1 ‘Ou te lē fa‘alologo auā o Siona,‘ou te lē mapu fo‘i auā o Ierusalema.Se‘ia alu atu lana amiotonu e pei o se mea pupula,ma lona olataga e pei o le sulu ‘ua mumū.
2 E va‘ai nu‘u ‘ese i lau amiotonu,ma tupu uma latou te va‘ai i lou mamalu.E igoa fo‘i oe i le igoa fou,e ta‘ua mai e le fofoga o le ALI‘I.
3 E fai oe ma pale matagofie i le ‘a‘ao o le ALI‘I,ma pulou o le tupu i le alofilima o lou Atua.
4 E lē toe ta‘ua oe: ‘Ua lafoa‘iina;e lē toe ta‘ua fo‘i lou lau‘ele‘ele: ‘Ua tu‘ufua;‘Ae peita‘i e igoa oe: ‘Ua ‘iā te ia lo‘u fiafia;e igoa fo‘i lou lau‘ele‘ele: O le nofo tane.Auā e fiafia le ALI‘I ‘iā te oe,e nofo tane fo‘i lou lau‘ele‘ele.
5 Auā e pei o le taule‘ale‘a ‘ua fai avā i le taupou,e fa‘apea au tama tane ‘ona fai avā ‘iā te oe.E pei ‘ona fiafia fo‘i o le fa‘ato‘āfaiavā i lana avā,e fa‘apea ‘ona fiafia o lou Atua ‘iā te oe.
6 Ierusalema e, ‘ua ‘ou tofia ē leoleo i luga o ou pā,latou te lē fa‘alologo e ‘atoa le ao e ‘atoa fo‘i le po.‘Ae fa‘apea lava pea; o ‘outou o ē ta‘uta‘uina le ALI‘I,‘aua ne‘i filemū ‘outou.
7 ‘Aua fo‘i ne‘i tu‘u atu ‘iā te ia ‘ia filemū,se‘ia fa‘amauina e ia,ma se‘ia faia Ierusalema ma vi‘iga i le lalolagi.
8 ‘Ua tautō le ALI‘I i lona ‘a‘ao taumatau ma lona ‘a‘ao malosi,‘ou te lē toe avatu lava lau saito e ‘ai mā ē ita ‘iā te oe.E lē inumia fo‘i e le fānau a le tagata ‘eselau uaina sa tigāina ai oe.
9 ‘Ae peita‘i o ē fa‘aputuina latou te ‘a‘ai ai ma latou vivi‘i i le ALI‘I;O ē taulia mai latou te feinu ai i o‘u lotoā pa‘ia.
10 Ui atu, ‘inā ui atu ia i faitoto‘a,teu le ala o le nu‘u; fa‘alaulelei.‘Inā fa‘alaulelei ia le ala tele,‘ia āu ‘ese ai ma‘a;ia fa‘atū i luga se tagāvai mo le nu‘u.
11 Fa‘auta, ‘ua fa‘ailoa e le ALI‘I e o‘o i le tulu‘iga o le lalolagi.Fai atu i le tama fafine a Siona,“Fa‘auta, ‘ua o‘o mai lou Fa‘aola;fa‘auta, o lo‘o ‘iā te ia lana taui,‘ua i ona luma fo‘i le totogi o lana galuega.”
12 E igoa fo‘i i latou, “O le nu‘u pa‘ia,o ē ‘ua fa‘atauina e le ALI‘I;”E igoa fo‘i oe, “O le ‘a‘ai e uia,O le ‘a‘ai e lē lafoa‘iina.”