1 O lo‘o fa‘apea ‘ona fetalai mai o le ALI‘I i lē ‘ua fa‘au‘uina e ia, o Kuresa.O lē ‘ua ‘ou tāofia lona lima taumatau,‘ia fa‘ato‘ilaloina nu‘u i ona luma.‘Ou te tatalaina fo‘i sulugātiti o tupu;e tatalaina i ona luma o puipui vae lua;e lē punitia fo‘i faitoto‘a.
2 O a‘u lava, ‘ou te savali atu i ou luma,ma ‘ou fa‘alauleleiina mea maupu‘epu‘e.‘Ou te nutinini‘i i puipui ‘apamemea;‘ou te gauia fo‘i fa‘amau u‘amea.
3 ‘Ou te foa‘i atu fo‘i ‘iā te oe ‘oloa o lo‘o i le pogisā,ma ‘oloa lilo o lo‘o i mea nanā;‘ina ‘ia e iloa o a‘u lava o le ALI‘I,o lē vala‘au i lou lava igoa, o le Atua o Isaraelu.
4 ‘Ona o la‘u ‘au‘auna o Iakopo, ma Isaraelu lē na a‘u filifilia,o le mea lea ‘ua ‘ou vala‘auina ai oe i lou lava igoa;‘ua ‘ou ta‘ua lou igoa, a o ē le‘i iloa a‘u.
5 O a‘u o le ALI‘I, ‘ae leai lava se tasi;e leai se Atua, na o a‘u lava;‘ua ‘ou fusia oe, a o e le‘i iloa a‘u.
6 ‘Ina ‘ia latou iloa, e āfua mai i le mea e alu a‘e ai le lā,e o‘o i le mea e alu ifo ai, e leai se tasi na o a‘u;o a‘u o le ALI‘I, ‘ae leai lava se tasi.
7 O a‘u lē faia le malamalama, ma fa‘atupuina le pouliuli;o lē faia le manuia, ma fa‘atupuina le mala;o a‘u o le ALI‘I, o lē faia ia mea uma.
8 To‘ulu mai ia, o oe le lagi i luga;o ao fo‘i, ‘ia fa‘amaligi mai le amiotonu;‘ia fa‘amaga mai le lau‘ele‘ele,ma ‘ia fua mai le olataga ma le amiotonu,‘ia fa‘atupuina fa‘atasi;O a‘u o le ALI‘I, ‘ua ‘ou faia lea mea.
9 ‘Oi talofa i lē ‘ua finau ma lē na faia o ia,o le ta‘ega ipu i ta‘ega ipu o le ‘ele‘ele.Pe fai atu ‘ea le ‘omea i lē na te gaosia,“O le a ‘ea ‘e te faia?” pe fai atu lau galuega,“‘Ua leai ni ona lima?”
10 ‘Oi talofa i lē na te fai atu i lona tamā,“O le a ‘ea ‘ua e fānaua?”pe fai atu i le fafine, “O le a ‘ea ‘ua e fānau mai?”
11 O lo‘o fa‘apea ‘ona fetalai mai o le ALI‘I, le Pa‘ia o Isaraelu,ma lē na faia o ia, Fesili mai ia ‘iā te a‘u i mea o le a tutupu,fai mai ‘iā te a‘u i o‘u atali‘i ma le galuega a o‘u lima.
12 O a‘u lava, na ‘ou faia le lalolagi,ma a‘u faia tagata o i ai.O a‘u, o ‘ou lava lima na fofola ai le lagi,ma a‘u pule i ‘au uma o i ai.
13 O a‘u lava, ‘ua ‘ou fa‘aosoina mai o ia i le amiotonu;‘ou te fa‘alauleleia fo‘i ona ala uma;O ia na te fa‘atūina la‘u fai‘a‘ai,ma tu‘uina mai o‘u tagata sa tāfea latou te ō.E le ‘ona o le taui, po o se mea alofa,‘ua fetalai mai ai le ALI‘I o ‘au.
14 O lo‘o fa‘apea ‘ona fetalai mai o le ALI‘I:O le ‘oa o Aikupito, ma mea fa‘atau a Aitiope ‘atoa ma Sepa,o tagata tino ‘e‘ese, latou te ō ane ‘iā te oe,e fai fo‘i i latou mou tagata.Latou te mulimuli atu ‘iā te oe,latou te ō ane ma maea u‘amea,latou te ifo atu ‘iā te oe,ma latou ole atu ‘iā te oe, e fa‘apea,“‘Ua na o oe ‘ua i ai le Atua, ‘ae leai se tasi,‘ua leai se tasi Atua.”
15 E moni, o oe lava le Atua e fa‘aliloina oe e oe,le Atua o Isaraelu, le Fa‘aola.
16 ‘Ua mamā i latou, ‘ua māsiasi lava o i latou uma;‘ua latou o fa‘atasi ‘ina ‘ua māsiasi, o tufuga ia o ē fai tupua.
17 ‘Ae fa‘aolaina Isaraelu e le ALI‘I,o le olataga e fa‘avavau lava;tou te lē mamā,tou te lē māsiasi fo‘i e fa‘avavau fa‘avavau lava.
18 Auā o lo‘o fa‘apea ‘ona fetalai mai o le ALI‘I:O lē na faia le lagi; o ia lava o le Atua;o le tufuga o lē na faia le lalolagi.O ia na fa‘atumauina; na ia le faia fua,na ia faia ‘ina ‘ia ‘ainā.O a‘u o le ALI‘I, ‘ae leai se tasi.
19 ‘Ou te le‘i tautala fa‘alilolilo i se mea pogisā o le lalolagi;‘ou te le‘i fai atu i le fānau a Iakopo,“‘Ia ‘outou sā‘ili fua mai ‘iā te a‘u;”o a‘u o le ALI‘I, o lē tautala ma le fa‘amaoni,o lē fa‘aali atu mea tonu.
20 ‘Ua fetalai mai le ALI‘I:‘Ia fa‘apotopotoina, ma ia ō mai ‘outou,ia fa‘alatalata fa‘atasi mai lava.O ‘outou ē ‘ua sao mai nu‘u ‘ese;latou te lē iloa o ē tau‘ave le la‘au o lo latou tupua ‘ua tama latou tatalo i le atua na te lē mafai ‘ona fa‘aola.
21 Fa‘aali mai ia, ma ‘ia ‘outou fa‘alatalata mai;‘ia filifili fa‘atasi fo‘i i latou.O ai ‘ea ‘ua na fa‘ailoa mai lenei mea mai anamua,‘ua fa‘aalia mai talu anamua?E lē o a‘u ‘ea o le ALI‘I?e leai se tasi atua, ‘ua na o a‘u lava.O le Atua amiotonu, i le ma le Fa‘aola,e leai se tasi na o a‘u.
22 Liliu mai ia ‘iā te a‘u, tou te ola ai,o ‘outou tulu‘iga uma o le lalolagi;auā o a‘u o le Atua, ‘ae leai lava se tasi.
23 ‘Ua ‘ou tautō ‘iā te a‘u lava,‘ua mavae atu le ‘upu i lo‘u gutu e fa‘amaoni,e lē toe fo‘i mai lava.“E to‘otuli mai ‘iā te a‘u o tulivae uma lava,e tautō mai laulaufaiva uma lava.”
24 E fai mai se tasi,‘Ua na o le ALI‘I ‘ua ‘ou maua ai le amiotonu ma le malosi;e sau o ia ‘iā te ia;‘ae mamā i latou uma o ē ‘ua ita ‘iā te ia.