1 ‘Ia ‘alaga tele, ‘aua le leo itiiti, ‘ia e leo tele e pei o se pū; ma e fa‘aali atu i lo‘u nu‘u o latou solitulafono, ma ē fa‘aali atu i le ‘āiga o Iakopo a latou agasala.
2 A ‘ua latou sā‘ili mai ‘iā te a‘u i lea aso ma lea aso, ‘ua latou fia iloa o‘u ala; e pei o se nu‘u ‘ua faia le amiotonu, ma latou le lafoa‘i le fa‘atonuga a lo latou Atua; ‘ua latou fesili mai ‘iā te a‘u i fa‘amasinoga tonu, ‘ua latou fa‘alatalata atu i le Atua ma le fiafia.
3 “Se a le mea ‘ua matou anapopogi ai, a ‘e te lē silasila mai? se a le mea ‘ua fa‘atigāina ai i matou e i matou, a ‘e te lē silafia?” Fa‘auta, o le aso e anapopogi ai ‘outou, ‘ua ‘outou maua ai le fiafia ma ‘outou fa‘atauānauina a ‘outou ‘au‘auna ‘ia faia a ‘outou galuega uma.
4 Fa‘auta, ‘ua ‘outou anapopogi ia finau ai ma misa ai, ma ‘ia tu‘i ai i le lima e fai ai le amio leaga; ‘aua tou te anapopogi e pei o le asō, e lagona ai o ‘outou leo i le mea maualuga.
5 E fa‘apenā ‘ea le anapogi ‘ou te loto i ai; o le aso e fa‘atigā ai le tagata ‘iā te ia lava? e punou ai ‘ea lona ulu e pei o le fiso? e fola lona moega i le ‘ie talatala ma le lefulefu? ‘E te fa‘aigoa ‘ea lenā mea o le anapogi ma le aso e fiafia i ai le ALI‘I?
6 E lē o lenei ‘ea le anapogi ‘ou te loto i ai? ‘Ina ‘ia tatalaina fusi na faia i le amio leaga, e tatala fusi o le amo, e tu‘uina atu ‘ia sa‘oloto ē ‘ua fa‘asauāina, ma ‘ia ‘outou gausia amo uma lava.
7 E lē o lenei ‘ea? ‘ona ia tofitofi au mea e ‘ai i lē ‘ua fia ‘ai, ‘ia ‘aumai i lou fale ē ‘ua matitiva ma fa‘asauāina; a e iloa lē ‘ua lē lavalavā ‘e te fa‘a‘ofuina o ia, ‘aua fo‘i ‘e te lafi ‘iā i latou o lou lava ‘āiga.
8 ‘Ona gafoa mai ai lea o lou malamalama e pei o le tafa o ata, e ta‘alise ‘ona tupu mai fo‘i o lou mālōlō; e alu atu fo‘i lau amiotonu i ou luma, e muli‘au mai le pupula o le ALI‘I ‘iā te oe.
9 ‘Ona e vala‘au lea, ‘ae tali mai ai le ALI‘I; ‘e te ‘alaga atu, ‘ae fetalai mai o ia: O a‘u lenei; pe ‘āfai ‘e te fa‘ate‘a‘eseina le amo ‘iā te ‘outou, o le tusi o le lima ma le ‘upu vale.
10 ‘Āfai fo‘i ‘e te alofa atu i lē ‘ua fia‘ai ma ē fafaga ‘ia mā‘ona o lē ‘ua tigā; ‘ona alu a‘e lea o lou malamalama i le pouliuli, ma lou pogisā e pei o le aoauli ia.
11 E ta‘ita‘iina fo‘i oe e lē aunoa e le ALI‘I; e fa‘amalie fo‘i o ia ‘iā te oe pe a oge vai, ma fa‘amalosia ou ivi; e ‘avea fo‘i oe e pei se fanua ‘ua fa‘asūsūina, e pei o le punāvai fo‘i e lē mate ona suāvai.
12 O ē tutupu mai ‘iā te oe latou te ati a‘e mea na fa‘atafunaina mai anamua; ‘e te fa‘atūina fa‘avae o lea tupulaga ma lea tupulaga; e igoa ai oe, O lē ati a‘e i solo, O le fa‘aola i magāala i mea e nonofo ai.
13 ‘Āfai ‘e te liliu ‘ese lou vae i le sapati, a e lē faia lou lava loto i lo‘u aso sa; ma e ta‘ua le sapati, o le aso fiafia, le aso ‘ua sa i le ALI‘I, ‘ua mamalu; ma e fa‘amamalu i ai, o lo‘o e lē faia au lava amio, o lo‘o lē maua ai lou lava fiafia, ma e lē tautala ai i au lava ‘upu;
14 ‘ona e fiafia lava lea i le ALI‘I; ‘ou te fa‘ati‘eti‘e ane fo‘i ‘iā te oe i luga o mea maualuluga o le lalolagi, ‘ou te fafaga fo‘i ‘iā te oe i le tofi o Iakopo lou tamā; auā ‘ua fetalai mai ai le fofoga o le ALI‘I.#