1 ‘Ua toe fai mai fo‘i Eliu,
2 “‘Ia e ‘onosa‘i mai pea teisi ‘iā te a‘u,‘ou te fa‘aali atu ai ‘iā te oe,auā ‘ua totoe pea ‘upu mo le Atua.
3 ‘Ou te ‘aumaia lo‘u poto a‘i le mea mamao,‘ou te ta‘uamiotonuina fo‘i lē na faia a‘u.
4 Auā e moni lava, e lē pepelo a‘u ‘upu;‘ua ‘iā te oe le tasi ‘ua fa‘amaoni lona poto.
5 “Fa‘auta, ‘ua silisili ‘ese le Atua, ‘ae lē ‘ino‘ino o ia i se tasi,‘ua silisili ‘ese le malosi o lona finagalo.
6 Na te lē fa‘aola i lē ‘ua amio leaga;‘ae faia e ia le fa‘amasinoga mo ē ‘ua puapuagātia.
7 Na te lē ‘alo ona fofoga i ē ‘ua amiotonu;‘ae silasila i tupu i nofoāli‘i;na te fa‘atumauina fo‘i i latou e fa‘avavau, ‘ua fa‘asilisiliina fo‘i i latou.
8 ‘Āfai fo‘i ‘ua noanoatia i latou i maea u‘amea,ma lavelavea i latou i maea o le puapuagā,
9 ‘ona fa‘aali ai lea e ia ‘iā te i latou o mea ‘ua latou faia,ma o latou solitulafono, ‘ina ‘ua tele lava.
10 ‘Ua ia fa‘afa‘alogoina fo‘i o latou taliga i a‘oa‘iga;ma fetalai atu, ‘ia latou fo‘i mai nai le amio leaga.
11 ‘Āfai latou te fa‘alogo ma ‘au‘auna ‘iā te ia,‘ona fa‘auma ai lea o latou aso o manuia,ma o latou tausaga o fiafia.
12 ‘Ae ‘āfai latou te lē fa‘alogo,‘ona fa‘aumatia ai lea o i latou i le tao,e oti fo‘i i latou e lē popoto.
13 “A o ē ‘ua loto fa‘alēmata‘u,‘ua latou fa‘aputuina le to‘asā;latou te lē ‘alalaga ‘iā te ia pe a noanoatia i latou e ia.
14 E oti i latou a o taulele‘a;e i‘u fo‘i o latou ola fa‘atasi ma ē ‘ua fa‘asotoma.
15 Na te lavea‘iina lē ‘ua puapuagātia nai lona puapuagā;na te fa‘afa‘alogoina fo‘i o latou taliga a o sauāina i latou.
16 E fa‘apea fo‘i ‘ona ia ta‘ita‘i‘eseina o oe a‘i le mea vā apiapi,i le mea lautele e lē o i ai se vā apiapi;o le mea fo‘i e laulauina i lau la‘o‘ai e so‘ona lololo lea.
17 “A ‘ua e fa‘a‘ato‘atoaina le fa‘amasinoga a ē amio leaga;e mulimuli le fa‘asala i le fa‘amasinoga.
18 Auā ‘ua i ai le to‘asā,‘ia oe, ne‘i ‘ave‘esea oe e ia i le sasa;‘ona lē fa‘asaoina ai lea o oe i se togiola tele.
19 Na te finagalo ‘ea i au ‘oloa? Na te lē finagalo lava i auro, po o faulaiga‘oa uma lava.
20 ‘Aua ‘e te mana‘o i le po,e ‘ava‘e ai nu‘u a‘i le mea o lo‘o latou i ai.
21 ‘Ia oe, ne‘i e loto atu i le amio leaga;auā ‘ua sili lou loto i lea mea i lou loto i le puapuagā.
22 Fa‘auta, ‘ua silisili ‘ese le Atua i lona malosi;o ai na te a‘oa‘o e fa‘apei o ia?
23 Po o ai ‘ua togia ‘iā te ia lona ala?O ai fo‘i na te fai atu, ‘‘Ua e faia amioletonu?’
24 “‘Ia e manatua ‘ona vivi‘i i ana galuegao lo‘o va‘ai i ai tagata.
25 ‘Ua matamata i ai tagata uma lava,‘ua iloa mamao atu e tagata.
26 Fa‘auta, ‘ua silisili ‘ese le Atua, tatou te lē iloa fo‘i o ia;e lē masino fo‘i le faitau o ona tausaga.
27 Auā e ‘aveina a‘e e ia fa‘aafuafu o vai;e totō ifo le timu e sui a‘i lona ‘ausa.
28 E mā‘ulu‘ulu mai ai i ao;e totō tele mai ai i luga o tagata.
29 E iloa fo‘i ‘ea se tasi ‘ona fofola o le ao,ma le ta‘alili mai o lona fale apitaga?
30 Fa‘auta, ‘ua ia fofola i ona luga lona malamalama;‘ua ia ufiufi fo‘i le ‘iliti tai.
31 Auā o ia mea ‘ua ‘ia fa‘asalaina ai nu‘u;‘ua ia foa‘i mai ai fo‘i mea e ‘ai e tele.
32 ‘Ua ia ufitia ona ‘a‘ao i le uila,na te poloa‘i i ai i se mea e pa‘ū i ai.