1 ‘Ua fetalai mai le ALI‘I ‘iā te a‘u, ‘Ia e tago i se papatusi lautele ma ‘ia e tusi ai i le tofi a le tagata, “o Maeli-sala-asa-pasa;”
2 ‘ona ‘ou ‘a‘ami lea o molimau fa‘amaoni, o Ulia le ositaulaga ma Sakaria le atali‘i o Iperekia.
3 ‘Ona ‘ou alu ane lea i le perofeta fafine, ‘ona tō ai lea o ia, ‘ua fānau mai fo‘i lana tama tane; ‘ona fetalai mai ai lea o le ALI‘I ‘iā te a‘u, ‘Ia e fa‘aigoa ‘iā te ia o Maeli-sala-asa-pasa.
4 Auā a o le‘i o‘o ‘ina iloa e le tama ‘ona vala‘au, “Lo‘u tamā e” po o “Lo‘u tinā e,” e ‘avea le ‘oloa o Tamaseko, e vetea fo‘i Samaria i luma o le tupu o Asuria.
5 ‘Ua toe fetalai mai le ALI‘I ‘iā te a‘u, ‘ua fa‘apea mai:
6 ‘Ona ‘ua te‘ena e lenei nu‘u o le vai o Seloa ‘ua tafe lemū, ma ‘ua fiafia ‘iā Resina ma le atali‘i o Remalia;
7 o le mea lea, fa‘auta, e ‘aumai ai e le Ali‘i i luga ‘iā te i latou o le vai o le vaitafe, e malosi ma le tele lava, o le tupu o Asuria lea, ma lona mamalu uma; e alu a‘e ia i ona alāvai uma, e lofia fo‘i ona ‘auvai uma.
8 E tafe atu ia i Iuta, e oso ai, e lofia fo‘i, e o‘o a‘e lava i ua; o lē falōina fo‘i o ona ‘apa‘au e tumu ai le lautele o lou nu‘u, Emanuelu e!
9 O ‘outou nu‘u e, fa‘atasi ia ‘outou, ‘ae lepetia ‘outou;fa‘alogologo mai ia ‘outou mea mamao uma o le lalolagi e;fufusi ia ‘outou ‘iā te ‘outou,‘ae lepetia ‘outou; ‘inā fufusi ia ‘outou ‘iā te ‘outou, ‘ae lepetia ‘outou.
10 Taupulepule ia ‘outou, ‘ae fa‘alēaogāina;‘inā fai atu ia i se ‘upu, ‘ae lē fa‘atumauina;auā o lo‘o ‘iā te i matou le Atua.
11 Auā ‘ua fa‘apea ‘ona fetalai mai o le ALI‘I ‘iā te a‘u ma le lima malosi, ‘ua ia vavao mai fo‘i ‘iā te a‘u, ‘aua ‘ou te savali i le ala o lenei nu‘u, ‘ua fa‘apea mai:
12 ‘Aua tou te fai atu, O lē fouvale, i mea uma e ta‘ua o le fouvale i lenei nu‘u; ‘aua fo‘i tou te fefefe i mea latou te fefefe ai, ‘aua fo‘i tou te matata‘u.
13 A o le ALI‘I o ‘au, ‘ia pa‘ia o ia ‘iā te ‘outou, o ia lava tou te fefefe ai, o ia fo‘i tou te matata‘u ai.
14 E fai fo‘i o ia ma malumalu; ‘ae fai ma ma‘a e tausuai ai, ma papa e tautevateva ai i ‘āiga uma e lua o Isaraelu; e fai ma mailei ma matāsele i ē o nonofo i Ierusalema.
15 E to‘atele fo‘i o i latou e tautevateva ma latou pa‘u‘ū, o gaugau i latou, ma maileia, e pu‘ea fo‘i i latou.
16 Fusifusi ‘ia le mau, fa‘amaufa‘ailoga ia le tulafono mā o‘u so‘o.
17 ‘Ou te fa‘atalitali i le ALI‘I, o lē ‘ua ‘alo ona fofoga i le ‘āiga o Iakopo, ‘ou te fa‘amoemoe fo‘i ‘iā te ia.
18 Fa‘auta, o a‘u nei ma la‘u fānau, o ē ‘ua foa‘iina mai ‘iā te a‘u e le ALI‘I, e fai ma fa‘ailoga ma mea e ofo ai ‘iā Isaraelu, mai le ALI‘I o ‘au, o lē afio i le mauga o Siona.
19 A latou fai atu fo‘i ‘iā te ‘outou. “Sā‘ili atu ia i aitu vavalo ma taulāitu o ē leo ‘i‘i, ma ē ‘ua memu, ‘ia ‘outou tali atu; A le sā‘ili atu ‘ea le nu‘u i lo latou Atua? E sā‘ili atu ‘ea i ē ‘ua oti mo ē o ola?
20 ‘inā sā‘ili ia i le tulafono ma le mau.” ‘Āfai latou te lē tautala e tusa ma ia ‘upu, ‘ua leai lava se malamalama ‘iā te i latou.
21 Latou te ui atu fo‘i i le nu‘u o puapuagātia ma matelaina; a matelaina fo‘i e ita ai lava i latou, ‘ona latou fetu‘u ai lea i lo latou tupu ma lo latou Atua ma va‘ai i luga;
22 e va‘ai i latou i le lau‘ele‘ele, fa‘auta fo‘i, o le puapuagā ma pouliuli, o le pouliuli e atuatuvale ai; e tulia fo‘i i latou i le pogisā.#