1 Ala mai ia, ‘inā ala mai; ‘ia e ‘ofu i lou malosi,o oe Siona e! ‘ia e ‘ofu i ou ‘ofu matagofie,o oe Ierusalema e, le ‘a‘ai ‘ua fa‘asāina.Auā e lē toe alu atu ‘iā te oe lē ‘ua lē peritomeina ma lē ‘ua leaga.
2 ‘Ia e lūlū oe ‘iā te oe a‘i le efuefu;tula‘i ia, ‘inā e ti‘eti‘e i lou nofoa.O oe Ierusalema e; tatala mai ia noanoaga o lou ua,o oe sa tāfea, le tama fafine a Siona.
3 Auā o lo‘o fa‘apea ‘ona fetalai mai o le ALI‘I: Na fa‘atauina atu ‘outou, ‘ua lē tauia mai; e fa‘atauina mai fo‘i ‘outou, ‘ae lē avatu ai ni ario.
4 Auā o lo‘o fa‘apea ‘ona fetalai mai o le Ali‘i o le ATUA, Na alu ifo lo‘u nu‘u anamua i Aikupito o āumau ai; ‘ua fa‘asauā fua fo‘i Asuria ‘iā i latou.
5 A o lenei, se a ‘ea sa‘u mea ‘i‘inei? ‘ua fetalai mai ai le ALI‘I; auā ‘ua ‘avea fua lo‘u nu‘u; o ē pule ‘iā i latou, ‘ua latou uiō, ‘ua fetalai mai ai le ALI‘I; ma ‘ua ‘inosia pea lava lo‘u igoa i aso uma.
6 O le mea lea e iloa ai lo‘u igoa e lo‘u nu‘u; o le mea lea e iloa ai i lea lava aso, o a‘u lava lē na fai atu: Fa‘auta mai ‘iā te a‘u!
7 E matuā matagofie i luga o mauga o vae o lē ‘ua fai mai le tala lelei,o lē logologo mai le manuia,‘ua tala mai le tala lelei;‘ua fa‘ailoa mai le olataga;‘Ua fai mai ‘iā Siona,“O lo‘o pule lou Atua.”
8 O le leo o ou tagata va‘ai, ‘ua latou leo tetele,‘ua latou ‘alalaga fa‘atasi.Auā latou te iloa e fa‘afesaga‘i lava,pe a fa‘afoisia Siona e le ALI‘I.
9 ‘Ia ‘alalaga fiafia fa‘atasi‘outou o mea fa‘atafunaina i Ierusalema.Auā ‘ua fa‘amafanafanaina lona nu‘u e le ALI‘I,‘ua na fa‘atauina Ierusalema.
10 ‘Ua tō ‘ese e le ALI‘I le ‘ofu i lona ‘a‘ao pa‘ia i luma o nu‘u uma;‘ua iloa fo‘i e tulu‘iga uma o le lalolagi le olataga mai lo tatou Atua.
11 Ō ‘ese ia, ‘inā ō ‘ese ‘outou,‘ia ‘outou ō atu nai lea mea.‘Aua ne‘i pa‘i atu i se mea leaga;ō atu ia ‘outou nai totonu ‘iā te ia;‘ia mamā ‘outou o ē tau‘ave ipu a le ALI‘I.
12 Auā tou te lē ō atu ma le fa‘ata‘alise,tou te lē ō atu fo‘i fa‘asōsōla.Auā e afio le ALI‘I i o ‘outou luma;e muli‘au fo‘i ‘iā te ‘outou le Atua o Isaraelu.
13 ‘Ua fetalai mai le ALI‘I:Fa‘auta, e manuia la‘u ‘Au‘auna,fa‘asilisiliina o ia ma vi‘ia ma matuā fa‘ane‘ene‘eina.
14 E pei ‘ona ofo o tagata e to‘atele ‘iā te oe,‘ua fa‘aleaga fa‘apea ona fofoga e sili i mata o tagata,ma lona tino e sili i tino o tagata.
15 E fa‘apea ‘ona sausauina e ia o nu‘u e tele;‘ona o ia e punitia ai e tupu o latou lava fofoga.Auā latou te va‘aia le mea na lē talatalaina ‘iā i latou,latou te iloa fo‘i le mea na latou lē fa‘alogo i ai.