1 O le avega a Papelonia na va‘aia e Isaia le atali‘i o Amota.
2 Fa‘atū ia le tagāvai i le mauga tula,‘inā leo tele ia ‘iā te i latou,‘inā lu‘i tau atu ia le lima,‘ia latou ulu atu ai i faitoto‘a o ali‘i sili.
3 O a‘u lava, ‘ua ‘ou fai atu i o‘u tagata ‘ua tofia,‘ua ‘ou vala‘au lava i o‘u tagata totoa,‘ia o‘o ai lo‘u ita, o o‘u tagata mitamita ma le fa‘amaualuluga.
4 O le ta‘alili o le vao tagata i mauga,peiseaī o se nu‘u e to‘atele lava,o le ta‘alili o le fa‘anunununuo mālō o nu‘u ‘ese ‘ua fa‘apotopoto mai.O le ALI‘I o ‘au o lo‘o aofa‘i e ia o ‘aue tau ai le tau‘a.
5 ‘Ua latou ō mai i le nu‘u mamao mai le tulu‘iga o le lagi,o le ALI‘I ma ‘au‘upega o lona to‘asā,‘ina ‘ia fa‘aumatia le nu‘u uma lava.
6 ‘Inā uiō ia, auā ‘ua latalata le aso o le ALI‘I,e o‘o mai pei o se malaia mai Lē e ona le malosi uma lava.
7 O le mea lea e vaivai ai lima uma,e fa‘avaivai ai fo‘i loto o tagata uma;
8 ‘ona latou atuatuvale ai lea;e maua i latou i le puapuagā ma le fa‘atigā;latou te ‘o‘ono fa‘apei o le fafine a fānau;latou te feva‘aia‘i le tasi i le tasi ma le femēmēa‘i;o latou mata o mata afi mumū ia.
9 Fa‘auta, o lo‘o sau le aso o le ALI‘I,e ogogo i le to‘atama‘i ma le to‘asā tele;e fai ai le nu‘u ma fa‘atafunaga;na te fa‘aumatia fo‘i tagata agasala o i ai.
10 Auā o fetū o le lagi ma ona fa‘aputuputuga fetū,e lē fepulafi mai i latou;e fa‘apouliuligia le lā i lona alu a‘e,o le masina fo‘i e lē susulu mai lona malamalama.
11 ‘Ou te fa‘asalaina le lalolagi ‘ona o a latou amio leaga,o tagata ulavavale fo‘i ‘ona o a latou agasala;‘ou te fa‘aumatia fo‘i le fa‘asausili o ē fa‘amaualuluga,‘ou te lafotūina i lalo le fa‘asiasia o ē fa‘asauā.
12 ‘Ou te fa‘ato‘aitiitia tagata e sili i le auro lelei,o tagata lava e sili ‘ona to‘aitiiti i le auro o Ofeira.
13 O le mea lea ‘ou te fa‘agateteina ai le lagi,e lūlū‘eseina fo‘i le lalolagi i le mea o i ai,i le to‘atama‘i o le ALI‘I o ‘au ma le aso o lona to‘asā tele.
14 E pei o le sevi ‘ua tulia,e pei o le lafu mamoe fo‘i e leai sē na te fa‘apotopotoina,latou te ta‘itasi ma liliu atu i lona lava nu‘u,latou te ta‘itasi fo‘i ma sola i lona lava lau‘ele‘ele.
15 O i latou uma o ē maua e tutu‘i ‘iā te i latou,‘atoa ma i latou uma e pu‘ea, e oti i latou i le pelu.
16 E palasi a latou tama meamea i o latou luma;e vetea o latou fale, e fetosoina fo‘i a latou avā.
17 Fa‘auta, ‘ou te fa‘aoso atu Metaie tau ma i latou, latou te lē manatu i ario,e le manana‘o fo‘i i latou i auro.
18 O a latou ‘aufana e nutimomomoina ai taulele‘a,latou te lē alolofa fo‘i i fānau, latou te lē fa‘asaoina tama.
19 O Papelonia fo‘i, o lē ‘ua sili ‘ona matagofie i mālō,o le ‘a‘ai matagofie e mitamita ai Kaletaia,e ‘avea lava lea e pei o le fa‘aumatiao Sotoma ma Komoro e le Atua.
20 E lē toe ‘ainā e fa‘avavau,e lē mau ai lava se tasi i lea tupulaga ma lea tupulaga;e lē tolauapi ai fo‘i le Arapi,o leoleo mamoe fo‘i latou te lē ‘ave ai o latou lafu e ta‘o‘oto ai.
21 ‘Ae ta‘o‘oto ai manu fe‘ai o le vao,e tūtūmu fo‘i o latou fale i lulu,e mau ai fo‘i iaena, e ta‘a‘alo ai fo‘i ‘oti o le vao.
22 E tagi fo‘i aie i o latou maota,‘atoa ma luko i maota sa fiafia ai.E lata mai ona po,e lē fa‘alevalevaina fo‘i ona aso.