1 ‘Ua alu atu Tina le tama teine a Lea, sa fānau mai e ia ‘iā Iakopo, e maimoa i fafine o le nu‘u.
2 ‘Ua iloa fo‘i o ia e Sekema le atali‘i o Hamoro, o lo sa Hivī, o le tamaali‘i o le nu‘u, ‘ua ia ta‘ita‘i fo‘i ‘iā te ia, ‘ua la momoe, ‘ua ia fa‘aleaga ‘iā te ia.
3 ‘Ua matuā mana‘o o ia ‘iā Tina le afafine o Iakopo, ‘ua loto lava i le teine, ‘ua tautala fo‘i ma le alofa lava i le teine,
4 ‘Ua fai atu fo‘i Sekema i lona tamā o Hamoro, ‘ua fa‘apea atu, “‘Ia e maua mai lenei teine e fai ma a‘u avā.”
5 ‘Ua lagona fo‘i e Iakopo, ‘ua fa‘aleagaina e ia Tina lona afafine; o ona atali‘i fo‘i sa i le vao i latou ma ana manu, ‘ona fa‘alologo ai lea o Iakopo se‘ia latou ō mai.
6 ‘Ua sau fo‘i Hamoro le tamā o Sekema ‘iā Iakopo e tautala ma ia.
7 ‘Ua ō mai fo‘i atali‘i o Iakopo mai le vao ‘ina ‘ua latou fa‘alogo i ai; ‘ua tigā fo‘i i latou, ‘ua matuā ita lava, ‘ina ‘ua faia e ia le mea leaga ‘iā Isaraelu, ‘ina ‘ua la momoe ma le afafine o Iakopo; auā o le mea lea e lē tatau lava ‘ona fai.
8 ‘Ua tautala mai fo‘i Hamoro ‘iā te i latou, ‘ua fa‘apea mai:“O lo‘u atali‘i o Sekema, o lo‘o ‘ua mana‘o tele lava o ia i lo ‘outou teine; se‘i ‘outou tu‘u mai ia o ia ‘iā te ia e fai māna avā.
9 ‘Ia fetaia‘i o tatou gafa ma ‘aumai o ‘outou afafine ma matou, ‘ae avatu o matou afafine mā ‘outou.
10 Tatou te mau fo‘i ma i matou; faitalia ‘outou i le lau‘ele‘ele; tou te mau ai, ma fefa‘ataua‘i ai, ma ‘ia ‘outou mau fanua i ai.”
11 ‘Ua fa‘apea mai fo‘i Sekema i le tamā o Tina ma ona tuagane, “‘Ia alofagia mai a‘u nei e ‘outou; o mea fo‘i tou te fai mai ai ‘iā te a‘u, ‘ou te avatu lava.
12 Ta‘u mai ia ni ‘oloa ‘ia tele lava ma ni mea alofa, ‘ou te avatu lava mea tou te fai mai ai ‘iā te a‘u; a ‘ia tu‘u mai lava le teine ‘iā te a‘u e fai ma a‘u avā.”
13 ‘Ona tali atu lea o atali‘i o Iakopo ‘iā Sekema ma Hamoro lona tamā ma le pepelo, ‘ua tautala atu ai, ‘ina ‘ua fa‘aleagaina e ia o Tina lo latou tuafafine;
14 ‘ua fa‘apea atu ‘iā te i lā‘ua:“Matou te lē mafaia lenā mea ‘ona avatua o lo matou tuafafine, i se tagata ‘ua lē peritomeina; auā e fai ma luma lea mea ‘iā i matou.
15 E tasi lava le mea matou te usiusita‘i ai ‘iā te ‘outou; pe ‘āfai tou te fa‘apei o i matou, ‘ia peritomeina o ‘outou tane uma.
16 ‘Ona matou avatua lea o matou afafine ‘iā te ‘outou, o ‘outou afafine fo‘i matou te ‘aumai ai ma matou, tatou te mau fo‘i ma ‘outou, e ‘avea fo‘i i tatou ma nu‘u e tasi.
17 ‘Ae ‘āfai tou te lē usiusita‘i mai ‘iā te i matou, ‘ia peritomeina ‘outou, ‘ona matou ‘aumai ai lea o le matou teine, ma matou ō.”
18 ‘Ua lelei fo‘i a latou ‘upu i le manatu o Hamoro ma Sekema le atali‘i o Hamoro.
19 ‘Ua lē fa‘atuai fo‘i taule‘ale‘a ‘ona faia o lea mea, auā na fiafia o ia i le afafine o Iakopo; sa sili fo‘i lona agafa‘atamāli‘i i tagata uma o le ‘āiga o lona tamā.
20 ‘Ona ō ai lea o Hamoro ma Sekema lona atali‘i i le faitoto‘a o la la ‘a‘ai, ‘ua tautala atu i tagata o la la ‘a‘ai, ‘ua fa‘apea atu:
21 “O tagata ‘ia ‘ua filemū i latou ‘iā te i tatou; o lenei, ‘ia latou mau i le nu‘u ma fefa‘ataua‘i ai; auā o le lau‘ele‘ele, fa‘auta, ‘ua lautele lava ia, e mafai ‘ona latou mau ai; ‘ia tatou ‘aumai o latou afafine e fai ma a tatou avā, ‘ia tatou avatu fo‘i o tatou afafine e fai ma a latou avā.
22 E tasi le mea e mafai ai ia tagata ‘ona usiusita‘i mai ‘iā te i tatou ‘ia mau ai ma i tatou, ‘ia fai ma nu‘u e tasi, ‘ia peritomeina o tane uma o ‘iā i tatou, e pei ona peritomeina o i latou.
23 O a latou mea ma a latou ‘oloa ma a latou manu uma, e lē fai ‘ea ma a tatou ia? Tau ‘ina tatou usiusita‘i ‘iā te i latou, ‘ona mau lea o i latou ma i tatou.”
24 ‘Ua usiusita‘i fo‘i ‘iā Hamoro ma lona atali‘i o Sekema o i latou uma ē na ō atu i le faitoto‘a o lana ‘a‘ai; na peritomeina fo‘i o tane uma, o i latou uma ē na ō atu i le faitoto‘a o lana ‘a‘ai.
25 ‘Ua o‘o fo‘i i le aso tolu, ‘ina ‘ua malosi i latou, ‘ona tago lea o atali‘i e to‘alua o Iakopo, o Simeona ma Levi, o tuagane o Tina, ta‘itasi i lana pelu, ‘ona ulu atu lea i le ‘a‘ai ma le lē mata‘u ma fasioti i tane uma.
26 ‘Ua la fafasi fo‘i ‘iā Hamoro ma lona atali‘i o Sekema i le pelu, ‘ua ‘ave fo‘i ‘iā Tina ai le fale o Sekema, ma latou ō.
27 ‘Ua ō atu fo‘i atali‘i o Iakopo i ē na fasia, ma latou vete le ‘a‘ai, auā na latou fa‘aleagaina lo latou tuafafine.
28 ‘Ua latou ‘avea fo‘i a latou mamoe, ma a latou povi, ma a latou asini, ma mea sa i le ‘a‘ai, ma mea sa i le fanua,
29 ma a latou ‘oloa uma, o latou tamaiti uma fo‘i, ma o latou fafine ‘ua latou ‘avea fa‘atagataotau‘a, ‘ua latou vetea fo‘i mea uma lava sa i fale.
30 A ‘ua fai atu Iakopo ‘iā Simeona ma Levi, “‘Ua ‘oulua fa‘atigā mai ‘iā te a‘u, e ‘inosia ai a‘u e i latou o ē mau i le nu‘u, o sa Kananā ma sa Perisē; o i tatou nei fo‘i ‘ua to‘aitiiti, e fa‘apotopoto fa‘atasi i latou e laga mai ‘iā te a‘u, ma fasioti ‘iā te a‘u, e fa‘aumatia fo‘i a‘u, o a‘u ‘atoa ma lo‘u ‘āiga.”
31 ‘Ona fa‘apea lea o i lā‘ua, “E fa‘apea ‘ea ‘ona fai o ia i lo matou tuafafine e peiseaī o se fafine talitane?”