1 A o Sarai le avā a Aperamo, ‘ua lē fānau o ia ‘iā te ia; sa ‘iā te ia fo‘i le ‘au‘auna fafine, o le Aikupito, o Akara lona igoa.
2 Na fai atu fo‘i Sarai ‘iā Aperamo, “Fa‘auta mai ‘ea, ‘ua finagalo le ALI‘I ‘ia ‘ou lē fānau; se‘i e alu ane i la‘u ‘au‘auna fafine; atonu ‘ou te maua ai ni tama ‘iā te ia.” ‘Ua usiusita‘i fo‘i Aperamo i le ‘upu a Sarai.
3 O Sarai fo‘i le avā a Aperamo, na ia ‘ave ‘iā Akara o le Aikupito, o lana ‘au‘auna fafine, ma tu‘uina atu ‘iā Aperamo lana tane, e fai māna avā, ‘ina ‘ua mavae o tausaga e sefulu sa nofo ai Aperamo i le nu‘u o Kanana.
4 ‘Ona alu ane lea o ia ‘iā Akara ‘ona tō ai lea o ia; ‘ua iloa e ia ‘ua tō o ia, ‘ona fa‘alēaogāina lea e ia lona matai fafine.
5 ‘Ona fai alu lea o Sarai ‘iā Aperamo, “‘Ia i luga ‘iā te oe lo‘u agaleagaina; o a‘u nei fo‘i, na ‘ou tu‘uina atu la‘u ‘au‘auna fafine ‘iā te oe; ‘ua iloa fo‘i e ia ‘ua tō o ia, ‘ona fa‘alēaogāina ai lea o a‘u e ia; ‘ia fa‘amasino mai le ALI‘I ‘iā te i tā‘ua.”
6 ‘Ona tali mai lea o Aperamo ‘iā Sarai, “Fa‘auta, o ‘iā te oe le pule i lau ‘au‘auna fafine, faitalia lava oe se mea ‘e te faia ‘iā te ia.” ‘Ua agaleaga fo‘i Sarai ‘iā te ia ‘ona sola ‘ese ai lea o ia i ona luma.