Iopu
Le mataupu 18
O LE TUSI PA'IA - Ekalesia Katoliko Roma
O le Tali a Pilitati ‘iā Iopu
1‘Ona tali mai ai lea o Pilitati le Sua ‘ua fa‘apea mai,
2“Tou te fa‘ai‘uina afea a ‘outou ‘upu?‘Ia ‘outou mafaufau, e mulimuli ane fo‘i matou te tautala atu ai.
3Se a le mea ‘ua ta‘umanuvaefā ai i matou,ma ‘ua leaga ai i matou i ou manatu?
4‘Ua saeia lava oe i lou ita;Pe gaogao ‘ea le lalolagi ‘ona o oe?Pe si‘itia ‘ea le papa a‘i le mea o i ai, ‘ona o oe?
5“E tineia lava le malamalama o ē amio leaga,e lē pupula fo‘i le mumū o lona afi.
6E ‘avea le malamalama ma pouliuli i lona fale ‘ie;e tineia fo‘i lona lamepa i ona luga a‘e.
7E fa‘alavelaveina ona la‘asaga malolosi,e lafotūina fo‘i o ia i lana lava pule.
8Auā o ona lava vae ‘ua fa‘ao‘oina ai o ia i le ‘upega,‘ua savali fo‘i o ia i luga o le mailei.
9E lavea lona mulivae i le mailei,e tāofimauina o ia e le matāsele.
10‘Ua tatao i le ‘ele‘ele le matāsele mo ia,ma le mailei mo ia i le ala.
11E fa‘amata‘utia o ia i itū uma i mea mata‘utia,e tulitataoina ai fo‘i o ia.
12E fa‘avaivaia lona malosi i le fia ‘ai,e saunia fo‘i le malaia i ona tafatafa.
13E ‘aina ona itū tino e le ma‘i;e ‘aina lava ona itū tino se‘ia o‘o ‘ina oti.
14E lia‘iina lona fa‘atuatuaga a‘i lona fale ‘ie,na te ‘aumaia fo‘i o ia i le tupu o mea mata‘utia.
15E mau lea i lona fale ‘ie, auā ‘ua lē toe fai mōna;e lūlūina le teiō i luga o le mea e nofo ai o ia.
16E mamago ona a‘a i lalō,e sala‘eseina fo‘i ‘ona la i luga.
17E fa‘aumatia lona fa‘amanatuga mai le lalolagi,e leai fo‘i sona igoa i le malae.
18E tulia o ia a‘i le malamalama i le pouliuli,e tuli‘eseina fo‘i o ia i le lalolagi.
19E lē i ai ‘iā te ia se atali‘i,e leai fo‘i se atali‘i o lona atali‘i i lona nu‘u,e leai fo‘i sē toe i mea sa nofo ai o ia.
20E femēmēa‘i tupulaga mulimuli i lona aso,fa‘apei ‘ona maua e le mata‘utuia o ē na muamua.