1 ‘Ua toe faia fo‘i e Aperaamo le avā, o Kitura lona igoa.
2 ‘Ua fānau fo‘i Kitura ‘iā Aperaamo o Semerana ma Iokasana, ma Metana ma Mitiana ma Isepaka ma Sua.
3 ‘Ua fānaua fo‘i e Iokasana o Seepa, ma Titana. O atali‘i fo‘i o Titana o Asurimo ia, ma Letusimo, ma Leumemo.
4 O atali‘i fo‘i o Mitiana, o Efa, ma Efara, ma Enoka, ma Apita, ma Eletaa. O i latou uma ia o le fānau a Kitura.
5 ‘Ua foa‘iina atu e Aperaamo ana mea uma lava ‘iā Isaako.
6 A o tama a palake sa nonofo ‘iā Aperaamo, na foa‘iina atu ai e Aperaamo o mea alofa, ma ‘a‘auina atu ‘iā te i latou, ‘ina o ola o ia, i sasa‘e i le nu‘u sasa‘e, ‘ia te‘a ‘ese‘ese ai ma lona atali‘i o Isaako.
7 O tausaga fo‘i nei o le olaga o Aperaamo, sa ola ai o ia, e selau ma le fitugafulu ma le lima, o ona tausaga ia.
8 ‘Ua tō fo‘i le mānava a Aperaamo, ‘ua oti o ia o matuā toeaina; o le tagata ‘ua matuā lava, ‘ua tu‘u tulu‘i lona ola; ‘ua fa‘atasiina atu fo‘i o ia i lona nu‘u.
9 O ona atali‘i fo‘i o Isaako ma Isamaeli na la tanu ‘iā te ia i le ana o Makapelu, i le fanua o Eferona le atali‘i o Soaro, o lo sa Hetī, i luma o Mamere.
10 O le fanua sa fa‘atauina e Aperaamo i le fānauga a Heti. Na tanu i lea mea o Aperaamo ma lana avā o Sara.
11 ‘Ua mavae le oti o Aperaamo, ‘ona fa‘amanuia mai lea e le Atua lona atali‘i o Isaako; sa mau fo‘i Isaako e lata ane i Perelaaroi.
12 O le gafa fo‘i lenei o Isamaeli le atali‘i o Aperaamo sa fānau mai e Akara le Aikupito, o le ‘au‘auna fafine a Sara ‘iā Aperaamo.
13 O igoa fo‘i nei o atali‘i o Isamaeli, o latou igoa, e tusa ma o latou augātagata; o le ulumatua a Isamaeli, o Nepaiota ia; ma Kitara, ma Atepeelu ma Mepesama,
14 ma Mesema ma Tuma ma Mase,
15 o Hatata ma Tema, o Ietura, o Nafiso ma Katema
16 o atali‘i ia o Isamaeli, o latou igoa fo‘i ia, e ta‘itasi ma lana ‘a‘ai, e ta‘itasi fo‘i ma lona ‘olo; o ali‘i ia e to‘asefulu ma le to‘alua i o latou nu‘u.
17 O tausaga fo‘i nei o le olaga o Isamaeli, e selau ma le tolugafulu ma le fitu, o ona tausaga ia; ‘ua tō fo‘i lana mānava ‘ua oti o ia; ‘ua fa‘atasiina atu fo‘i o ia i lona nu‘u.
18 Sa mau fo‘i i latou e gata mai i Havila e o‘o i Sura, e feagai ma Aikupito, i le ala e ui atu ai i Asuria. Sa mau o ia i luma o ona uso uma.
19 O le gafa fo‘i lenei o Isaako, le atali‘i o Aperaamo; ‘ua fānaua e Aperaamo o Isaako.
20 Sa fagafulu o tausaga o Isaako ‘ina o fai māna avā o Repeka le afafine o Petueli, o le Suria mai Patanarama, o le tuafafine fo‘i o ia o Lapana le Suria.
21 ‘Ua fa‘atoga atu Isaako i le ALI‘I mo lana avā, auā ‘ua pā o ia; ‘ua fa‘afofoga fo‘i le ALI‘I ‘iā te ia, ‘ona tō ai lea o lana avā o Repeka.
22 ‘Ua feu‘ua‘i fo‘i tama i totonu ‘iā te ia; ‘ona fa‘apea lea o ia, “‘Āfai e fa‘apea, se a le mea ‘ua ‘ou fa‘apea ai?” ‘Ua alu fo‘i o ia o fesili atu i le ALI‘I.
23 ‘Ua tali mai fo‘i le ALI‘I ‘iā te ia:“E lua nu‘u o lo‘o i totonu ‘iā te oe,E lua lava nu‘u e fānau mai ‘iā te oe;E sili ‘ona malosi o le tasi nu‘u i le isi nu‘u;E nofo pologa fo‘i le ulumatua i le ui‘i.”
24 ‘Ua o‘o i le aso e fānau ai o ia, fa‘auta, o le māsaga ‘ua i totonu ‘iā te ia.
25 O lē na mua‘i fānau mai ‘ua ‘ena‘ena mūmū ‘ua pei se ‘ofu fulufulu ‘ua liloia ai o ia; na latou fa‘aigoa ai ‘iā te ia o Esau.
26 Mulimuli ane ‘ua fānau mai ai lona uso, ‘ua ‘u‘u atu fo‘i lona lima i le mulivae o Esau; ‘ua fa‘aigoa fo‘i ‘iā te ia o Iakopo; o le onogafulu o tausaga o Isaako na fānau ai i lā‘ua.
27 ‘Ua tutupu nei tama; o Esau fo‘i o le tagata ia ‘ua poto i tuli manu, o le tagata a vao, a o Iakopo o le tagata agamalū o ia, ‘ua mau i fale ‘ie.
28 Na alofa Isaako ‘iā Esau, auā ‘ua ia ‘ai i ana manu; a o Repeka, na alofa o ia ‘iā Iakopo.
29 Na tunu fo‘i e Iakopo o mea e ‘ai ‘ua sau fo‘i Esau nai le vao, ‘ua lailoa fo‘i o ia;
30 ‘Ona fa‘apea atu lea o Esau ‘iā Iakopo, “Se‘i ‘aumai sina mea mūmū lenā e tunu se‘i ‘ou ‘ai ai, auā ‘ua ‘ou vaivai.” O le mea lea ‘ua fa‘aigoa ai o ia o Etoma.
31 ‘Ona tali mai lea o Iakopo, “Fa‘atau mai ia ‘iā te a‘u o lou tofi o le ulumatua i le aso nei.”
32 ‘Ona fa‘apea atu lea o Esau, “Fa‘auta, o le a ‘ou oti, pe se a le aogā o lenei tofi o le ulumatua ‘iā te a‘u?”
33 ‘Ona tali mai lea o Iakopo, “‘Inā e tautō mai ‘iā te a‘u i le aso nei;”‘Ona tautō atu ai lea o Esau ‘iā te ia; ‘ua ia fa‘atau atu fo‘i lona tofi o le ulumatua ‘iā Iakopo.
34 ‘Ona avatua lea e Iakopo o areto ma atasema tunu ‘iā Esau; ‘ona ‘ai lea o ia ma inu ‘ona tula‘i lea o ia ma alu. O lea na fa‘alēaogāina ai e Esau le tofi o le ulumatua.