1 Fa‘auta, e pule le tupu ma le amiotonu,e pule fo‘i ali‘i ma le tonu.
2 E fai fo‘i le tagata e pei o se lafitaga i le matagi,ma se mea e malu ai i le afā, e pei o vaitafe i le nu‘u naumati,e pei o le paolo fo‘i o le papa tele i le nu‘u ‘ua lē o i ai se vai.
3 E lē fa‘apouliuligia mata o ē va‘ai;e ua‘i mai fo‘i taliga o ē fa‘alogo mai.
4 O loto fo‘i o ē oso popole e mafaufau e iloa ai;o laulaufaiva fo‘i o ē nanu e vave ‘ona matala a latou ‘upu.
5 E lē toe ta‘uagaleleia lē ‘ua agaleaga,e lē toe ta‘ua fo‘i lē ‘ua mataoge, o le matamau.
6 Auā e tautala le agaleaga i mea leaga,e sauni le agasala i lona loto,e fai amio fa‘alēmata‘u,e tautala fo‘i i mea sesē i le ALI‘I,‘ina ‘ia fa‘amatelaina le tagata ‘ua fia ‘ai,‘ua ‘ave‘esea fo‘i le mea e inu i lē ‘ua fia inu.
7 O togafiti a le mataoge e leaga ia;‘ua taupulepule ia i togafiti e fa‘aumatia ai i ‘upu pepelo e ‘ua tigāina;e fa‘aumatia fo‘i ē ‘ua matitivaa o tautala i latou i ‘upu tonu.
8 A o lē ‘ua matamau ‘ua sauni e ia mea e matamau ai;o le matamau fo‘i e fa‘atumauina ai o ia.
9 ‘Inā tula‘i ia ‘outou fafine o nonofo fa‘afifilemū,‘inā fa‘alogologo mai ia i lo‘u leo;o ‘outou tama fafine fa‘atalanoa,ua‘i mai ia o ‘outou taliga i a‘u ‘upu.
10 A mavae le tausaga ma ni aso e tupu a‘i,‘ona gatete ai lea ‘outou fafine fa‘atalanoa;auā e i‘u vale le fuata vine,e lē o‘o ‘ina fa‘aputuina ona fua.
11 ‘Inā gatete ia ‘outou fafine o nonofo fa‘afifilemū;‘inā tetemū ia ‘outou fafine fa‘atalanoa;tō ‘ese ia o ‘outou ‘ofu, ‘inā fa‘asau ia,ma ‘ia lavalava ‘outou i ‘ie talatala.
12 Latou te tu‘i i o latou susu, ‘ona o le fanua matagofie,‘ona o vine fua tele.
13 E tutupu mai i le lau‘ele‘ele o lo‘u nu‘u o la‘au talatala ma la‘au tuitui,e tutupu lava i luga o fale ‘ua ‘outou fiafia i ai i le ‘a‘ai e ‘oli‘oli.
14 Auā e tu‘ufua maota, e lafoa‘iina le ‘a‘ai sa ta‘alili ai tagata;o Ofele ma le ‘olo e fai ma ana e fa‘avavau;o le mea e fiafia i ai asini o le vao,o le mea e tata‘a ai le lafu;
15 se‘ia liligi ifo i luga ‘iā te i tatou le Agaga mai lugā,ma ia ‘avea ma fanua lafulemū le vao lafuā,e ta‘ua fo‘i le fanua lafulemū, o le vao matua.
16 ‘Ona mau ai lea o le fa‘amasinoga i le vao lafulafuā,e nofo fo‘i le amiotonu i le fanua lafulemū.
17 O le mea e tupu i le amiotonu o le manuia lea;e tupu mai fo‘i i le amiotonu le filemū ma le saogalemū e fa‘avavau.
18 E nonofo fo‘i lo‘u nu‘u i le mea e manuia ai ma fale e saogalemū ai,ma mapusaga e filemū ai.
19 ‘Ae totō ifo le uato‘a i le fa‘apa‘ūina o le vao;e lafoina fo‘i i lalo le ‘a‘ai i le mea maulalo.
20 ‘Amu‘ia ‘outou o ē lūlūina saito i tafatafa o vai uma,o ē tu‘uina atu i ai vae o povi ma asini.#