i le ‘upu a Isaako ‘iā Esau lona atali‘i. ‘Ua alu atu fo‘i Esau i le vao e tuli se manu, e ‘aumai ai.
6 ‘Ona fai atu lea o Repeka ‘iā Iakopo lana tama, ‘ua fa‘apea atu, “Fa‘auta, na ‘ou fa‘alogo i le ‘upu a lou tamā ‘iā Esau lou uso ‘ua fa‘apea,
7 ‘‘Aumai ‘iā te a‘u se manu mai le vao, ma fai ai sina mea e ‘ai e manogi ma a‘u, ‘ou te ‘ai ai, ma ‘ou fa‘amanuia atu ‘iā te oe i luma o le ALI‘I, manū ‘ou te le‘i oti.’
8 O lenei, la‘u tama e, ‘ia e fa‘alogo mai i la‘u ‘upu i le mea ‘ou te fai atu ai ‘iā te oe.
9 ‘ia e alu i le fagaga ma ‘aumai ai ‘iā te a‘u ni tama‘i ‘oti lelei se lua, ‘ou te fai ai se mea e ‘ai e manogi ma lou tamā, pei o le mea e mana‘o ai o ia;
10 ‘ona e avatu ai lea i lou tamā, e ‘ai ai o ia, ‘ina ‘ia fa‘amanuia mai o ia ‘iā te oe manū o le‘i oti o ia.”
11 ‘Ona fai mai ai lea o Iakopo ‘iā Repeka lona tinā, “Fa‘auta, o le tagata taufulufulu lo‘u uso o Esau, a o a‘u ‘ou se tagata lamolemole.
12 Atonu e tagotago lo‘u tamā ‘iā te a‘u, ‘ona ‘avea ai lea o a‘u ‘iā te ia ma tagata fa‘a‘ole‘ole, ‘ona o‘o mai ai lea ‘iā te a‘u se fetu‘u, ‘ae lē o se manuia.”
13 ‘Ona fai atu ai lea o lona tinā ‘iā te ia, “La‘u tama e, ia ‘iā te a‘u lou fetu‘u, tau lava ‘ina e fa‘alogo mai i la‘u ‘upu, ma e alu e ‘aumai ai tama‘i ‘oti ‘iā te a‘u.”
14 ‘Ona alu ai lea o ia, ma pupu‘e mai, ‘ua ‘aumai i lona tinā, ‘ona fai ai lea e lona tinā mea e ‘ai e manogi pei ‘ona mana‘o ai lona tamā.
15 ‘Ua ‘ave fo‘i e Repeka ‘ofu lelei o lana tama e matua o Esau, sa ‘iā te ia i le fale, na na fa‘a‘ofu ai ‘iā Iakopo lana tama aupito itiiti;
16 ‘ua ia tu‘u ai fo‘i pa‘u o tama‘i ‘oti i ona lima, ‘atoa ma le lamolemole o lona ua;
17 ‘ua ia tu‘u atu le mea e ‘ai e manogi ma le areto na ia saunia i le lima o lana tama o Iakopo.
18 ‘Ona alu atu ai lea o ia i lona tamā, ‘ua fai atu, “Lo‘u tama e;”‘Ona ia fai mai ai lea, “O a‘u lenei, lo‘u atali‘i e, o ai ‘ea oe?”
19 ‘Ona fai atu ai lea o Iakopo i lona tamā, “O a‘u o Esau o lau ulumatua, ‘ua ‘ou faia le mea na e fai mai ai ‘iā te a‘u; ‘inā nofo ia i luga, ‘ia nofo ma ‘ai i a‘u manu ‘ina ‘ia e fa‘amanuia mai ‘iā te a‘u.”
20 ‘Ona fai mai ai lea o Isaako i lona atali‘i, “Lo‘u atali‘i e, pe fa‘apefea ‘ona e vave maua?”‘Ua ia fai atu, “Auā na ‘aumaia i o‘u luma e le ALI‘I lou Atua.”
21 ‘Ona fai mai ai lea o Isaako ‘iā Iakopo, “Lo‘u atali‘i e, sōsō mai ia, ‘ina ‘ia ‘ou tagotago ‘iā te oe, po o oe lo‘u lava atali‘i o Esau pe leai.”
22 ‘Ua sōsō atu Iakopo ‘iā Isaako lona tamā; ‘ona ia tagotago mai ai lea ‘iā te ia, ‘ua fai mai, “O le leo o le leo lea o Iakopo, a o lima o lima ia o Esau.”
23 ‘Ua ia lē iloa o ia, auā ‘ua taufulufulu ona lima, pei o lima o Esau lona uso; ‘ona fa‘amanuia ai lea e ia ‘iā te ia.
24 ‘Ona fai mai ai lea o ia, “O oe ‘ea o lo‘u lava atali‘i o Esau?”‘Ona fai atu ai lea o ia, “O a‘u lava lenei.”
25 ‘Ona fai mai ai lea o ia, “‘Aumai ia ‘iā te a‘u, ‘ou te ‘ai ai le manu a lo‘u atali‘i, ‘ina ‘ia ou fa‘amanuia ‘iā te oe.” ‘Ona ia avatu ai lea ‘iā te ia, na ia ‘ai ai, ‘ua na ‘aumai fo‘i ‘iā te ia le uaina, ‘ona ia inu ai lea.
26 ‘Ona fai mai ai lea o Isaako lona tamā ‘iā te ia, “Lo‘u atali‘i e, sōsō mai ia, se‘i e sogi mai ‘iā te a‘u.”
27 ‘Ona ia sōsō atu ai lea ma sogi atu ‘iā te ia; ‘ua ia lagona le nanamu o ona ‘ofu ma fa‘amanuia ‘iā te ia, ‘ua fa‘apea mai:“Fa‘auta, o le manogi o lo‘u atali‘i,e pei o le manogi o le fanua‘ua fa‘amanuia e le ALI‘I.
28 ‘Ia foa‘i atu e le Atua,‘iā te oe sau mai le lagima le lelei o le fanuama saito ma uaina e tele.
29 ‘Ia ‘au‘auna nu‘u ‘iā te oe,‘ia ifo fo‘i tagata ‘iā te oe,‘ia fai oe ma ali‘i i ou uso.‘Ia ifo fo‘i tama a lou tinā ‘iā te oe;‘ia fetu‘uina sē fetu‘u ‘iā te oe,‘ia manuia fo‘i sē fa‘amanuia ‘iā te oe.”
30 ‘Ua uma ‘ona fa‘amanuia e Isaako ‘iā Iakopo na se‘i alu atu fo‘i Iakopo ai luma o Isaako lona tamā, ‘ona sau ai lea o Esau lona uso i lona tuligāmanu.
31 Na faia fo‘i e ia le mea e ‘ai e manogi ma avatu i lona tamā, ‘ua fa‘apea atu i lona tamā, “Lo‘u tamā e, ‘ia e nofo i luga ma ‘ai i le manu a lou atali‘i, ‘ina ‘ia e fa‘amanuia mai ‘iā te a‘u.”
32 ‘Ona fai mai ai lea o Isaako lona tamā ‘iā te ia, “O ai ‘ea oe?”‘Ona fai atu ai lea o ia, “O a‘u o lou atali‘i, o lau ulumatua o Esau.”
33 ‘Ona tetemū ai lea o Isaako, ‘ua matuā tele lava lona tetemū, ‘ua fai mai, “O ai lava lea na tuli manu ma ‘aumai ‘iā te a‘u, ‘ua uma ‘ona ‘ou ‘ai ai a ‘e te le‘i sau oe, ‘ua ‘ou fa‘amanuia fo‘i ‘iā te ia, e manuia lava ia?”
34 ‘Ua fa‘alogo Esau i ‘upu a lona tamā, ‘ona tagiauē ai lea o ia i le auē fa‘alotulotu, ‘ua fa‘apea atu i lona tamā, “Lo‘u tamā e, ‘ia e fa‘amanuia mai ‘atoa fo‘i ma a‘u nei.”
35 ‘Ona fai mai ai lea o ia, “Na sau fa‘a‘ole‘ole lou uso, ‘ua na ‘ave lou manuia.”
36 ‘Ona fai atu ai lea o ia, “E lē o lea ‘ea ‘ua igoa ai o ia o Iakopo? auā ‘ua atu lua lona sisi‘o mai ‘iā te a‘u, na ia fao le tofi o a‘u le ulumatua, fa‘auta fo‘i, ‘ua ia fao nei lo‘u manuia.” ‘Ua ia fai atu fo‘i, “E leai ‘ea se manuia o totoe ‘iā te oe mo a‘u?”
37 ‘Ona tali mai ai lea o Isaako, ‘ua fa‘apea mai ‘iā Esau, “Fa‘auta, ‘ua ‘ou tofia o ia e fai ma ali‘i ‘iā te oe, ‘ua ‘ou tu‘u atu fo‘i ‘iā te ia ona uso uma e fai ma ‘au‘auna, ‘ua ‘ou fa‘amalosia ia i le saito ma le uaina, se a fo‘i se mea ‘ou te toe fai ma oe, lo‘u atali‘i?”
38 ‘Ona fai atu lea o Esau i lona tamā, “E tasi ‘ea le manuia ‘ua ‘iā te oe lo‘u tamā e? ‘ia e fa‘aamanuia ‘iā te a‘u, o a‘u lava, lo‘u tamā e.” ‘Ona tagi ai lea o Esau ma le leo tele.
39 ‘Ona tali mai ai lea o lona tamā o Isaako, ‘ua fai mai ‘iā te ia:“Fa‘auta, o le fanua lafulemū le mea ‘e te nofo aie totō ifo fo‘i le sau mai le lagi i lugā.
40 O lau pelu ‘e te ola ai,‘e te ‘au‘auna fo‘i i lou uso.A o‘o fo‘i ‘ina fa‘asa‘oloto o oe,‘ona e gausia ai lea o lana amo nai lou ua.”
41 ‘Ua ita tele Esau ‘iā Iakopo ‘ona o le manuia na fa‘amanuia atu ai e lona tamā ‘iā te ia; ‘ona fa‘apea lea o Esau i lona loto, “‘Ua latalata aso e fa‘anoanoa ai ‘ona o lo‘u tamā, ‘ona ‘ou fasioti ai lea lo‘u uso o Iakopo.”
42 ‘Ua talaina atu ‘iā Repeka ‘upu a Esau lana tama e matua, ‘ona ia fe‘au atu ai lea e sau lana tama aupito itiiti o Iakopo, ‘ua fai atu ‘iā te ia, “Fa‘auta, o lou uso o Esau, o lo‘o fa‘amafanafana ia i lona loto ‘iā te oe, o le a fasioti ‘iā te oe.
43 A o lenei, la‘u tama e, ‘ia e fa‘alogo mai i la‘u ‘upu; ‘inā tu ia i luga ma e sola atu i lo‘u tuagane o Lapana, i Karana,
44 ma e nofo ai nai aso, se‘ia mavae atu le ita o lou uso;
45 se‘ia mavae atu le ita o lou uso ‘iā te oe, se‘ia galo fo‘i ‘iā te ia le mea ‘ua e faia ‘iā te ia; ‘ona ‘ou fe‘au atu ai lea, e ‘a‘ami ‘iā te oe i lea mea; e ‘ave‘eseina i se a ‘oulua ‘iā te a‘u i le aso e tasi?”
46 ‘Ona fai atu ai lea o Repeka ‘iā Isaako, “‘Ou te fiu i lo‘u ola ‘ona o fafine o sa Hetī, ‘āfai e fai avā Iakopo i se fafine o sa Hetī, pei o ia fafine o le nu‘u, pe se a le toe aogā o lo‘u ola ‘iā te a‘u?”