1 ‘Ona tali mai ai lea o Pilitati le Sua, ‘ua fa‘apea mai:
2 “‘E te tautala i nā ‘upu se‘ia afea?E fai fo‘i ma matagi tetele o ‘upu a lou fofoga se‘ia afea?
3 Pe fa‘api‘opi‘oina ‘ea o le Atua le fa‘amasinoga?pe fa‘api‘opi‘oina ‘ea mea tonu e Lē e ona le malosi uma lava?
4 ‘Āfai na agasala atu lau fānau ‘iā te iama ‘ua lafoa‘iina i latou e ia ‘iā latou solitulafono?
5 ‘Āfai ‘e te matuā sā‘ili atu i le Atua ma ‘ai‘oi atu i Lē e ona le malosi uma lava;
6 ‘āfai ‘ua e lelei ma e amio sa‘o,e maleifua mai lava nei o ia ‘ona o oe,e fa‘asaogalemū fo‘i e ia le fale e fai ai lau amiotonu.
7 E ui lava ‘ina itiiti lou amataga,‘ae matuā fa‘ateleina lou i‘uga.
8 “Auā ‘inā e fesili atu ia i le tupulaga na muamua,ma ‘ia e matuā su‘esu‘e i o latou mātua.
9 Auā o i tatou o tagata ananafi, ‘ua tatou lē iloa;auā o tatou aso i le lalolagi o le ata ia.
10 Latou te lē a‘oa‘o mai ‘ea ‘iā te oe,ma ta‘u mai ‘iā te oe, ma fai mai ‘upu a‘i o latou loto?
11 “Pe tupu mai ‘ea le kome a lē o i ai se palapala?pe tupu mai ‘ea le utuutu ‘ae lē o i ai se vai?
12 A o lauolaola ma le lē salaina,e muamua ona mamae i vao iti uma.
13 E fa‘apea lava ala o i latou uma o ē fa‘agalogalo i le Atua;e fa‘aumatia fo‘i le fa‘amoemoe o le tagata fa‘alēmata‘u.
14 E vavae‘eseina lona fa‘amoemoe,o lona fa‘atuatuaga fo‘i o le fale o le apogaleveleve lea.
15 E fa‘alagolago o ia i lona fale, ‘ae lē mau;e tāofimauina ai e ia, ‘ae lē tumau.
16 ‘Ua tupu olaola o ia, a o le lāina,‘ua tupu fo‘i ona tātupu i lana fa‘ato‘aga.
17 ‘Ua feuiuia‘i ona a‘a i le fa‘aputuga ma‘a,‘ua iloa fo‘i le mea o i ai ma‘a.
18 E fa‘aumatia lava o ia a‘i le mea o i ai o ia,‘ona fa‘afiti ai lea ‘iā te ia, e fa‘apea atu:‘‘Ou te lē iloa oe.’
19 Fa‘auta, o le ‘oli‘oli lea i lona ala,e tutupu fo‘i nisi mai le ‘ele‘ele.
20 “Fa‘auta, e lē lafoa‘iina e le Atua lē ‘ua sao lana amio,na te lē tāofia a‘e fo‘i lima o ē amioleaga.
21 Se‘ia fa‘atumuina e ia lou fofoga i le ‘ata‘ata,ma ou laufofoga i le ‘alaga fiafia.