26 ‘Ona punou lea o le tagata, ma ifo atu i le ALI‘I.
27 ‘Ua fa‘apea atu fo‘i o ia, “‘Ia fa‘afetaia le ALI‘I o le Atua o lo‘u matai o Aperaamo, o lē ‘ua lē tu‘ua lona alofa ma lona fa‘amaoni i lo‘u matai; na ‘ou i le ala, ‘ona ta‘ita‘iina ai lea o a‘u e le ALI‘I i le fale o uso o lo‘u matai.”
28 ‘Ona momo‘e lea o le teine ma ta‘u atu ia mea i le ‘āiga o lona tinā.
29 Sa ‘iā Repeka le tuagane o Lapana lona igoa; ‘ua momo‘e mai fo‘i Lapana i le tagata i le vaipuna.
30 ‘Ua iloa e ia o le mama auro ma taulima i lima o lona tuafafine, ‘ua fa‘alogo atu fo‘i i ‘upu a lona tuafafine o Repeka, ‘ua fa‘apea mai, “Na fa‘apea ‘ona tautala mai o le tagata ‘iā te a‘u,” ‘ona alu lea o ia i le tagata, fa‘auta fo‘i, ‘ua tu o ia ma kamela i luga o le vaipuna,
31 ‘ona fa‘apea mai lea o Lapana, “Maliu mai ia o oe ‘ua fa‘amanuia e le ALI‘I; se a le mea ‘ua e tu ai i fafo? Auā ‘ua uma ‘ona ‘ou teuteua o le fale ma le mea e ‘ave i ai kamela.”
32 ‘Ona ulufale lea o le tagata i le fale; ‘ona tatalaina lea e Lapana o kamela, ma avane ‘au o saito ma mea e ‘ai ma kamela, ma vai fo‘i e mulumulu ai ona vae, ma vae o tagata na ō mai ma ia.