28 ‘Ona momo‘e lea o le teine ma ta‘u atu ia mea i le ‘āiga o lona tinā.
29 Sa ‘iā Repeka le tuagane o Lapana lona igoa; ‘ua momo‘e mai fo‘i Lapana i le tagata i le vaipuna.
30 ‘Ua iloa e ia o le mama auro ma taulima i lima o lona tuafafine, ‘ua fa‘alogo atu fo‘i i ‘upu a lona tuafafine o Repeka, ‘ua fa‘apea mai, “Na fa‘apea ‘ona tautala mai o le tagata ‘iā te a‘u,” ‘ona alu lea o ia i le tagata, fa‘auta fo‘i, ‘ua tu o ia ma kamela i luga o le vaipuna,
31 ‘ona fa‘apea mai lea o Lapana, “Maliu mai ia o oe ‘ua fa‘amanuia e le ALI‘I; se a le mea ‘ua e tu ai i fafo? Auā ‘ua uma ‘ona ‘ou teuteua o le fale ma le mea e ‘ave i ai kamela.”
32 ‘Ona ulufale lea o le tagata i le fale; ‘ona tatalaina lea e Lapana o kamela, ma avane ‘au o saito ma mea e ‘ai ma kamela, ma vai fo‘i e mulumulu ai ona vae, ma vae o tagata na ō mai ma ia.
33 ‘Ona laulauina mai ai lea ‘iā te ia o mea e ‘ai; a ‘ua fa‘apea atu le tagata, “‘Ou te lē ‘ai lava, se‘ia uma ‘ona ‘ou ta‘u atu o la‘u fe‘au.” ‘Ona fa‘apea atu lea o Lapana, “‘Inā ta‘u mai ia.”
34 ‘Ona fa‘apea mai lea o le tagata, “O a‘u o le ‘au‘auna a Aperaamo.