1 И кога ги заврши Исус овие заповеди кон дванаесетте Свои ученици, замина оттаму за да поучува и да проповеда по нивните градови.
2 А Јован, штом чу во затворот за Христовите дела, испрати двајца од своите ученици
3 и му рече: „Ти ли си Оној што треба да дојде или да чекаме друг?“
4 Исус им одговори и рече: „Одете и кажете му на Јован што слушате и што гледате:
5 слепи прогледуваат и сакати проодуваат; лепрозни се очистуваат и глуви прослушуваат; мртви воскреснуваат и на сиромашните им се проповеда Евангелието.
6 И блажен е оној што не се соблазнува поради Мене.“