1 Fa‘auta, e le‘i fa‘apu‘upu‘uina le ‘a‘ao o le ALI‘I, ‘ia lē mafa‘aola; e lē tutuli fo‘i ona taliga, ‘ia lē mafa‘afofoga.
2 ‘Ae peita‘i o a ‘outou amio leaga ‘ua fai ia ma pupuni i le vā o ‘outou ma lo ‘outou Atua, o a ‘outou agasala fo‘i ‘ua ‘alo ai ona fofoga ‘iā te ‘outou ‘ua ia lē fa‘afofoga mai ai.
3 Auā ‘ua leaga o ‘outou lima i le toto ma ‘outou tamatama‘i lima ‘ua leaga ia i le amio leaga; ‘ua tala pepelo o ‘outou laugutu, ‘ua tautala o ‘outou laulaufaiva i le mea fa‘api‘opi‘o.
4 ‘Ua leai sē vala‘au i le amiotonu, ‘ua leai sē finau ma le fa‘amaoni; ‘ua latou fa‘atuatua i le mea fa‘atauva‘a; ‘ua tala pepelo, ‘ua tō i latou i le agasala, ma ‘ua fānau mai le amio leaga.
5 ‘Ua latou togitogi i fua o le gata uogo, ‘ua ‘outou lalaga le apogaleveleve; o lē na te ‘aina ni o latou fua e oti o ia; o le fua ‘ua solia e oso mai ai le gata.
6 E lē ‘avea o latou apogaleveleve ma ‘ofu; latou te lē ‘o‘ofu fo‘i i mea ‘ua latou faia; o a latou galuega, o galuega ia a le amio leaga; o le amio fa‘asauā ‘ua i o latou lima.
7 ‘Ua taufetuli o latou vae i le mea leaga; ‘ua latou fa‘ata‘alise e sasa‘a ai le toto o ē ‘ua lē sala; o latou manatu o manatu leaga ia; o le fa‘atafunaga ma le lepetia o mea ‘ua i o latou ala ia.
8 ‘Ua latou lē iloa le ala e manuia ai, ‘ua leai se tonu i mea latou te faia; ‘ua latou fa‘api‘opi‘oina o latou lava magāala; o i latou uma o ē sāvavali ai, latou te lē iloa se manuia.
9 O le mea lea ‘ua mamao ai ma i matou le fa‘amasinoga, ‘ua lē maua mai fo‘i i matou e le amiotonu; ‘ua matou fa‘atalitali i le malamalama, fa‘auta fo‘i, o le pouliuli; ‘ua fa‘atalitali i le pupula mai, a ‘ua matou sāvavali i le pogisā.
10 ‘Ua matou tautāgotago atu i le pā e pei o ē tauaso; ‘ua matou tautāgotago atu lava e pei o ē ‘ua leai ni mata; ‘ua matou tausuai i le aoauli e pei o le segisegi; ‘ua matou i mea o i ai le manuia, e pei o ē ‘ua oti.
11 ‘Ua gu i matou uma lava e pei o urosa; ‘ua matuā tagi fo‘i i matou e pei o lupe; ‘ua matou fa‘atalitali i le fa‘amasinoga, ‘ae leai; ‘ua fa‘amoemoe i le fa‘aolataga, ‘ae mamao ma i matou.
12 Auā ‘ua fa‘ateleina a matou solitulafono i ou luma; ‘ua molia fo‘i i matou e a matou agasala; auā o lo‘o ‘iā te i matou a matou solitulafono; ‘ua matou iloa fo‘i a matou amio leaga;
13 o le solitulafono ma le pepelo i le ALI‘I; o le ō ‘ese i lo matou Atua; o le tautala fa‘asauā ma le ‘upu fa‘afouvale; o le mānatunatu ma le tautala mai i ‘upu pepelo mai le loto.
14 ‘Ua fa‘afoisia i tua le fa‘amasinoga, ‘ua tu mamao atu le amiotonu; auā ‘ua pa‘ū le fa‘amaoni i le malae, e lē mafai ‘ona ulu mai le amio sa‘o.
15 ‘Ua lē iloa lava le fa‘amaoni; o lē ‘ua ‘alo i le leaga ‘ua vetea ana mea.‘Ona silafia lea e le ALI‘I, ‘ua leaga fo‘i ‘iā te ia ‘ina ‘ua leai se fa‘amasinoga.
16 Na ia silafia ‘ua leai se tagata; ‘ua ofo lava ‘ina ‘ua leai sē fautua; o le mea lea na fai ai le olataga e lona lava ‘a‘ao; o lana amiotonu fo‘i na lāgomia ai o ia.
17 Na ia ‘ofu i le amiotonu e pei se ufifatafata, sa i lona ao le puloutau o le olataga; na ia ‘ofu i ‘ofu o le taui ma sui e fai ma ‘ofu; na ia ‘ofu fo‘i i le mā‘elegā e pei se ‘ofu talaloa.
18 E pei o a latou amio e fa‘apea ‘ona taui mai e ia, o le to‘asā i ē ‘ua fai o ia mo latou fili, o le taui i ē ita ‘iā te ia; na te taui atu lava i nu‘u tu matāfaga.
19 E pau mai i sisifo, latou te matata‘u i le suafa o le ALI‘I; e pau mai fo‘i i le mea e alu a‘e ai le la, e matata‘u i latou i lona mamalu; a o‘o mai e pei se vaitafe lē ‘ua ita mai, ‘ona fa‘atūina lea o se tagavai e tete‘e atu ‘iā te ia e le Agaga o le ALI‘I.
20 E afio mai fo‘i le Fa‘aola i Siona, e afio mai fo‘i i ē liliu mai nai le solitulafono o lo‘o ‘iā Iakopo, ‘ua fetalai mai ai le ALI‘I.
21 A o a‘u, o la‘u feagaiga lenei e faia ma i latou, ‘ua fetalai mai ai le ALI‘I, O lo‘u Agaga o lo‘o i luga ‘iā te oe ma a‘u ‘upu ‘ua ‘ou tu‘uina atu ai i lou gutu, e le te‘a ‘ese ia i lou gutu ma gutu o lau fānau ma gutu o le fānau a lau fānau, e āfua mai i na ona aso, ‘ae o‘o i le fa‘avavau, ‘ua fetalai mai ai le ALI‘I.#