1 Sa i le nu‘u o Usa le tasi tagata, o lona igoa o Iopu; na sao le amio a lea tagata ma le amiotonu, sa mata‘u fo‘i o ia i le Atua ma ‘alo‘alo ‘ese i mea leaga.
2 Sa fānaua e ia ona atali‘i e to‘afitu ma afafine e to‘atolu.
3 Sa ‘iā te ia fo‘i manu o mamoe e fitu afe ma kamela e tolu afe ma povi e tasi le afe ma asini fafine e lima selau, ‘atoa ma ‘au‘auna e to‘atele lava; sa sili fo‘i lenei tagata i tagata uma lava i sasa‘e.
4 Sa feoa‘i ona atali‘i ma faia le tausamiga i o latou fale, e ta‘ito‘atasi ma lona aso; sa latou ‘a‘ami fo‘i i o latou tuafafine e to‘atolu, ‘ina ‘ia latou ‘a‘ai ma feinu fa‘atasi ma i latou.
5 ‘Ua uma le augāaso o latou tausamiga, ‘ona alu atu lea o le fe‘au a Iopu ma na fa‘apa‘iaina i latou; sa tula‘i o ia i le taeao lava ma na faia taulaga mū e fa‘atatau i le ‘atoa o i latou uma; auā sa fa‘apea a Iopu, “Atonu ‘ua agasala o‘u atali‘i ma fāifai i le Atua i o latou loto.” Sa fa‘apea lava ‘ona faia e Iopu i aso uma.
6 ‘Ua o‘o i le tasi aso, ‘ona ō mai ai lea o atali‘i o le Atua e tutū mai i luma o le ALI‘I; na sau fo‘i Satani fa‘atasi ma i latou.
7 ‘Ua fetalai atu le ALI‘I ‘iā Satani, “‘Ua e sau ‘ea mai fea?”‘Ona tali mai ai lea o Satani i le ALI‘I, ‘ua fa‘apea, “‘Ua ‘ou sau na a‘u fealua‘i i le lalolagi ma fesāvalia‘i ai.”
8 ‘Ua fetalai atu le ALI‘I ‘iā Satani, “‘Ua e mafaufau ‘ea i la‘u ‘au‘auna o Iopu, auā ‘ua leai se tasi e tusa ma ia i le lalolagi, o le tagata ‘ua sao lana amio ma le amiotonu, o lē ‘ua mata‘u i le Atua ma ‘alo‘alo ‘ese i mea leaga?”
9 ‘Ona tali mai ai lea o Satani i le ALI‘I, ‘ua fa‘apea mai, “‘Ua mata‘u fua ‘ea Iopu i le Atua?
10 ‘Ua e lē si‘osi‘omia ‘ea i le ‘aupā o ia ma lona fale, ‘atoa ma ana mea uma i itū uma? ‘ua e fa‘amanuia le galuega a ona lima, ‘ua e fa‘ateleina fo‘i ana manu i le fanua.
11 ‘Ae peita‘i ‘ia e ‘a‘apa atu lou ‘a‘ao ma ē tago atu i ana mea uma, pe na te lē fāifai ai ‘ea ‘iā te oe i ou lava luma?”
12 ‘Ona fetalai atu lea o le ALI‘I ‘iā Satani, “Fa‘auta, ‘ua i lou lima ana mea uma, tau o ia lava ‘aua ‘e te fa‘ao‘o i ai lou lima.” ‘Ona alu ‘ese ai lea o Satani i luma o le ALI‘I.
13 ‘Ua o‘o i le tasi aso, ‘ona ‘a‘ai ai lea ma feinu uaina o ona atali‘i ma ona afafine i le fale o lo latou uso ulumatua;
14 ‘ona sau lea o le tasi ‘au‘auna ‘iā Iopu, ‘ua fa‘apea mai, “Sa suatia le fanua e povi, sa ‘a‘ai fo‘i asini fafine i o latou tafatafa;
15 ‘Ona feosofi mai lea o tagata o Seepa ma latou faoa; ‘ua latou fafasi fo‘i i ‘au‘auna i le pelu; ‘ua ‘ou sao mai na o a‘u lava e to‘atasi, e ta‘u mai ai ‘iā te oe.”
16 O lo‘o tautala mai lenā, ‘ae sau fo‘i le tasi, ‘Ua fa‘apea mai, “‘Ua pa‘ū ifo le afi a le Atua mai le lagi, ‘ua susunu ai mamoe ma ‘au‘auna, ‘ua fa‘aumatia ai i latou; ‘ua ‘ou sao mai na o a‘u lava e to‘atasi, e ta‘u mai ai ‘iā te oe.”
17 O lo‘o tautala mai lenā, ‘ae sau fo‘i le tasi, ‘ua fa‘apea mai, “Na tofia ‘au e tolu e Kaletaia, ‘ona feosofi mai lea o i latou i kamela ma latou faoa, ‘ua latou fafasi fo‘i i ‘au‘auna i le pelu; ‘ua ‘ou sao mai, na o a‘u lava e to‘atasi, e ta‘u mai ai ‘iā te oe.”
18 O lo‘o tautala mai lenā, ‘ae sau le tasi, ‘ua fa‘apea mai, “Sa ‘a‘ai ma feinu uaina ou atali‘i ma ou afafine i le fale lo latou uso ulumatua;
19 fa‘auta mai fo‘i, sa agi mai le matagi tetele mai le vao, na pesi mai i tulimanu e fa o le fale, ‘ona pa‘ū ai lea i luga o taulele‘a, ‘ua oti ai i latou; ‘ua ‘ou sao mai, na o a‘u lava e to‘atasi, e ta‘u mai ai ‘iā te oe.”
20 ‘Ona tula‘i ai lea o Iopu ma saei lona ‘ofu ma tafi lona ulu, ‘ua fa‘apa‘ū fo‘i o ia i le ‘ele‘ele ma ifo.
21 ‘Ua fai atu fo‘i o ia, “Na ‘ou sau lē lavalavā mai le manava o lo‘u tinā, o le a ‘ou fo‘i atu i ai ‘ua lē lavalavā; na foa‘iina mai e le ALI‘I, ‘ua ‘ave‘eseina fo‘i e le ALI‘I; ‘ia fa‘amanūina le suafa o le ALI‘I.”
22 ‘Ua lē agasala Iopu i na mea uma, ‘ua na lē ta‘u valeina fo‘i le Atua.