1 O lo‘o fa‘apea ‘ona fetalai mai o le ALI‘I: ‘Ia ‘outou tausia le fa‘amasinoga ma ‘outou faia le amiotonu; auā ‘ua latalata ‘ona o‘o mai o la‘u fa‘aolataga ma le fa‘aaliga o le amiotonu mai ‘iā te a‘u.
2 ‘Amu‘ia le tagata na te faia lenei mea ma le atali‘i o le tagata na te tāofimauina ai; o lo‘o tausi i le sapati ‘ia lē solia ma tāofi i lona lima ‘ia lē faia se mea leaga e tasi.
3 ‘Aua fo‘i ne‘i fai ane le tagata ‘ese, lē ‘ua fa‘atasi mai i le ALI‘I, e fa‘apea mai, “‘Ua matuā fa‘ate‘a‘eseina a‘u e le ALI‘I i lona nu‘u;”‘Aua le fai ane fo‘i le eunuka, “Fa‘auta, o a‘u o le la‘au popo.”
4 Auā o lo‘o fa‘apea ‘ona fetalai mai o le ALI‘I i eunuka o ē tausi i o‘u sapati ma latou manana‘o i mea ‘ou te loto i ai ma latou tāofi mau i la‘u feagaiga;
5 ‘ou te avatu ‘iā te i latou lava i lo‘u fale ma totonu o ‘ou pā, o le fa‘ailoga ma le igoa e sili ‘ona lelei i atali‘i ma afafine; ‘ou te avatu ‘iā te ia le igoa e fa‘avavau e le ‘ave‘eseina lava.
6 O tagata ‘ese fo‘i o ē fa‘atasi mai i le ALI‘I, ē o ‘au‘auna ‘iā te ia ma alolofa i le suafa o le ALI‘I, e fai māna ‘au‘auna, o i latou uma o ē tausi i le sapati ‘ae lē soli i ai ma latou tāofi mau i la‘u feagaiga.
7 ‘Ou te ‘aumaia i latou lava i lo‘u mauga pa‘ia, ma a‘u fa‘afiafia ‘iā te i latou i lo‘u fale tatalo; o a latou taulaga mū ma a latou taulaga e talia ia i lo‘u fatafaitaulaga; auā e ta‘ua lo‘u fale o le fale tatalo mo nu‘u uma.
8 ‘Ua fetalai mai le Ali‘i le ATUA, o lē na te fa‘apotopotoina ē ‘ua tulia o Isaraelu, ‘Ou te toe fa‘apotopotoina mai nisi ‘iā te ia, e fa‘aopoopo i ē ‘ua uma ‘ona fa‘apotopotoina ‘iā te ia.
9 O ‘outou manu uma o le vao e, ō mai, ‘inā ‘a‘ai, o ‘outou manu uma o le vao matua.
10 O ona tagata va‘ai, ‘ua tauaso i latou; o i latou uma latou te lē iloa se mea; o ulī gūgū i latou uma, latou te lē lavā ōu, o ē fai miti, o ē ta‘o‘oto, o fia momoe i latou.
11 O ulī ‘ai tetele i latou, latou te lē iloa se mā‘ona; o i latou fo‘i o leoleo mamoe, latou te lē iloa fa‘autauta, ‘ua fa‘asaga i latou uma i o latou lava ala, ‘ua ta‘itasi ma fa‘asaga i lana lava ‘oloa, e lē fa‘apito lava.
12 “Ō mai ia,” ‘ua latou fa‘apea mai, “tatou te ‘aumaia le uaina, tatou te inu ‘ia ‘onā i le ‘ava; e pei o le aso nei fo‘i a taeao e silisili ‘ese ‘ona lelei.”#